Malugod na pagbati! Sa bahaging ito ng aking portfolio, makikita ninyo ang ilan sa mga ipinagmamalaki kong mga gawa sa asignaturang Filipino ngayong taon. Habang nalalapit na ang aking pagtatapos dito sa Junior High School, layunin kong mapabuti lalo ang aking kakayahan sa pagsusulat, mapalawak ang aking bokabularyo, maging mahusay na tagapagsalita sa harap ng madla, at maunawaan nang mabuti ang ating panitikan at kultura. Halina't samahan ninyo ako sa aking pagkamit ng mga layuning ito! 💞

UNANG MARKAHAN ⊹ ࣪ ౨ৎ˚₊

MGA INAASAHANG PAGGANAP

Buwan ng Wika

Hugot Wika

Maliban sa Piyestang Pinoy, isa pang aktibidad na isinagawa namin bilang pagdiriwang ng Buwan ng Wika ay ang pagbuo ng isang hugot wika. Bawat grupo ay may kani-kaniyang sariling tema at ang napunta sa amin ay SRICE. Nung umpisa, gulong gulo ako kung paano ko ba pag-uugnayin ang SRICE sa isang hugot, ngunit nang pinaglaanan ko ito ng oras at nag-isip nang taimtim, masasabi kong kinilig naman ako sa sarili kong ginawa! Nasiyahan din ako at nakaramdam ng iba’t ibang emosyon habang binabasa ang mga hugot na nabuo ng aking mga kaklase.

Proyekto

Tulad niyo rin ba akong nalilito kung ano ang pinagkaiba ng mga mitolohiya galing sa iba’t ibang bansa? Sa tulong ng infographics na ginawa namin, natukoy ko nang maliwanag kung ano ang mga katangiang pinagkaiba at pinagkapareho ng mitolohiyang galing sa Gresya at Pilipinas. Tunay ngang nakakabighani ang mga kuwentong dala ng mga ito at nagpaparating pa ng mga gintong aral na tiyak nating magagamit sa araw-araw na pamumuhay. Dahil din sa paggawa namin ng infographics, lubusan kong naintidihan ang mga pinanggalingan ng ating mga ninuno at bakit mahalagang maipasa pa ito sa mga susunod na henerasyon.

Maikling Pagsusulit

Sa tulong ng maikling pagsusulit na ito, ako ay nakapag-balik aral tungkol sa aming naging leksyon at nasubok ang aking kakayahan. Hindi man ako nakakuha ng perpektong marka, ang mga pagkakamali ko ay magsisilbing aral sa akin na maging maingat sa pagsagot, siguraduhing kumpleto ito, at mag-aral pa nang mabuti. Maliban pa doon, magiging motibasyon din ito para sa akin upang galingan lalo at mas pagbutihan sa parating na markahang pagsusulit. Sa halip na sumuko dahil sa mga pagkakamaling aking natanggap, ako ay ginanahan lalong matuto at pagsumikapan upang maabot ang mga pangarap na aking minimithi.

PANGALAWANG MARKAHAN ⊹ ࣪ ౨ৎ˚₊

Mga Gawain sa Aklat

Tuwing kami ay magkakaroon ng mga aralin, napakahalaga para sa akin na masanay kung paano ito lalabas sa mga pagsusulit. Sa pamamagitan ng pagkakaroon ng mga “bookwork”, nae-ensayo ko ang aking sarili na magamit ang mga aralin na itinalakay namin sa mga pagsasanay na magagamit ko rin sa mga sitwsasyon sa totoong buhay. Maliban dito, mas nauunawaan ko ang mga paksa namin nang lubusan bilang isang hindi masyado magaling sa paggamit ng mga malalalim na salita sa wikang Filipino. Ikinatutuwa kong magaganda ang mga nakuha kong marka sa aming mga “bookwork” na sana ay magpatuloy tuloy pa sa mga susunod na markahan.

MGA INAASAHANG PAGGANAP

Paggawa ng Tula

Sa paggawa ng tula na ito, nasubok ang aking kakayahan na mag-isip kung paano ko gagamitin ang mga salita sa malikhaing paraan. Hindi lamang ako natuto gumawa ng tula, ngunit nakatataba ng puso na ako ay maging isa sa mga boses ng kabataan para isulong ang mga nararapat na gawin para maabot ang hinahangad na magandang kalikasan. Sa pamamagitan ng tula na ito, nais kong ipahiwatig sa aking mga kapwa-kabataan na nasa kamay namin nakasalalay ang aming kinabukasan.

PROYEKTO

Ngayong mga panahon, isa sa mga pinakalulugod kong gawin ay ang paggawa ng video at editing. Kaya naman, nang malaman kong bibigkasin namin ang tula sa pamamagitan ng video ay tunay akong nagalak dito. Napakarami kong mga ideyang naiisip at natutuwa akong naisagawa ko naman ang mga ito. Kuminang ang aking mga mata nang makita ang “notification” na ako ay nakakuha ng perpektong marka! Dagdag ko lang, noong ako ay nasa “grade school” pa lamang, ang “spoken poetry” ay isa sa mga paligsahan na aking sinasalihan. Sa pamamagitan ng proyektong ito, bumalik ang mga alaala ko mula sa aking kabataan noong sumasali pa ako sa mga ganitong paligsahan.

IKATLONG MARKAHAN ⊹ ࣪ ౨ৎ˚₊

PROMOTIONAL VIDEO

Para sa promotional video na ito, sa amin itinalaga ang kapaligiran ng aming paaralan na OLOPSC. Noong una, nakaramdam ako ng konting panghihinayang dahil ang ibang grupo ay makakapaglibot sa iba't ibang lugar, samantalang ang aming grupo ay mananatili kung saan kami pumapasok araw-araw. Ngunit nang nagsimula na kaming gawin ang proyekto, napagtanto ko na mas madali ito para sa amin dahil hindi na kami lalayo at kabisado na namin ang lugar. Mas madali naming naipakilala ang OLOPSC at naipakita ang kagandahan nito.

Naatasan akong kumuha ng mga bidyo gamit ang aking cellphone para maranasan ang ibang tungkulin. Nakakatuwang panoorin ang aking mga kaklase na umaarte at ipinapakita ang kanilang husay sa harap ng kamera.

Sa kabuuan, lubos akong nasiyahan sa proyektong ito dahil hindi lang namin naipakita ang mga paraan para alagaan ang kapaligiran, kundi nagkaroon din kami ng oras para magkasama-samang magkaklase. Ang aming filming ay puno ng malilikhaing ideya at tawanan na siyang bumuo sa aming proyekto.

TALAHANAYAN

Dahil sa anekdota ni Nelson Mandela, naglaan ako ng oras para manalamin sa aking sarili at napagtanto kong ang bawat kilos natin ay maaaring makaapekto sa ibang tao. Katulad ng mga nagpahayag ng kanilang karanasan kasama si Nelson Mandela, nais ko ring mag-iwan ng magandang impresyon sa mga taong aking nakakasalamuha.

Sa tulong ng talahanayan na ito, nakapag-isip ako ng mga paraan upang tulungan ang ibang tao at magpakita ng kabutihan sa kanila. Sinimulan kong maging mas maingat at mas masigasig sa aking mga aksyon. Pagkatapos ng isang linggong pag-alalay at paggawa ng mabubuting gawain, napagtanto ko na ang kabutihan ay nagdudulot ng kasiyahan hindi lamang sa mga taong natutulungan kundi pati na rin sa akin. Nakakatuwang malaman na sa mga simpleng kilos ay may mga tao akong napasaya at natulungan. Ang mga ngiti at pasasalamat ng mga taong aking natulungan ay patunay na ang kabaitan ay may malalim na epekto.

MAIKLING PAGSUSULIT

Habang sinasagutan ko ang pagsusulit na ito, may mga bahagi na ako ay nalito at kinailangan kong pag-isipan nang mabuti. Paulit-ulit kong binasa ang mga pahayag upang masiguradong tama ang aking isusulat na kasagutan. Dahil sa pag-iingat at tiyaga sa bawat tanong, laking gulat ko nang makita na nakakuha ako ng perpektong marka.

Ang tagumpay na ito ay tunay na makatutulong para sa aming paparating na markahang pagsusulit. Ang karanasang ito ay nagpatibay sa aking kaalaman at kumpiyansa tungkol sa mga kasanayang komunikatibo at sa kwento ni Nelson Mandela. Bukod pa rito, naging inspirasyon ito upang lalo pang paghusayin ang aking pag-aaral at panatilihin ang pag-iingat sa bawat gawain.

IKAAPAT NA MARKAHAN ⊹ ࣪ ౨ৎ˚₊

BURADOR

PRESENTASYON

MAIKLING PAGSUSULIT

PAGSASATAO

Lubos kong ikinasaya ang pagganap sa proyektong ito. Pinaghandaan ko ito nang mabuti upang maipakita ang pinakamahusay na bersyon ng aking karakter. Sa tulong ni Sir Jhay, ang talented na manager at fashion designer ng aking kapatid, nakakuha ako ng napakagarang suit na tumugma sa aking karakter. Naghanap din ako ng laruang baril upang mas maisabuhay ang papel, at sinigurado kong maisama ang detalyeng balbas para sa mas makatotohanang pagganap. Ganap kong isinabuhay ang katauhan ni Simoun, at bawat sandali ng pagganap ay tunay na nakakapukaw. Sana'y maibigan ninyo ang pagtatanghal tulad ng labis kong kasiyahan sa pagbibigay-buhay dito.

PANGKALAHATANG REPLEKSYON ฅʕ•̫͡•ʔฅ

Sa totoo lang, mula Grade 7 hanggang Grade 9, madalas akong nahihirapan sa pag-unawa sa mga nakatalagang kwento sa ikaapat na baitang. Kadalasan, hindi ko mawari ang takbo ng kwento dahil hirap akong sabayan ang pagkakasunod-sunod nito. Bukod dito, napakalalalim ng mga salitang ginagamit, kaya’t madalas akong naguguluhan. Dagdag pa, hindi rin lubos na nakukuha ng aking damdamin ang kwento at mga tauhan nito. Subalit, ngayong ako’y nasa Grade 10, nakakagulat ngunit napakasarap sa pakiramdam na lubos akong interesado sa bawat kabanata. Higit pa roon, naunawaan ko nang mas malinaw ang mga ito.

Sa bawat kabanata, iba’t ibang emosyon ang bumabalot sa akin—may mga pagkakataong masaya at ‘excited’, ngunit mayroon ding lungkot, galit, o inis. Bagamat nagkakaroon ng kaunting kalituhan minsan, nagagawa ko naman itong maunawaan nang lubos kapag inaaral ko ulit ang mga bahagi ng kwento.

Simula nang pumasok ako sa Junior High School, naging bahagi na ng aming taon-taon ang pagkakaroon ng malikhaing presentasyon tuwing ikaapat na markahan. Isa ito sa mga pinakaaabangan ko dahil hilig ko talaga ang mag-presenta sa harap ng maraming tao. Nakakuha ako ng inspirasyon para sa aking presentasyon ngayong taon nang mapanood ang digital play na “Pamilya Una”. Naisip ko, “Paano kaya kung ganito ang gawin ko—isang ONE-MAN STAGE PLAY, kung saan ako lamang ang gumaganap ng iba’t ibang mga karakter?” Sa ideyang ito, nabuo ko ang aking malikhaing pag-uulat.

Nakakatuwang makita ang mga gulat na reaksyon at masisiglang mukha ng aking mga kaklase habang pinapanuod nila ang aking presentasyon. Masasabi kong talagang nagbunga ang aking pagsusumikap at pag-eensayo nang maraming beses. Nawa’y naintindihan nila nang husto ang kabanatang iniulat ko, at sana, natuwa rin si Ginang Tubat.

Pagdating naman sa pagsusulit, tila kabaliktaran ng aking naging karanasan sa pagbasa ng El Fili ang nangyayari. Bagamat naunawaan ko ang mga kwento sa klase, iba naman ang naging hamon ng mga tanong sa pagsusulit. Madalas itong nalalayo sa mga napag-usapan at lubos na sinusubok ang aking kakayahan. Tunay na napakahirap ng mga katanungan, at aminado akong mayroon pa akong mga pagkukulang. Sana’y mas tumutok ang pagsusulit sa mga araling talagang tinalakay sa klase, dahil iyon ang mga mas naiintindihan ko. Nakalulungkot ang mababang marka na nakuha ko sa Mid-Quarter Exams, at mukhang mas mababa pa ngayong Quarterly Exams. Sa kabila nito, mas pagsusumikapan ko pa ang aking pag-aaral sa susunod.

Ngayon, habang papalapit na ang pagtatapos ng school year, nais kong kunin ang pagkakataong ito upang pasalamatan si Ginang Tubat. Sa kaniyang masayang paraan ng pagtuturo, hindi nawawala ang sigla ko sa tuwing may klase kami sa Filipino. Lagi kong inaabangan ang bawat sesyon dahil wala ni isang beses na naging boring ang aming klase. Lagi kong babaunin ang mga aral na itinuro ninyo sa akin. Bagamat alam kong may mga kahinaan ako sa ating wika, ang inyong paraan ng pagtuturo ang naging inspirasyon ko upang mas paghusayin at ipagmalaki ang ating sariling lenggwahe. Tiyak na mami-miss ko ang ating mga pagsasama at dadalhin ko ang mga alaalang ito hanggang sa aking pagtanda.

Page updated

Report abuse