Resumo do proxecto

A presente solicitude lévase a cabo polo desexo de dar continuidade ao proxecto a curto prazo "O alumnado do futuro" do curso 2022/2023. Queremos seguir traballando nas temáticas de inclusión, educación emocional e sostibilidade, así como continuar coa formación do teatro como ferramenta educativa. As tres primeiras están ligadas a grupos de traballo que xa existen no IES de Mos, nos que participan tanto alumnado como profesorado. A nosa idea é crear un novo grupo de teatro para fomentar a inclusión e a transversalidade dos contidos dos distintos grupos de traballo. Poder asociar estes grupos e unificalos mediante o proxecto, tamén axuda a dar protagonismo e motivación aos seus participantes.

Asimismo, un dos obxectivos máis importantes desta solicitude é mellorar a internacionalización do centro e a experiencia do profesorado que nos permita nun futuro solicitar a Acreditación Erasmus+ coa garantía de poder conseguila.

1. Mellorar a internacionalización do centro e ampliar o intercambio de coñecementos con outros centros europeos: participaremos en mobilidades con grupos pequenos de alumnado e abriremos o abano de socios colaboradores, para así poder continuar co iniciado no noso proxecto anterior.

2. Constituir e dar protagonismo ao grupo de sostibilidade: necesitamos mellorar o consumo de recursos, a xestión de residuos e a concienciación ambiental. Será o propio alumnado o responsable de facer campañas e para iso poderán aprender novos enfoques noutros centros de referencia.

3. Poñer en marcha un grupo de teatro co alumnado así como desenvolver as competencias do profesorado para utilizar o teatro como ferramenta didáctica, para traballar contidos transversais e unificar os nosos grupos de traballo.

4. Implementar novas metodoloxías e espazos para mellorar os valores de inclusión, diversidade e tolerancia. Seguiremos traballando cos nosos socios de Francia para profundizar nesta temática.

Cursos de formación para o profesorado en:

• Oslo: actividades prácticas como improvisación, exercicios de teatro, contacontos, etc., para implantalas como ferramenta didáctica.

• Amsterdam: ameazas sobre os nosos ecosistemas e estratexias para conectar o currículo escolar coa necesidade de preservación do medio natural.

• Helsinki: educación ambiental no sistema educativo finés e como implementar a súa metodoloxía noutras realidades educativas.

Jobshadowing para o profesorado:

• Visita de tres docentes ao Liceo Galileo Ferraris (Taranto, Italia), para observar as súas metodoloxías en educación ambiental no sistema educativo italiano e comparar a situación ambiental nas nosas rexións de procedencia.

Mobilidade de alumnado:

• Lycèe Guy Chauvet (Francia): o alumnado traballará sobre inclusión e diversidade nun centro xa coñecido pola nosa colaboración previa.

• 1st Gymnasium (Pyrgos, Grecia): o alumnado realizará actividades nun centro de referencia "green school" e tamén se utilizará o teatro como medio.

As actividades descritas ata agora son as solicitadas no proxecto Erasmus+ porque son aquelas que necesitan da financiación europea, pero tamén se prevén outras nas que seremos nós o centro de acollida:

• Visita de alumnado de Francia, Grecia e Italia en distintas datas.

• Visita de profesorado de Francia e Italia en distintas datas.

• Adquirir por parte do profesorado as competencias e coñecementos básicos para implementar proxectos e accións no noso centro cunha maior seguridade.

• Observar diferentes sistemas educativos e metodoloxías para comparar e poder implementar e trasladar os seus puntos positivos á nosa realidade educativa.

• Enriquecer a nosa comunidade educativa a través da interculturalidade, fomentando unha educación nos valores da Unión Europea.

• Promover a participación activa e o protagonismo do alumnado no proceso de ensinanza-aprendizaxe, no que o profesorado servirá de facilitador do mesmo.

• Impulsar os grupos de traballo, especialmente os de sostibilidade, igualdade e educación emocional. Búscase establecer lazos entre eles, compartir ideas e poder traballar de xeito trasversal.

• Motivar a participación do profesorado neste proxecto Erasmus+, así como a súa implicación no futuro.