Geet (Gujarati)

Gujarati Geet by Uday Shah

-----------------------------------------------------------------

મમ્મી મુજને લેસન ખૂબ જ મારે કશે ન જાવું.

સવારે સ્કૂલે જાઉં ને હું લગભગ સાંજે આવું;

ત્રણ-ત્રણ કલાક ટ્યૂશન જઈને રાતે હું પણ થાકું;

મમ્મી મુજને લેસન ખૂબ જ મારે કશે ન જાવું.

સ્કૂલ ને ટ્યૂશન પૂરા થયા ત્યાં અંધારું થઈ જાવું;

અંધારે થાકીને રમવા કેવી રીતે જાઉં;

મમ્મી મુજને લેસન ખૂબ જ મારે કશે ન જાવું.

લેસન જો નહીં કરી ગયો તો ટીચરનું ખીજાવું;

ટેસ્ટમાં ઓછા માર્ક્સ મળે તો પપ્પાનું ચીઢાવું;

મમ્મી મુજને લેસન ખૂબ જ મારે કશે ન જાવું.

રવિવારની રજા મળી ત્યાં ટ્યૂશન મારું ચાલુ;

સોમવારની ટેસ્ટનું બાકી અડધો દિ’ હું વાંચું;

મમ્મી મુજને લેસન ખૂબ જ મારે કશે ન જાવું.

આખો દિ’ બસ શિખવાનું હો એવું જીવન જીવું;

રોજની આ દોડાદોડીથી હું બાળક કંટાળું;

મમ્મી મુજને લેસન ખૂબ જ મારે કશે ન જાવું.

બાળક છું તેથી હું મારાં મનની મનમાં રાખું;

ભણવા માટે બચપણ મારું અંતે હું સ્વીકારું;

મમ્મી મુજને લેસન ખૂબ જ મારે કશે ન જાવું.

મારાં મનનું કરી શકું ના ખૂબ જ હું મૂંઝાઉં;

મારું બચપણ આવું હો તો શું જીવન ટુંકાવું;

મમ્મી મુજને લેસન ખૂબ જ મારે કશે ન જાવું.

(છંદ : ગાંગાગા઼ગા ગાંગાગા઼ગા ગાંગાગા઼ગા ગાંગા)

-------------------------------------------------------------------------

યાદ કરીને બળતાં રહીએ;

એનાં કરતાં મળતાં રહીએ.

એકબીજાથી આઘાં રહીએ;

મનથી પાછા ઢળતાં રહીએ;

એનાં કરતાં મળતાં રહીએ.

એકબીજાથી આઘાં રહીને;

એકબીજાને કળતાં રહીએ;

એનાં કરતાં મળતાં રહીએ.

તું પણ ખુશ છે, હું પણ ખુશ છું;

એકબીજાને છળતાં રહીએ;

એનાં કરતાં મળતાં રહીએ.

કોરી ખાશે આ એકલતા;

આમ ને આમ જો બળતાં રહીએ;

એનાં કરતાં મળતાં રહીએ.

(છંદ : ગાંગાગા઼ગા ગાંગાગા઼ગા)

------------------------------------------------------

યાદ આવી જાય છે;

આંખ ભીની થાય છે.

યાદ આવે હર વખત;

ને સતાવે છે સતત;

કેમે ના ભૂલાય છે;

આંખ ભીની થાય છે.

વાંક તો મારો હતો;

પણ હું સમજી ના શક્યો;

મન હવે પસ્તાય છે;

આંખ ભીની થાય છે.

તું મને છોડી ગઈ;

ને સજા દેતી ગઈ;

તું જ તું પડઘાય છે;

આંખ ભીની થાય છે.

જે છબી હૈયે વસી;

એ છબી ભીંતે જડી;

ત્યાં નજર થઈ જાય છે;

આંખ ભીની થાય છે.

તું જ અંતરમાં વસી;

તારા વિણ હું કંઈ નથી;

એ હવે સમજાય છે;

આંખ ભીની થાય છે.

(છંદ : ગાંલગા઼ગા ગાંલગા઼)

---------------------------------------------------------