Quen somos

Roberto Samartim, Presidente do Club Balonmán Ribadosar desde xullo de 2023

Quen se aproximar do Ribadosar encontrará un espazo seguro e unha comunidade acolledora, un lugar onde o balonmán é entendido como un medio para mostrar a crianzas e adolescentes a importancia do traballo en equipa, do esforzo comunal e do respeito debido a toda a xente.

No Ribadosar acompañamos o percurso deportivo de xogadores e xogadoras desde a infancia e a mocidade até se tornaren persoas adultas. Nese traxecto vital, traballamos para desenvolver todas as potencialidades de nosos/as deportistas, porque entendemos que xogar a balonmán é beneficioso e útil, tanto para as persoas que o practican como para o público que o desfruta.

No Ribadosar traballamos, portanto, co convencemento de que un clube de balonmán é necesario en Santiago de Compostela. Un clube capaz de formar no balonmán e de pór a conviver e a competir rapaces e raparigas de entre 6 e 18 anos, e que consiga tamén estabilizar no medio prazo equipas sénior masculina e feminina nas categorías galegas. Eses valores e estes obxectivos anímannos nesta nova etapa.

Somos o balonmán das terras de Compostela.

Agradecemos muito terte connosco.

Roberto Samartim

Presidente

O Club Balonmán Ribadosar naceu no ano 2012 para poder acoller e canalizar o interese polo balonmán dun grupo de nenos de Santiago de Compostela que gostaban deste deporte naquela altura.

A iniciativa partiu de Gregorio Vendrell e do apoio dun conxunto de pais que se organizaron e constituíron o Club Balonmán Ribadosar como unha asociación sen ánimo de lucro. Nese momento inicial, a directiva estaba formada por Gregorio Vendrell (Presidente); Aurelio F. Barreiro (Secretario); María Rodríguez (Tesoureira), José Ricardo Vázquez, Enrique Anchustegui, Celestino Fernández e Jesús Fernández (Vogais).

A actividade regular comeza na temporada 2012-2013 con dúas escolas de balonmán, unha no Colexio López Ferreiro e outra no Colexio Quiroga Palacios. Nese ano o Ribadosar puxo em competición unha equipa benxamín, dúas alevíns e unha infantil.

No ano 2014 a presidencia pasou a mans de José Ricardo Vázquez, quen formou unha directiva nova contando con Fernando Suárez Posse (Secretario); Lorenzo Redondo Collazo (Tesoureiro); Jesús Fernández Sulleiro, Stefano Ninni, Jean Christophe Pierre e Juan Manuel Coira López (Vogais). Cando en finais de xuño de 2023 Ricardo Vázquez deixou a presidencia, a directiva estaba composta por Marta Solla Villaverde (Secretaria); Santiago Suárez Gómez (Tesoureiro); Juan Manuel Coira López, Javier Rodríguez Carballo, Francisco González Yáñez e Francisco Javier González García (Vogais).

Nesa temporada 2022-2023 o Ribadosar competiu con equipas nas categorías benxamín e alevín misto; Infantil, cadetes e xuvenil masculino. Esas mesmas categorías mantéñense en competición na temporada 2023-2024.