Resumo do proxecto

O IES de Mos é un centro que conta con arredor de 650 alumnas e alumnos, cunha oferta académica que abarca dende 1º da ESO ata 2º de Bacharelato, con cinco modalidades diferentes (ciencias da saúde, científico-tecnolóxico, humanidades, ciencias sociais e artes). O claustro está moi implicado e unha das consecuencias é que existen múltiples grupos de traballo: igualdade, educación emocional, inclusión a través do deporte, sostibilidade, diversos clubes de lectura e un grupo de artes audiovisuais.

Ante este contexto queremos participar nun proxecto Erasmus+ para tratar de integrar parte destas ideas, crear vínculos e intercambiar experiencias con centros doutros países, traballando conceptos clave para o alumnado do futuro dunha forma máis colaborativa e transversal. Aspiramos a que os nosos docentes aprendan novas metodoloxías en contextos culturais diversos e países diferentes, coa fin de aplicar algunhas desas ferramentas no noso centro, ademáis de proporcionar novas oportunidades ao noso alumnado.

A través deste proxecto e tras analizar as diferentes necesidades detectadas no noso centro, pretendemos alcanzar os seguintes obxectivos:

1. Establecer sinerxias con outros centros educativos para conseguir proxectos a longo prazo no que poida participar o alumnado.

2. Creación dunha nova materia ou programa didáctico que aborde conceptos e nocións relevantes na sociedade actual (integrando os nosos grupos de traballo).

3. Traballar a competencia social e cívica mediante diferentes actividades que nos permitan incluir ao alumnado migrante, así como aquel que se atope máis illado dentro do noso centro educativo.

4. Presentar o teatro como ferramenta central dentro do grupo de educación emocional, así como unha estratexia relevante para a resolución de conflitos e expresión das emocións.

5. Implementar un proxecto centrado no medio ambiente, a sostibilidade e o cambio climático.

Para alcanzar os obxectivos mencionados previamente puxémonos en contacto con diferentes institucións. Tras esta busca, concluimos que o mellor sería combinar actividades de jobshadowing para inspirarnos na metodoloxía doutros centros europeos:

• Rumanía e Francia: planificamos un gran proxecto de inclusión e pretendemos establecer relacións para mobilidades de alumnado no futuro. Ademáis, en Francia prestaremos especial atención ao seu proxecto medioambiental.

• Dinamarca: é un centro caracterizado pola diversidade do seu alumnado e que conta cunha materia de referencia para nós, chamada "Perspectivas globais".

• Turquía: instituto pioneiro no uso do teatro como ferramenta educativa e emocional.

Estas mobilidades estarán acompañadas de actividades previas e posteriores. Traballaremos estas temáticas co alumnado e poremos énfase no aprendizaxe en cascada por parte do profesorado. Para poder darlle continuidade ao proxecto, tamén queremos formar ao noso profesorado menos competente en lingua inglesa a través dun curso en Irlanda.

Coa finalidade de conseguir todos os nosos obxectivos, o equipo Erasmus seleccionou unhas actividades e mobilidades para este proxecto que casan perfectamente coas nosas necesidades. Os principais resultados que queremos obter serían:

• Mellorar a inclusión do noso alumnado máis vulnerable.

• Crear unha materia ou programa didáctico na que desenvolver un pensamento tanto crítico como global no noso estudantado.

• Establecer vínculos con diferentes centros e tratar de organizar mobilidades para o noso alumnado en futuros proxectos Erasmus+.

• Potenciar o noso proxecto medioambiental.

• Implementar o teatro como ferramenta educativa.

Están previstos distintos instrumentos de avaliación para medir o noso éxito despois de cada activiade e ao finalizar o proxecto.