Adnodd hunanadolygu dwyieithog sy'n eich galluogi i adolygu eich ysgol neu’ch lleoliad yn erbyn nifer o feini prawf gwahanol sy’n cefnogi’r daith dysgu proffesiynol digidol. Nid oes gorfodaeth ar ysgolion i’w gwblhau, ond mae’n ffordd effeithiol o helpu ysgolion a lleoliadau i werthuso pa mor dda y maent yn cynllunio dysgu digidol, ei roi ar waith a'i gynnal wrth iddynt barhau â'u taith dysgu ddigidol.

Mae'r adnodd rhyngweithiol hwn yn cynnwys pedair elfen i arweinwyr ysgol eu hystyried:

• Arweinyddiaeth

• Dysgu proffesiynol ac arloesi

• Cwricwlwm, darpariaeth ac addysgeg

• Technoleg addysg

Gan fod hwn yn offeryn gymharol newydd, efallai fyddai'n syniad i ffocysu ar gwblhau un elfen ar y tro. Bydd hyn yn rhoi cyfle i'r ysgol ffocysu ar yr elfen benodol a gosod cynllun ar waith i ddatblygu effeithiolrwydd yr elfen. Unwaith fydd y pedair elfen wedi eu cwblhau, gellid diweddaru'r adnodd 360digiCymru unwaith yn nhymor yr Hydref ac unwaith yn nhymor yr Haf.

Mae'r offeryn wedi’i rannu’n bedair elfen ac o fewn yr elfennau yma ceir dair agwedd ar hugain gwahanol. Mae pob agwedd yn cynnwys pedwar datganiad lefel – lefel 4 yw’r lefel cyflawniad isaf a lefel 1 yw’r lefel cyflawniad uchaf. Bydd ysgolion yn dewis y datganiad sy’n adlewyrchu eu sefyllfa bresennol nhw orau. Drwy hunanasesu yn erbyn pob agwedd, gallwch greu darlun o daith dysgu digidol eich ysgol.