Almannavarnadeild ríkislögreglustjóra gaf út tilskipun um að farið yrði af neyðarstigi almannavarna á hættustig, frá og með 25. maí.

Í tilslökuninni kemur fram að fjöldasamkomur eru óheimilar til og með 21. júní 2020. Með fjöldasamkomum er átt við þegar fleiri en 200 einstaklingar koma saman. Allir einstaklingar eru hvattir til að viðhalda tveggja metra fjarlægð í samskiptum við aðra eftir því sem aðstæður leyfa.

Nú, við skipulag þessa skólaárs, er tilskipun almannavarnadeildar höfð til grundvallar. Þessi tilskipun hefur ekki áhrif á skólaslit í Lýsudeild en mikil áhrif norðan Heiðar þar sem hvorki útskrift nemenda í 10. bekk né skólaslit verða með hefðbundnum hætti.

Útskrift nemenda 10. bekkjar norðan Heiðar verður fimmtudaginn 4. júní kl. 18:00 í Klifi. Foreldrar þurfa að senda Lilju deildarstjóra (lilja@gsnb.is) tölvupóst með upplýsingum um hversu margir koma með hverjum nemanda, reynt verður að koma til móts við óskir foreldra. Í Klifi sitja aðstandendur nemenda saman við borð, léttar veitingar (konfekt og kaffi) verða í boði skólans og nemendur kvaddir með nokkuð hefðbundu sniði. Gert er ráð fyrir að athöfnin standi í um eina klukkustund.

Skólaslit verða daginn eftir, 5. júní.

Norðan Heiðar mæta allir nemendur 1.-10. bekkjar kl. 10:00 á starfstöðina í Ólafsvík, skólabíll fer frá Hellissandi kl. 9:40. Búið verður að skipta nemendum í 15 hópa og hver nemandi fer til síns hópstjóra. Síðan hefst ratleikur um alla Ólafsvík. Að honum loknum verður boðið upp á grillaðar pylsur og drykk. Athöfnin endar með því að bekkirnir stilla sér upp í raðir á fótboltavellinum og fá afhentan vitnisburð vetrarins. Að því loknu fara nemendur heim í sumarleyfi. Reiknað er með að heimferð verði um kl.12:00. Skólabíll fer út á Sand að þessari athöfn lokinni.

Sunnan Heiðar verða skólaslit með hefðbundnu sniði að öðru leyti en því að nemendur 10. bekkjar Lýsudeildar útskrifast þá jafnframt þaðan en ekki með 10. bekk í Ólafsvík daginn áður svo sem venja hefur verið. Athöfnin hefst kl. 14:00.

Í vor fór 5.bekkur út að tína rusl á og við Sáið. Mikið af rusli var sett í poka og kom krökkunum sérstaklega á óvart hve mikið var af sígarettustubbum. Þau höfðu einnig orð á því að þessir stubbar voru á sama stað og í fyrra þannig að eitthvað þurfa þessir stubba eigendur að hugsa sinn gang.

Á ruslarölti sínu fundu þau merktan fugl. Á þessum fugli, sem lítið var eftir af annað en beinagrindin, voru tvö merki. Nemendur sendu bréf á með upplýsingum og myndum af merkjunum til Náttúrufræðistofnunnar Íslands þar sem þau báðu einnig um frekari upplýsingar um hvernig fugl þetta væri.

Svar var fljótt að berast og kom í ljós að þetta var Hvítmávur sem merktur var í Sandgerði í nóvember 2016. Fuglinn var fullvaxinn eldri en fjögurra ára. Fuglinn var merktur vegna verkefnisins SEATRACK en hægt er að lesa um það verkefni á slóðinni http://www.seapop.no/en/seatrack/

Nemendur fengu að eiga merkin og verða þau varðveitt í Náttúrufræðistofunni í skólanum.

Nemendur 5. EBJ