Got compelling stories to tell? Share it with us. Be published.

Waging World Cleanup Day sa KS17:

Wastong Paggamit ng Oras Ngayong Pandemya

FEATURES | By: Ma. Erich Charlene BarnesSeptember 20, 2020

Sa gitna ng pandemyang coronavirus, ipinagpapaliban ng mga tagapag-ayos ang mga malalaking pagtitipon. Kasama na roon ang National Mountain Cleanup kung saan kabilang ang Larga Vista Mountaineering group. Subalit sa KS17, sama-sama pa rin sila sa pagsisiguro na walang oras na masasayang.

Dahil hindi natuloy ang gawain na iyon, naisipang isali ni Jennifer Isidro Hallig, homeowner at kasapi ng Larga Vista, ang KS17 sa World Cleanup Day. Napili niya ang KS17 annex park at sa tulong ng lead hiker nila ay nailatag naman ang bagong misyon. Naganap ito noong Setyembre 19, 2020.

"Dahil sa World Cleanup Day, napagsama-sama kaming gumawa ng makabuluhang pagbabahagi ng lakas at effort upang makatulong sa community," ani Jennifer.

Labis na kaligayahan ang naging dulot nito kay Jennifer at sa mga kasamang kapitbahay na naglinis. Nang makita nila ang mga batang naglalaro at mga matandang nagpapahinga sa parke ay naramdaman niyang "sulit na sulit" na ang kanilang pinagpaguran.

Kinilala rin sila ng World Cleanup Day - Philippines kaya ibang tuwa ang kanilang naramdaman. Gayunpaman, walang papantay sa ligaya pagkakita na nakikinabang ang kapwa sa misyong isinagawa.

Inanyayahan din ni Jennifer ang lahat na umpisahan ang kalinisan sa kanya-kanyang bakuran nang sa gayon ay maging maaliwalas ang lugar. Ang kaugalian na ito ay nagpapakita na saanmang lugar ay maaaring makatulong sa komunidad kahit na (at lalo na) ngayong may Covid-19. Basta't sama-sama at may social distancing!

Page updated

Report abuse