TAIKURA RĪKI e ngunguru nei!

Nō Ngā Kura ā Iwi te whiwhi nui te whai wāhi atu ki ngā whakataetae rīki i tū ki Rotorua i te 29 o Ākuhata ki te 3 o Hepetema 2022. He tauhou rawa atu mātou ki tēnei kaupapa. Heoi anō he nui ngā akoranga kua puta i roto I te tau.

He tōnamana tēnei e whakatōpu ai i ngā Kura Tuarua ā Motu mō te rīki te kaupapa. E toru ngā wāhanga o te tōnamana nei ko te wāhanga tuatahi ki ngā tama tāne 16-18 ngā tau, wāhanga tuarua ki ngā kōhine tuakana anō, ka mutu ko te wāhanga ki ngā tama teina hoki.

E toru o mātou tīma i tēnei tau he kohinga Uri ēnei nō roto mai i te waka o Tainui mai Te Wharekura o Rākaumanga i Rāhui Pōkeka, tae atu ana ki Ngā Taiatea Wharekura, a Te Wharekura o Kirikiriroa i te takiwā tonu o Kirikiriroa, heke noa ana ki Te Wharekura o Maniapoto.

Ka rere ngā mihi ki ngā Uri, ki ngā Kaiako otirā ki ngā Kura i whai wāhi mai ki tēnei kaupapa. He waimarie nō mātou te whakawhiwhi ki te tuatahi mō te whakataetae tama teina, hāunga tēnei ekenga ko te “kotahitanga o ngā Uri, o ngā Iwi, o ngā Kura” te toa o te whakataetae nei.

Pai Mārire

He kupu whakamihi ki te whānau o Tauranga Moana rawa atu ki a Heywood Kuka me Aramahou Ririnui nā rāua māua ko Hannah i arahina i tiakina i roto i te roanga o ngā whakaritenga o TOI ARIKIKURA nei.

Ka whai whakaaro nui anō ki a Ed Harawira rāua ko Nathan Solomon nā rāua te tīma kōtiro i ārahi i whakaharatau kia eke ki te tihi o Angitu. Ka mutu ki a Ati Aifou Olive he toki mō te whutupōro uniana o te Moana o Toi. He uaua te whakakupu i ngā mihi hāunga he miharo ! Arā hoki ngā hua o te kaupapa nei;

• he tutakinga tuatahi o ngā Uri

• he whakaharatau ki te whutupōro

• he nohotahi ki te Marae me te ako i ngā kōrero o wāhi kē atu

• he KORI whutupōro

Kua mau ngā kēmu e rua ki raro iho nei mō te hunga e hiahia tonu ana te mātaki. Ka rua, me mihi ki ngā kaipāpaoho a Aukaha Dickson (Kaiako nō Mauao) me Tanekaha (Uri Tau 11 nō Ruātoki) mo a rāua pāpaoho tuatahitanga ki te ao. Haramai te pai!

Hei koke whakamua; kua timata mātou ko Heywood, ko Aramahou, ko Ed, ko Hannah me Ati te whakawhiti whakaaro mō te whakarite pea i tētehi tōnamana takiwhitu ā motu. Ka pōwhiri ki NKAI te whakarite tīma ā rohe me te tae atu ki te tōnamana. Mai te tōnamana nei ka whiri ake pea i tētehi tīma hei kori ki ngā WORLD 7’s o te tau nei.