Paisaxe no nº 1

“Ti dis: Galiza é ben pequena. Eu dígoche: Galiza é un mundo. Cada terra é coma se fose o mundo enteiro. Poderala andar en pouco tempo do Norte para o Sul, do Leste para o Oeste noutro tanto; poderala volver andar outra vez e máis: non a has dar andado. E de cada vez que a andes, has atopar cousas novas e outras has botar de menos. Pode ela ser pequena en extensión; en fondura, en entidade, é tan grande como queiras, e dende logo, moito meirande de como ti a ves. [...] Do grandor do teu espírito depende todo; canto máis pequeno sexa, máis terra precisará. Se o teu pensar é fondo, a túa terra, para ti, non terá cabo, nela estará o mundo todo con todos os seus climas. Se o teu pensar se detén na códea das cousas, non digas tampouco: Galiza é ben pequena; es ti, que endexamais poderás concibir nada grande.”

LERIA

Vicente Risco (1961)

A maioría do material empregado nestas páxinas, así como a súa estrutura, están tomadas dos recursos do "Proxecto Terra" e o seu libro "Pagus". Agradecemos aos responsables a súa xenerosidade por nos brindaren este material de grande calidade para o seu uso didáctico.

O Proxecto Terra é un proxecto de cooperación co mundo da educación do Colexio Oficial de Arquitectos de Galicia dirixido ás distintas etapas da ESO co obxectivo de colaborar no proceso de construción do coñecemento sobre os espazos que habitamos .

PAGUS. Galicia, un país de paisaxes