Taku tirotiro noa, taku hono tātai 

Ka wehe koe i ahau;

Te mūrau a te tini, te wenerau a te mano,

Taku manu tīoriori!

Nō ngā hau papangarua ki te tonga;

Ko Te Tupe-o-tū, ko Te Hau-te-horo,

Ka whakairi te toa!

Rangatū atu rā 

Ngā tītahatanga i roto o Pāhiko;

He kauterenga nui

Nā koutou ngā taumata i Te Horo

E whakamakuru ana ko Aituā tonu,

Ko Tiki rāua ko te Toa,

Ko Whana-ihu rāua ko Whana-rae!

Ko te tama i awhitia

E tērā wahine, e tērā tangata;

E whakatutuki ana

I ngā wai tētē a Tūmatauenga.

Taku whatiwhati kī ka riro!

Taku poporo tū ki te hamuti

Taku wai whakatahetahe

Ki te kauhanga a riri;

He rīanga tai, he rutunga patu

Nā koutou ko tuakana ki te one i Puruaha.

Tākina atu rā

Kia whana ai ō ringaringa,

Kia hōkai ai ō waewae.

Haere rā, e Pa!

I ngā tai whakarewa kauri ki te uru.

Tūtanga pō noa i roto i ahau;

Kei te aha tō hara?

Kei ngā ara tahataha nunui a Tiki-maeroero.

Kei te aha tō hara?

Kei ngā tūranga rau a te toa.

Kei ō hīanga i tukua iho ai,

Ka moe koe i te kino; te hoa e - i.

TE PUKAPUKA MŌ TE RITO:  He mihi tēnei ki a  Matawai Hanatia Winiata, nāna tēnei puka i tākoha mai i tōnā wehenga atu i Te Kura i te 2017.  Kei tēnei pukapuka ngā kupu mō ngā mōteatea me te pōkeka kua whakaemia ki kōnei.