Guðríður Sveinsdóttir
Takk kærlega fyrir að taka þátt. Upptöku af netmenntabúðunum má finna hér að neðan.
Classkick
Classkick er frábært verkfæri í kennslu í hvaða grein sem er. Classkick er notað sem app í ipöddum en einnig hægt að nota í tölvu og þá sem vefsíða.
Classkick virkar á þann hátt að kennari býr til verkefni, á einhvers konar glærum, í forritinu/vefsíðunni. Síðan er verkefninu deilt með nemendum með kóða. Þegar nemendur hafa skráð sig inn þá getur kennari séð í rauntíma hvað nemendur eru að gera, aðstoðað þá, skrifað inn á verkefnin þeirra og leiðrétt. Þetta gerir kennari allt úr sínu tæki. Nemendur óska eftir aðstoð í gegnum tækið og getur þá kennari annað hvort aðstoðað í gegnum tækið sitt eða farið til nemandans.
Ég hef stundum notað þetta þannig að ég sit hjá þeim nemendum sem þurfa mestu aðstoðina og get síðan aðstoðað aðra í bekknum í gegnum tækið mitt.
Mér finnst best að búa til verkefnin í tölvu, nema ég þurfi að skrifa þá nota ég ipaddinn. Á meðan á kennslustund stendur nota ég undantekningarlaust ipaddinn.
Ég nota ókeypis útgáfuna og hefur hún nægt mér í þessi 4 ár sem ég hef notað Classkick. Það eru 20 verkefni sem fylgja ókeypis útgáfunni en ég hef þá bara eytt út verkefnum þegar ég fylli kvótann.