Í þessum hluta er fyrst sagt frá kveiku og tilgangi verkefnisins. Síðan er skoðað hvað lög um grunnskóla nr. 91/2008 segja um hlutverk skóla ásamt því að rýna í skilgreiningu aðalnámskrár grunnskóla frá 2011 á almennri menntun.
Því næst er gerð grein fyrir nýlegum rannsóknum á kennsluháttum í grunnskólum á Íslandi. Það er gert til að kanna hvort og þá hvernig kennsluhættir tækju mið af möguleikum upplýsingatækninnar til að gera kennsluhætti fjölbreytta.
Síðan er fjallað um erlendar kenningar um breytta kennsluhætti sem taka mið af notkun upplýsingatækninnar á flestum sviðum skólastarfsins. Að lokum er að finna lista yfir heimildir sem nýttar voru við gerð þessa hluta verkefnisins.
Breytingar á skólastarfi og kennsluháttum hafa ekki verið eins örar og breytingar samfélagins á undanförnum árum. Gera má ráð fyrir að þjóðfélagið haldi áfram að breytast og jafnvel að þróast á einhvern þann veg sem samtíminn sér ekki fyrir. Af þeim sökum verður hver sá skóli sem vill kallast skóli framtíðarinnar að gera ráð fyrir því að bókalærdómur nemenda nútímans er ekki endilega sá sannleikur sem verður ríkjandi í framtíðinni og kemur þeim að bestum notum. Með þá sýn að leiðarljósi er mikilvægasta hlutverk skólans að auka sjálfsþekkingu nemenda svo að þeir þroski með sér frumkvæði, áræðni og sköpunarkraft til að takast á við síbreytilegar aðstæður í veruleika framtíðarinnar.