Skóli hefst þriðjudaginn 14. apríl, samkvæmt skóladagatali og eftir því skipulagi sem við vorum farin að vinna eftir fyrir páska. Nú í apríl eru þrjár vikur og allar eru þær með fjóra vinnudaga. Í þessari viku er annar í páskum í dag, í næstu viku er Sumardagurinn fyrsti fimmtudaginn 23. apríl og vikunni þar á eftir er verkalýsðsdagurinn, föstudaginn 1. maí.

Við þessar aðstæður er ekki hægt að veita nemendum kennslu í samræmi við aðalnámskrá. Kennsluáætlanir með sínum hæfniviðmiðum og matsviðmiðum verðum við að leggja til hliðar en höfum til hliðsjónar eins og hægt er. Það fer eftir skipan teymanna, mætingum og viðveru nemenda hvernig okkur miðar áfram með nám og kennslu.

Við leggjum áherslu á fjölbreytt verkefni með líðan og velferð nemanda að leiðarljósi. Áherslu á nám og kennslu þar sem tækni og félagsfærni er blandað saman til að kenna krökkunum að takast á við aðstæður daglegs lífs. Leggja áherslu á að mannleg samskipti, takast á við ágreining og læra að sjá með gagnrýnum hætti það sem fyrir augum ber á internetinu.

Samkvæmt Aðalnámskrá grunnskóla þá er markmið skóla að mennta nemendur - sumir segja að það sé að gera nemendur að manni. Námskráin skilgreinir menntun sem

"... aukinni hæfni einstaklingsins til að takast á við áskoranir daglegs lífs. Almenn menntun miðar að því að efla skilning einstaklingsins á eiginleikum sínum og hæfileikum og þar með hæfni til að leysa hlutverk sín í flóknu samfélagi. Hún er hvort tveggja í senn einstaklingsmiðuð og samfélagsleg."