Barnaréttindavika og Barnaþing

Barnaréttindavika

Dagur mannréttinda barna er 20. nóvember og af því tilefni erum við með Barnaréttindaviku og Barnaþing í kringum þann dag. Í Barnaréttindavikunni leggjum við ýmis verkefni til hliðar og erum með sérlega mikla réttindafræðslu sem kennarar undirbúa. Verkefnastjórar Réttindaskólaverkefnisins og Réttindaráð sjá um að velja þema fyrir Barnaréttindavikuna og kennarar skipuleggja kennsluna út frá því. Gildi vikunnar er alltaf ,,Lýðræði". Að þingi loknu vinnur Réttindaráð úr fundargerðum og ræðir næstu skref. 

Skýjaborgir eru einnig með barnaréttindaviku í kringum dag mannréttinda barna. Í Réttindaviku er börnunum m.a. kennt hvað ákvæði Barnasáttmálans fela í sér, þau kynnast því hvað felst í lýðræðislegum vinnubrögðum og læra hvaða munur er á réttindum og forréttindum.  

Barnaþing

Barnaþingið er vettvangur barna í skólanum til að tjá sig um ákveðin málefni sem þau snerta. Á Barnaþinginu eru kennarar fundarritarar og tímaverðir og börnin í 7. bekk fá það hlutverk að vera fundarstjórar og fá til þess sérstaka þjálfun. Á Barnaþingsdeginum hittumst við um morguninn á sal skólans og hlustum á ræðu Réttindaráðs og fleiri atriði auk þess að syngja saman.  

Hlutverk fundarstjóra: 

• Kynna fundarreglurnar. 

• Hjálpa hópnum að fara af stað í umræður um efnið.

• Passa að umræðan snúist um fundarefnið.

• Nota virka hlustun (horfa í augu, kinka kolli, halla sér fram).

• Passa að allir fái tækifæri á að taka þátt í umræðunum.