Beau-T-Ful: Ang Kagandahan ng SOGIE at paano nito napapalaya ang “T” sa LGBTQ+

Special Feature | By: Ma. Erich Charlene S. Barnes

Hanggang ngayon, ang mga miyembro ng LGBTQ+ ay nakakaranas pa rin ng pagtatangi at nagdurusa sa stereotyping na maaaring makapinsala sa kanila. Ang pagkilala sa SOGIE at pag-apruba sa bill ng isang panel ng senado ay isang tagumpay para sa pamayanan ng LGBTQ sa taong ito, kahit na naantala, at isang karapatan sa simula pa lamang. Isang panalo para sa mga miyembro ng LGBTQ tulad ni Mela na kailangan pang ipaliwanag ang kanilang pagkakakilanlan sa lahat ng oras.

Mula pa noong si Gretchen Custodio Diez ay pinagbawalan mula sa paggamit ng babaeng banyo ng mall bilang siya ay transgender, hanggang ngayong taon nang ang mamamatay-tao ni Jennifer Laude, isang transwoman, ay binigyan ng absolute pardon. Hindi biro ang kalagayan nila, lalo pa’t ang mga walang alam tungkol dito ang tumutukoy sa kung ano ang ibig sabihin ng pagiging trans. Habang ang mga boses ng trans ay bihirang naririnig sa mga pag-uusap na ito.

Kaya iyon ang adbokasiya ni Mela Habijan – ang mabigyang representasyon ang mga kapwa niya. Sa kaniyang pagtitiyaga, siya ay ang unang nagwagi ng international online beauty pageant na Miss Trans Global.

Ang pagkapanalo ni Mela sa kompetisyon ay higit na mas malaki pa sa kaniya. “A childhood dream that came true, a celebration of my truth, a testament of the love and acceptance that I get from the world, and my little way of honoring the life and dignity of Jennifer Laude and other trans Pinays ridiculed and oppressed by society,” saad niya.

All Things Transgender

Bilang content creator si Mela, ginagamit niya ang kaniyang plataporma upang magbigay kaalaman sa mga tao. Nagbukas siya ng Youtube channel noong 2018 at doon niya inilunsad ang #AllThingsT. Naglalayon na magdala ng kaliwanagan at upang maunawaan kung sino sila at kung bakit nila ipinagmamalaki ang pagiging Trans.

Inuna niyang talakayin ang pagkakaiba ng sex at gender bilang doon nagkakalituhan madalas ang mga tao. Sa kaniyang mga salita, ang gender ay isang bagay na natutuklasan sa paglaki ng mga tao habang ang sex ay ang ari.

Katotohanan ng SOGIE

Maaaring paghaluin at itugma sa maraming paraan ang mga elemento ng SOGIE. Ang isang tao ay maaaring italagang lalaki sa kapanganakan at magpakilala bilang isang babae. Kapag ang kanilang pagkakakilanlang kasarian ay hindi tugma sa kanilang itinalagang kasarian, maaari nilang makilala ang kanilang sarili bilang transgender (transman, transwoman.)

“Transwomen have been measured on the level of passability of each woman. A transwoman doesn’t need to pass, doesn’t need to be physically beautiful for her to own her womanhood,” sabi ni Mela.

Dagdag pa niya sa isang facebook post na walang nakakatawa sa ipinanganak na may titi pero ang isip at puso ay babae. Ito’y patungkol sa kontrobersya ng isang pelikulang tumatangkilik sa transphobia.

Hindi ito lubusan at kailanmang naiintindihan nang buo ng mga taong wala sa komunidad. Dahil sa mata ng mundo, normal sila.

“Pero ito yung laban na hindi namin bibitawan. We will patiently educate. Because just like any person, we trans people deserve respect for our truths, for our choices, and for being us,” pagdedeklara ni Mela.

Sa kabila ng pag-unlad, karamihan sa kamalayan ay nagmumula pa rin sa kapinsalaan ng mga kasapi ng LGBTQ+ na nakakaranas ng diskriminasyon, maging karahasan.

Kaya ang pagkilala sa SOGIE ng isang tao, lalo na ng mga kagaya ni Mela, ay isang malaking tagumpay sa sarili nito. Ito ay lagi’t laging higit pa sa pisikal, at bagamat hindi ito ang hangganan, ito ang daan sa isang mapagpalayang lipunan.