志工書寫

降低修憲戶橂ê憲是siáⁿ-mih憲？

◎Chô Nâsim

修憲兩字誠實蓋ngāi-gio̍h！

我知，逐家第一想著--ê，to̍h是修《中華民國憲法》，彼部為怹大中國設計ê根本法。我知影有人因為修憲兩字，信念袂tùi-tâng無通做伙行。我嘛知影有人跤行修憲，心肝底teh想制憲，就是我家己。我嘛知影真關心咱teh行動ê有志，會來交流，講m̄-thang 閣修中華民國憲法，制憲才是正途。

講制憲，人民作主志工團現現to̍h有一本《台灣共和國基本草案》，通提供予國民討論、比較，這是林義雄先生1989年完成ê著作。20幾年後，台灣ê政治環境變化袂少，林先生ê想法和見解也有改變，原底草案條文有一寡無合時宜，所以ka做修改，2017年閣再出版，咱志工團有teh賣，一本百五niâ，歡迎關心憲政制度ê好朋友，人人手頭攏thang有一本，來做伙了解。

是講按呢，咱哪會閣teh行降低修憲戶橂ê路？是啊！我嘛按呢憢疑過，家己問家己幾偌回、嘛參志工討論幾偌擺、閣招伴鬥陣讀這本《台灣共和國基本草案》、嘛閣佇今年ê志工研習會，濟濟志工攏有在場，咱有就這ê問題，閣一擺請教林先生。最後，我有得著淡薄仔心得，thang來支持家己，繼續參與行踏。我to̍h來分享，這ê降低修憲戶橂ê憲是siáⁿ-mih憲？

第一、無錯，he to̍h是ta̍k-ê攏想會著koh蓋倒彈ê《中華民國憲法》，m̄-kú我m̄是beh講這本。我beh講ê是《憲法增修條文》，總共有12條，怹是對1991到2005年由國民大會經過七改ê增修所定落來--ê，是現此時台灣政治實體運作ê根據，可比講總統、副總統ê 選舉kap任期to̍h定佇第２條。佇chit 14年中間，憲法增修ê地點攏是佇台灣ê台北市，參與增修ê人，有過去濟濟人所phìⁿ-siùⁿ ê萬年國會老國代，怹制定第1 ê版本。接紲落來，攏是經過咱用選票所頓--出來，代表台灣人民ê國代，繼續照時勢teh修正。一直到2005年這1冬，嘛是台灣人民去投票所，頓政黨票，委任「任務型國民大會代表」來複決2004年佇立法院通過ê修憲案，結局是修正第 1第2第4第5 kap第8條，閣加新制定第12條，恁講，這敢m̄是MIT ê憲法條文？所致，咱無法度否認增修條文kap台灣人khán-khé-nái，而且kap咱公民關係上深ê修憲戶橂to̍h是第12條。

彼陣，咱kan-nā知影beh廢除國民大會，修憲案會換公民來複決，講是公投入憲，m̄-kú咱無真清楚公民複決ê戶橂，其實是無影民主，何況講公民應當有修憲提案權利ê認bat。To̍h因為2005年的結果，憲政改革ê路soah來斷去，拖到17冬後2022年，立法院才通過第八改ê憲法增修：18歲公民權案，這个歷史上頭1个予公民複決ê修憲案，嘛因為超級懸ê戶橂來失敗。17冬--neh，今年滿18冬（1个幼嬰攏成年--a），這無ha̍h民主精神ê第12條文，到taⁿ iáu-sī袂振袂動，予咱beh增修啥攏袂得行。He to̍h kap 2004年拄出世ê《鳥籠á公投法》仝款，予你 án-nóa投嘛投袂過，to̍h閣經過13冬，hit-ê假影民主ê戶橂才修法補正，m̄-kú猶原是一部排除憲法改革ê公民投票法。斟酌ka想，未來世代beh有路thang行，定著這馬愛用第12條ê戶橂來修正戶橂，你講我按呢講敢袂相拍電？是啊！這是現實，修憲戶橂降落來，才有可能憲政改革。台灣政治實體是法治，照法就是這條thang行niâ。

第二、來講這ê降低修憲戶橂ê憲，又閣是siáⁿ-mih憲？

這ê降低修憲戶橂ê憲，嘛thang講是制憲ê憲。咱訴求「落實民主、降低修憲戶橂」所欲kap眾人交流--ê，是ǹg望有一工，有一部國家根本大法，內底一字一句攏是經過國民批准--ê。這部國家根本大法，定著有1條修憲戶橂ê條文，這ê戶橂，有包括公民會得發動連署，進行修憲ê提案--bô？準講咱制定出新憲法，結局伊ê修憲程序iáu-sī無thang予人民參與，按呢，這款ê新憲法，敢有影是逐家欲ti̍t--ê？雖罔是制新憲，soah制定出和這馬無輸贏ê戶橂，按呢敢tio̍h滿意？這是咱愛先想予piān--ê，嘛不時愛表達做主人ê意志，準備好佇彼工，批准新憲ê時，是m̄是會得人民作主？這點佇咱心肝底會蓋明白。To̍h好chhān像定定有人teh爭論獨立kap建國，He CHINA 1949 to̍h建國--a、露西亞嘛對1991崩盤ê共產蘇聯，建立有掛民主khăng-páng ê 露西亞聯邦，m̄-kú怹ê百姓，敢thang有獨立意志ê自由表現？咱敢認為台灣建立一个世界kā你承認ê國to̍h好，á-sī咱愛追求會當保障每一个人獨立自主、無受壓制、自由ê國度？所以，咱對hông套佇咱小國無合用閣無民主ê舊憲，是kan-nā要求有新憲tio̍h好，á-sī追求正港落實民主ê憲法？

以上兩點合起來，就是咱beh落實民主、降低修憲戶橂ê理路，m̄-nā突顯現行ê修憲戶橂無合理，嘛寄望落實民主：公民有修憲提案ê權利，這是制憲內底ê修憲條文袂當走閃--ê。明年初，又閣beh投政黨票kap區域立委，咱會ka斟酌，遮ê政黨kap立委參選人ê政見，是m̄是有討論修憲戶橂ê降低？是m̄是會追求民主ê落實？怹若是放外外，咱to̍h來去ka分傳單，傳單頂頭ê三格á圖，hit-ê瓜笠仔a-sáng，是講甲明明明。

補充資料：

《台灣共和國基本草案》第126條

基本法前言的修改，依照下列程序中的一種提出修正案。

1.國會議員五分之一以上的提議，四分之三以上的出席，出席議員三分之二以上的贊成。

2.有創制權之公民三十分之一以上的連署。

基本法條文之修改，依照下列程序中的一種提出修正案。

1.國會議員十分之一以上的提議，三分之二以上的出席，出席議員二分之一以上的贊成。

2.有創制權的公民五十分之一以上的連署。

《台灣共和國基本草案》第127條

前條修正案交由公民權行使委員會依照創制程序提請國民批准。修正案之批准，贊成票應該多於不贊成票，並且該贊成票應該超過全國有創制權的公民總數四分之一。

大家來做主人——2022年11月26日，參與台灣歷史上頭擺ê憲法修正案公民複決ê投票

◎Chô Nâsim

　　大家敢知影？11月26號，除地方選舉幾若張票，咱有選舉權ê人，人人閣有一張修憲案ê公民複決票，就親像公投票仝款，愛表達同意抑是無同意，這个修憲案ê內容是：「公民年滿18歲，有選舉、罷免、創制、複決佮參加公民投票的權利。除了憲法或其他法律有特別規定外，年滿18歲，有被選舉權。」簡稱做18歲公民權修憲案。（被選舉權說明：目前公職人員選罷法規定的參選年齡戶橂猶是23歲。）

　　大家敢知影？咱人民若認為憲法條文無合時代，向望修改，目前是無權利連署來發動修憲，干焦會當靠立法院ê立委提案，提案欲會當過關，佇立法院有雙四分三ê戶橂，立法院三讀通過，全案公告半冬，才輪會著咱公民投票複決，修憲案正經欲成功，有效的同意票愛占全國選舉人數的一半，這擺是965萬票。恁看，這ê過程是毋是誠硬篤！

　　今年3月25彼工，立法院有109个立委出席攑手通過18歲公民權修憲案，無投票ê立委有4个：3个缺席，1个是主持議事ê主席。就是講國會113席，扣掉主席，出席ê109个立委，全數同意這个修憲案，也就是國會四个政黨攏有共識。按呢，咱就真好判斷，四个政黨佇國會是修真的抑是修假的？咱會當佇最近的選舉活動，觀察政黨有咧鼓舞選民同意這个百分百由怹通過ê修憲案無？另外降低修憲戶橂、建立公民連署提案機制、公民複決戶橂比照公投法、廢除考試院佮監察院，這佇立法院攏無成案，免講嘛輪袂著咱人民做複決。

　　11月26號，咱著做伙參與台灣歷史上頭擺ê修憲案複決ê投票，好好仔想分明，過去咱18、9歲的時陣，袂通得投票，未來18、9歲的公民會得投票無？咱這工愛共同做決定。

　　毋過，若萬不幸，這擺百分百立委所提ê18歲公民權修憲案，佇公民複決這工，結局同意票ê票聲煞連選舉人數一半都無，這就表示2005年彼屆ê任務型國代所制定ê修憲程序出問題囉！當當修憲程序有問題，紲落來是欲按怎修憲咧？請各位國家主人參考咱人民作主志工團所斟酌ê兩个訴求，做伙來要求選區立委著一定愛照辦，下一个會期應當先kā修憲ê程序做修正，包括提案人資格閣通過ê戶橂，攏愛先kā伊修予合理閣公道，請參考《公民投票法》提案程序，除了立法院提案以外，嘛閣有公民連署、行政院提案和總統交付，是按怎修改憲法就干焦立委會當提案？