Feísmo
Feísmo
É un termo informal e ambiguo, empregado para caracterizar certo estilo construtivo do medio urbano e, especialmente, do medio rural galego.
Características:
Coexistencia non harmoniosa de ordes e estilos arquitectónicos, e mestura de materiais construtivos.
Mestura de materiais (por exemplo, un primeiro piso de pedra, unha segunda altura en formigón e unha terceira en tixolo coroado con fibrocemento) ou o seu uso inadecuado (un hórreo de ladrillo, por exemplo).
Inexistencia de remates e acabados exteriores. As edificacións carecen de revestimento, quedando o ladrillo ou o bloque de formigón á vista.
Ausencia de aliñamento nas edificacións. Os edificios, construídos en periodos distintos e sometidos a lexislacións cambiantes, non manteñen a liña da beirarrúa, describindo o conxunto das fachadas un plano sinuoso ou unha liña crebada.
Convivencia de distintas alturas nas edificacións. Dado que non hai homoxeneidade nos estilos arquitectónicos, tampouco hai unha liña de altura regular senón que é posible atopar edificios de quince plantas no medio do campo ou encostados a unha casa de planta baixa.
Edificacións sen rematar, ou cuxa construción se prolonga durante décadas. Dadas as características sociais, políticas e legais do municipio galego, unha construción pode permanecer en estrutura durante anos, ou mesmo non ser terminada nunca.
Simultaneidade de usos. A construción dun almacén encostado a unha igrexa románica, ou un galiñeiro xunto a un hipermercado, ou a xuxtaposición de chan industrial con terreo habitado son características da paisaxe feísta. É habitual a indiscernibilidade de chan urbano e chan rural, ou uso empresarial ou habitacional.
Ornamentacións desproporcionadas ou incongruentes, ou remates aberrantes, que se colocan nas fachadas e xardíns en busca de originalidade ou distinción, en recordo dos anos de emigración, ou como simple ostentación. Para satisfacer o desexo de orixinalidade nada mellor que dotalo [ao edificio] dun volume importante en altura, dunha cuberta cunha serie de bufardas rebuscadas e rocambolescas e tratalo exteriormente con gran profusión de elementos acompañados con carpinterías de aluminio ou plástico con cores e despieces?