25.1
Með þekkingu á stærðfræði getur nemandi náð betri stjórn á aðstæðum, aukið getu sína til aðgerða, átt í samskiptum, skipulagt, dregið ályktanir og tekið skynsamlegri og gagnrýnni ákvarðanir og borið ábyrgð í daglegu lífi, m.a. á eigin lífsháttum, fjármálum og neyslu.
Um stærðfræði í Aðalnámskrá grunnskóla
Nemendur nota stærðfræði sem hagnýtt verkfæri í daglegu lífi, leik og starfi og átta sig á notagildi hennar við ólíkar aðstæður.
Áhersla er á lausnaleit, ígrundun og röksemdafærslu þar sem nemendur prófa mismunandi aðferðir, líkön og leiðir og rýna í niðurstöður.
Kennslan styður nemendur í að þróa jákvætt viðhorf til stærðfræðilegra viðfangsefna, efla sjálfstraust sitt og skilja að mistök eru tækifæri til náms og dýpri skilnings.
Nemendur fá að rannsaka, setja fram verkefni á fjölbreyttan hátt og tjá sig með hugtökum og orðaforða stærðfræðinnar í samræðu og útskýringum.
Verkefni eru fjölbreytt, merkingarbær og krefjandi og hvetja nemendur til virkrar þátttöku og tengingar við raunverulegar aðstæður.
Kennarinn skapar aðstæður fyrir merkingarbært stærðfræðinám með samvinnu, samræðum og virkri þátttöku nemenda.
Nemendur þjálfa notkun stafrænna verkfæra, hugbúnaðar og forritunar til útreikninga, gagnaframsetningar, rannsókna og túlkunar á upplýsingum.
Kennslan byggir á menningarlegum margbreytileika og sögu stærðfræðinnar til að nemendur skilji gildi hennar og áhrif á þróun samfélaga.