Upload a pdf version of your essay or, copy the text into a text box here.

Taku vaitoanga kite rua - Tata'anga o taku korero.

I raro nei, e vaitoanga kite rua teia, no runga i taku korero tei rave'ia i te Monire, ra itu no Tianuare, mataiti rua tauatini, taingauru ma varu. Ka rave matou mate kiriti ki runga i te peapa me kare tata mai na runga i te rorouira. Ka kiriti matou e tai anere ki te tai tauatini e rua anere kupu. E rua ngauru petene te maka o teia vaitoanga kite e ka inangaroia kia maata te au manako e kia oonu, kia rauka i te maka teitei.

Iaku ei, reka au te tata'anga au i taku korero no te mea, kua rai mai toku manako e toku irinaki'anga kua mako. Penei e ngai tetai ka inangaro'ia kia aka rai mai te manako, inara me rave akaou'ia te vaito'anga kite toru, irinaki au ka rai rava atu te manako i pangi taku topiki.

Assessment 2 –

Extended Written “Argument”

Name: Elizabeth M J Bishop

Student Id: S11107042

Course name: CM211 – Cook Island Maori 2

“Noatu toku reo papa’a, ko toku ivi, toku kiko, taku toto e mea Maori e”

Topiki: Na to tatou reo Maori ei kite ei koe, ko ai koe, e noo eaa mai koe?

E tika rai teia autara, me kare e tika?

Akatu’era’anga: (Introduction)

Ko to tatou reo Maori e pakau puapinga teia i roto i toku ora’anga e to tatou ora’anga. Anau ia mai tatou i teia nei ao e kua ‘utu’utu’ia mai to tatou au metua ia tatou. Tera ra, i anau ia mai tatou, i reira to tatou metua, koputangata e te au taeake i akamata ei te autara kia koe e ki aku. Ko toku irinaki’anga ko teia te tuatau i akamata ei tatou i te kite i te akarongo e te akanamunamu’anga akape’ea me autara i toou ua reo. I roto nei i te Kuki Airani mei te taingauru ma rua reo e autara ia ana. Inara, ko tetai papaki tangata, kua kopae i te reo ta te ui tupuna i apii mai kia tatou. Tera i reira te aite’anga, kua akava’ava’a tatou i to tatou reo tupuna, reo Maori Kuki Airani. Te akaroa.

Kopapa: (Body)

• Akapeea koe e kite ei no ‘ea mai koe me kare ra, no’ea mai tetai tangata? Na toou reo e akakite mai e, no’ea mai koe.

Teia akatau’anga mua: Me autara koe i roto i toou reo, me teia te tu: Me pukapuka maua ko toku taeake a Mere, e kua autara mai a ia na roto i te reo Rarotonga, ka kite ua au e, e tamaine Rarotonga a ia. Na tona reo katoa e akakite mai e, no tei ‘ea enua mai a ‘ia. Ka akarongo katoa koe i tana au kupu me autara mai a ia kia koe, e te tūke o te tangi’anga o te au kupu.

Teia te rua o te akatau’anga: me autara mai tetai va’a autara, ka taka ua iakoe, e, no te’ea enua mai a ia. Ko tetai kau pae va’a autara ka papa mai ratou i to ratou papa’anga. Ka kite meitaki i reira koe e, ko ai a ia, e noo ea mai a ia.

• Tetai au tāmanako’anga nō te ‘akamātūtū ‘akaou atu’anga i te reo Māori Kūki Airani:

1. Kia akamata ‘ia i te autara i toou reo Maori Kuki Airani i roto i te ngutuare mei te metua ki te tamariki. Ko te metua oki te puapi’i mua o te tamariki i roto tona tupu’anga. Kia riro toou reo Maori ko ta te tamariki reo mua kia tamou.

2. Kia akamaroiroi’ia te au metua kia autara i to ratou reo tupuna ki te au tamariki mei to ratou ou’anga e ki te aronga rarai.

3. E mea tau kia ‘apī’i’ia rai te reo Maori i roto i te apii, mei te Apii Tua Tai e tae uatu ki te Apii Tua Rua e pera katoa i te Apii Tua Toru.

4. Tetai akatau’anga, kia akamaroiroi i te au ona pitiniti i roto i te basileia kia taru’ia te reo Maori i roto i ta ratou autara’anga akakite no te ngai rare. Teia tetai akatau’anga, e ona oko motoka, Motor Centre. Ka inangaro’ia kia kite te tangata ona oko motoka i te autara i te reo Maori kia rauka i a ia i te oko ki to tatou au iti tangata Maori. Penei, ka riro teia i te akamaroiroi i te au mapu ou te inangaro ara e ko to ratou kaveinga kimi puapinga teia i te tamou i te reo Maori.

5. I runga i te au enua kia akamaroiroi to tatou kavamani kia rave’ia tetai au porokaramu, mei te Epetoma o te Reo Maori. Ka riro teia porokaramu ei akamaroiroi i te au ta’unga reo Maori i te apii i ta ratou tareni ki te uki ou.

6. Ko tetai manako, kia rauka i te akaora uatu rai ta tatou au peu Maori mei te, Te Maeva Nui, Te Mire Kapa e te Te Mire Atu. Ka riro teia au peu a tatou, kia vai uatu rai i roto i to tatou ora’anga ko teia tetai au ravenga no te apii’anga i to tatou reo e ta tatou au peu.

• E tika rai teia autara, na to tatou reo Maori e kite ei koe, koai koe e noo ea mai koe?
  1. Ae, kua ki te papu au no te mea, mei taku i ta iku atu i mua atu no runga i toku taeake ‘ia Mere me autaratara maua.
  2. Ko ta tatou peu Maori katoa tetai akari’anga koai koe e no ‘ea mai koe na roto i te imene, koni e te au tu rutu. Inara e tuke te au tu imene, koni e te rutu’anga a te au pa enua Tonga ki ta te pae enua Tokerau.
  3. Me kare koe e kite i toou reo, kare katoa koe e kite ko ai koe, e no ‘ea mai koe.

‘Akakoukou’anga: (Conclusion)

• Ko te reo e pakau puapinga teia i roto i te kapua mai’anga o tetai uatu iti tangata, mei te iti tangata Kuki Airani Maori rai. E tau rai kia ngakau parau’ia teia apinga e reo no te mea na toou reo e akakite ki to te ao nei e ko ‘ai koe e no ‘ea mai koe.
• Irinaki au e, e mea tau kia umuumu koe i te tamou i toou reo Maori i mua atu ka tamou atu koe i tetai reo ke. Ko te irinaki’anga autara teia a te au tangata kite pakari koia oki te reo, me kite koe e tai reo, ka rauka iakoe i te opara e te tamou i tetai reo uatu. E ngakau parau ana au i toku reo Maori no te mea e akaari’anga teia e ko ai au, e no 'ea mai au, koia oki ko Utataki Enua.

“Noatu toku reo papaā ko toku ivi, taku kiko e taku toto, e mea Maori e”.

No reira e taku ai tungane, tuakana e te teina tamou’ia toou reo e to tatou reo ei akairo akakite’anga ko ai koe, e no ea mai koe.