Réttindaskóli- og frístund unicef

Hvað er réttindaskóli og frístund Unicef?

Vesturbæjarskóli, Skýjaborgir og Frostheimar eru Réttindaskóli- og frístund UNICEF. Markmið er að byggja upp lýðræðislegt umhverfi með því að rækta með markvissum hætti þekkingu, leikni og viðhorf sem hjálpa börnum að verða gagnrýnir, virkir og hæfir þátttakendur í nútímasamfélagi. Með þetta að markmiði eru grunnforsendur Barnasáttmálans útgangspunktur fyrir allar ákvarðanir í skóla- og frístundastarfi auk þess sem þær endurspeglast í samskiptum barna, ungmenna, kennara, frístundaráðgjafa og annarra starfsmanna.

Fjórar greinar sáttmálans fela í sér grundvallarreglur sem eru rauður þráður í gegnum allan sáttmálann og tengja saman ólík ákvæði hans en það eru 2., 3., 6. og 12. greinin. Rannsóknir sem gerðar hafa verið í meira en 1.600 Réttindaskólum hafa sýnt fram á jákvæð áhrif á skólastarf. Dregið hefur úr einelti og ofbeldi í skólunum, nemendum líður betur og þeir sýna meira umburðarlyndi fyrir fjölbreytileika, starfsánægja kennara hefur aukist umtalsvert, nemendur taka aukinn þátt í skólastarfinu og þeir hafa meira sjálfstraust. Með þátttöku í verkefninu eflum við enn frekar lýðræðislegt námsumhverfi og gerum börnin okkar færari í að þekkja og virða mannréttindi sem byggja á virðingu og jafnræði.

Eitt af meginmarkmiðum frístundaheimilanna er að börn hafi val um þátttöku og viðfangsefnin í starfinu og að lýðræðisleg vinnubrögð séu í heiðri höfð. Mikið er lagt upp úr því að hlusta eftir röddum barnanna og fá fram skoðanir þeirra á stórum jafnt sem smáum málefnum þannig að þarfir þeirra og óskir leggi grunninn að öllu starfinu.

Öll eiga að þekkja réttindi barna

Samkvæmt 42. grein Barnasáttmálans skulu stjórnvöld fræða börn og fullorðna um Barnasáttmálann reglulega svo allir þekki réttindi barna. Menntun á að hjálpa börnum að læra að rækta sjálfsmynd sína, hæfileika og færni. Hún á að kenna þeim að þekkja réttindi sín og að virða réttindi annarra, menningu þeirra og fjölbreytileika. Í Vesturbæjarskóla lærum við öll að þekkja réttindi barna, nemendur, foreldrar og starfsfólk.

Fimm langtímamarkmið Réttindaskóla- og frístund unicef

Börn og fullorðin þekkja réttindi barna (42. grein Barnasáttmálans)
Börn taka þátt og hafa áhrif (12. grein Barnasáttmálans)
Börn njóta jafnra tækifæra (2. grein Barnasáttmálans)
Börn upplifa að hagsmunir þeirra séu settir í forgang (3. grein Barnasáttmálans)
Börn upplifa öryggi og að réttindi þeirra séu virt (4. grein Barnasáttmálans)

Aðalnámskrá grunnskóla

Markmið er að nemendur geti rætt stöðu sína sem þátttakandi í samfélaginu, réttindi og skyldur og mikilvægi mannréttinda og jafnréttis í samfélaginu og á heimsvísu og þekki vel til Barnasáttmála Sameinuðu þjóðanna.

Menntastefna Reykjavíkurborgar

Meginmarkmið Menntastefnu Reykjavíkurborgar er að öll börn vaxi, dafni og uni sér saman í lýðræðislegu samfélagi sem einkennist af mannréttindum og virðingu fyrir fjölbreytileika mannlífs. Menntastefnan byggir á grunnstefjum Barnasáttmála Sameinuðu þjóðanna um að menntun barns skuli beinast að því að rækta persónuleika, hæfileika og andlega og líkamlega getu þess. Tilgangurinn er að búa börn undir að lifa ábyrgu lífi í frjálsu samfélagi í anda skilnings, friðar, gagnkvæmrar virðingar, mannréttinda og vinsemdar.

Farsældarhjólið

Í Farsældarhjólinu okkar má finna verklagsreglur og áætlanir sem snúa að námi, líðan og samskiptum barna og er Barnasáttmálinn lagður til grundvallar. Hér eru áætlanir um farsæld í þágu barna, forvarnarstarf, jafnréttisáætlun, viðbrögð við samskiptavanda og einelti, námsárangur og líðan barna, skólasókn og verklag sem snýr að barnavernd.

Farsældarhjólið

Áherslur Vesturbæjarskóla

Vesturbæjarskóli er grunnskóli fyrir börn í 1. - 7. bekk. Einkunnarorð skólans eru virðing, vellíðan og velgengni. Með það að leiðarljósi leggjum við áhersla á alúð, hlýju og áhuga á velferð nemenda og stuðlum þannig að jákvæðum skólabrag. Starfsfólk leggur sig fram við að skapa jákvætt og uppbyggjandi umhverfi þar sem öllum líður vel.

Við erum Réttindaskóli Unicef þar sem markmið er að námsumhverfi sé lýðræðislegt, börn læri um mannréttindi og tileinki sér gagnkvæma virðingu. Grunnforsendur Barnasáttmálans eru útgangspunktur fyrir allar ákvarðanir sem teknar eru í skólastarfinu og þær endurspeglast í samskiptum allra í skólasamfélaginu. Með markvissum hætti ræktum við færni, leikni, þekkingu og viðhorf sem hjálpa börnum að verða gagnrýnir, virkir og hæfir þátttakendur í samfélagi.

Hér má lesa meira um áherslur Vesturbæjarskóla.

Page updated

Report abuse