"Conexión coa Comunidade"

• Recollida de receitas familiares

• Crear un “Receitario da Comunidade” con achegas das familias (en papel ou dixital). 

• Plan FOGGA II

• Loxística de Recursos: Xestión e recollida do material necesario (mesas, ingredientes, equipos de son/vídeo).

RECEITARIO DA COMUNIDADE

Durante a primeira quincena de maio procurouse implicar ás familias no proxecto a través da iniciativa “Conexión coa Comunidade”. Levouse a cabo a recollida de receitas familiares co obxectivo de poñer en valor a tradición culinaria e os hábitos saudables no fogar. Con todas as achegas, estase a elaborar un “Receitario da Comunidade” en formato dixital, dispoñible en galego e en inglés  favorecendo así a participación e o intercambio entre toda a comunidade educativa. Esta actividade ten tamén un claro enfoque educativo, xa que permite traballar contidos relacionados coa nutrición, a cultura gastronómica e a transmisión interxeracional de coñecementos, ao tempo que fomenta a colaboración entre a escola e as familias e reforza o sentimento de pertenza á comunidade educativa. 

O alumnado de 1º Bacharelato utilizou a aplicación Canva para elaborar as receitas nas dúas linguas.

O alumnado de 2º de ESO fixo unha merendola saudable cos pratos incluídos no receitario das familias. Pasaron un bo rato despois de traballar duramente. A docente Yolanda Garrido foi a encargada de coordinar e realizar a actividade.

En Francés mesmo se animaron a facer un vídeo ademais das receitas escritas na lingua gala. 

"Ensaio Xeral e Marketing Final"

• Almorzo de presentación do proxecto SNACKS FP: BOCADOS RESPONSABLES no Carlos Oroza.

• Recrutamento de alumnado voluntario para monitores dos postos da feira

• Campaña de Buzz: Última semana de publicidade no centro (conta atrás, presentación dos postos).

SNACKS FP: BOCADOS SAUDABLES

Nutrimentes visita o proxecto “Snacks FP: Bocados Responsables” no CIFP Carlos Oroza 

O pasado xoves, 28 de maio, tivemos a oportunidade de asistir á xornada aberta organizada polo CIFP Carlos Oroza arredor da innovación educativa e da promoción dunha alimentación saudable e sostible na Formación Profesional.

O encontro contou coa participación da directora xeral de Formación Profesional, Eugenia Pérez, así como con representantes doutros centros de FP de Palma de Mallorca e do País Vasco, que coñeceron de primeira man os principais eixes do modelo de innovación educativa desenvolvido polo centro.

Durante a xornada presentouse o proxecto Snacks FP: Bocados Responsables, coordinado polo CIFP Carlos Oroza en colaboración co CIFP Gamarra e o CIFP Juníper Serra. Esta iniciativa promove o deseño e prototipado de snacks saudables, nutritivos e sostibles, substituíndo a oferta habitual de produtos ultraprocesados e convertendo o vending nun espazo real de aprendizaxe e innovación para o alumnado.

Tras a benvida e introdución realizadas pola dirección do centro, cada unha das institucións participantes presentou os produtos desenvolvidos no marco do proxecto. Posteriormente, os asistentes tivemos a oportunidade de degustar as diferentes propostas, comprobando de primeira man a súa calidade, creatividade e o firme compromiso coa alimentación responsable que caracteriza esta iniciativa.

Entre os produtos presentados destacaron:

• CIFP Carlos Oroza: galleta de améndoa, fresa e chocolate; iogur con granola e froitas liofilizadas; brookie; snack de queixo do Cebreiro, algas e pipas; e bocata de lacón con grelos e queixo tetilla.

• CIFP Gamarra: grissini de Idiazábal e noces; snack elaborado con produtos da horta; linguas de froitas da contorna; e pastas de avea alavesa con canela e limón.

• CIFP Juníper Serra: muffin de plátano e cacao; galletas mediterráneas; biscoito de cenoria; e flocos de millo con sabor barbacoa.

Desde Nutrimentes consideramos que experiencias como esta constitúen unha valiosa fonte de inspiración para seguir promovendo accións educativas relacionadas cos hábitos de vida saudables, a sustentabilidade e a educación alimentaria. Trátase dun proxecto innovador que demostra o potencial da Formación Profesional para dar resposta a retos actuais mediante propostas creativas, saudables e comprometidas co entorno.

Campaña de Buzz

"Loxística para a feira"

• Deseño das probas finais para a feira

• Análise e elaboración do material necesario: mobiliario, papelería...

DESEÑO DAS PROBAS FINAIS DA FEIRA

O deseño das probas da 1ª Feira Saudable realizouse procurando combinar a adquisición de coñecementos relacionados coa saúde e a alimentación equilibrada co desenvolvemento de habilidades sociais, lingüísticas e motrices. Todas as actividades foron concibidas cun carácter participativo e lúdico, adaptándose ás características do alumnado da ESO.

Durante a fase de preparación seleccionáronse e elaboráronse probas que permitisen traballar diferentes ámbitos competenciais. Na zona educativa incluíronse actividades relacionadas coa interpretación da etiquetaxe alimentaria, a reflexión sobre hábitos saudables, a comprensión lectora a través de cómics en linguas estranxeiras e xogos de asociación de conceptos en galego, inglés e francés.

Paralelamente, deseñáronse retos de carácter práctico e deportivo para o pavillón, orientados ao desenvolvemento da coordinación, a precisión, a concentración e o traballo en equipo. As probas foron escollidas procurando que resultasen atractivas, dinámicas e accesibles para todo o alumnado participante.

Un dos criterios fundamentais durante o proceso de deseño foi que as actividades puidesen ser completadas nun tempo limitado e que permitisen a participación simultánea de varios grupos. Tamén se estableceu un sistema común de validación das probas mediante o uso de tarxetas de control e pegatinas, facilitando así o seguimento do progreso de cada equipo.

Antes da celebración da feira revisáronse e axustáronse os materiais, as normas e os criterios de superación de cada reto para garantir a súa viabilidade e o correcto funcionamento da actividade. Esta fase de planificación foi esencial para conseguir unha proposta equilibrada que combinase aprendizaxe, actividade física, diversión e convivencia. 

*Nota aclaratoria: A pirámide alimentaria empregada na actividade de etiquetado de alimentos foi elaborada antes do mes de xaneiro, tomando como referencia os materiais dispoñibles nese momento. Co fin de garantir unha información actualizada e rigorosa, incorporouse unha nota explicativa na que se indica a configuración actualmente recomendada da pirámide alimentaria e se explican os cambios introducidos nas revisións máis recentes dos modelos educativos de alimentación saudable. 

ANÁLISE, Recollida E ELABORACIÓN DO MATERIAL NECESARIO

A organización da 1ª Feira Saudable requiriu unha planificación previa detallada para garantir o correcto desenvolvemento das actividades e a participación simultánea dos diferentes grupos de alumnado.

En primeiro lugar, realizouse unha análise das necesidades materiais de cada posto e das probas deportivas, elaborando e recompilando todos os recursos necesarios. Preparouse a papelería específica para cada actividade (tarxetas de participación, cuestionarios, fichas de traballo, pegatinas de control e materiais informativos), así como os soportes visuais empregados nos distintos postos.

Na Zona 1, dedicada ás actividades educativas, foi necesario habilitar espazos diferenciados para cada proposta. O posto de etiquetado de alimentos requiriu materiais impresos e recursos visuais relacionados coa alimentación saudable. Para o cuestionario interactivo empregouse unha pantalla táctil con acceso ás actividades preparadas previamente. O posto dos cómics precisou exemplares impresos e follas coas preguntas que o alumnado debía resolver. Pola súa banda, o xogo de dobres requiriu unha organización específica do espazo, sendo necesarias 10 mesas para distribuír adecuadamente os materiais e facilitar a participación simultánea dos grupos.

Na Zona 2, situada no pavillón deportivo, preparáronse os materiais necesarios para as diferentes probas de habilidade e coordinación: botellas de auga para o reto Water Bottle Flip, globos, vasos para a construción de torres e balóns de espuma para os retos deportivos.

Ademais, foi preciso organizar os itinerarios de circulación entre postos, distribuír os espazos para evitar aglomeracións e coordinar os horarios de participación de cada grupo. Tamén se prepararon as tarxetas de control que recibiu cada equipo ao inicio da actividade, nas que se rexistraba mediante pegatinas a superación das distintas probas.

A preparación dos premios para a 1ª Feira Saudable foi posible grazas ao excelente traballo en equipo desenvolvido polo profesorado participante.

Irene, do Departamento de Lingua Galega, encargouse da elaboración dos diplomas destinados aos equipos gañadores e da preparación das receitas de batidos saudables que se incluíron como parte dos agasallos.

 Ademais, fixéronse uns chaveiros co logo do proxecto coa  máquina de mecanizado láser do centro que se incluíron na cesta.

Mónica, do Departamento de Educación Física, foi a responsable da selección e compra dos produtos que conformaron as cestas saudables entregadas como premio aos equipos vencedores.

Pola súa banda, Sonia, do Departamento de Francés, encargouse da preparación e empaquetado das cestas, contribuíndo a que os premios presentasen unha imaxe atractiva e coidada.

A coordinación destas tarefas permitiu crear uns premios orixinais e motivadores para o alumnado, poñendo de manifesto a importancia do traballo colaborativo entre departamentos e a implicación do profesorado na organización de actividades que enriquecen a vida do centro.

Toda esta planificación permitiu desenvolver a feira de maneira fluída e ordenada, favorecendo a participación activa do alumnado e o correcto funcionamento das diferentes actividades propostas.

"Montaxe e Celebración da Feira"

• Envío de instruccións ao profesorado e alumnado

• Deseño de horarios para de alumnado e profesorado

• Montaxe dos postos

MONTAXE E CELEBRACIÓN DA FEIRA

A celebración da 1ª Feira Saudable foi posible grazas á implicación e ao compromiso do profesorado participante, que dedicou tempo e esforzo máis aló das súas obrigas lectivas para garantir o éxito da actividade.

Na tarde anterior á feira, as profesoras integrantes do equipo de Nutriescolas, Irene, Yolanda, Sonia, Mónica, Margarita e María, permaneceron no centro fóra do seu horario laboral para realizar a montaxe dos distintos postos e deixar preparados todos os espazos. Este traballo adicional resultou imprescindible para que a actividade puidese desenvolverse nas mellores condicións posibles.

Durante varias horas organizouse o mobiliario, distribuíronse os materiais, preparáronse os recursos didácticos, acondicionáronse os espazos das probas e revisouse que cada posto contase con todo o necesario para o seu correcto funcionamento. Ademais, colocáronse os elementos de sinalización, preparáronse as tarxetas de participación e ultimáronse os detalles organizativos para evitar incidencias durante a xornada.

Cómpre destacar que este labor de preparación foi realizado de maneira totalmente voluntaria e grazas á disposición do profesorado para dedicar parte do seu tempo persoal á organización da feira. Sen esta dedicación extraordinaria, non sería posible levar a cabo actividades deste tipo, que enriquecen a vida do centro e ofrecen ao alumnado experiencias educativas motivadoras e significativas.

O esforzo realizado permitiu que todo estivese listo á primeira hora da mañá seguinte, garantindo un desenvolvemento fluído das actividades e contribuíndo ao éxito dunha iniciativa que contou cunha excelente acollida por parte do alumnado e do profesorado.

Co fin de garantir unha organización eficaz da 1ª Feira Saudable e favorecer o correcto desenvolvemento de todas as actividades, elaborouse unha planificación horaria específica tanto para o alumnado participante como para o profesorado implicado na organización.

Por unha banda, deseñouse un horario detallado para o alumnado, establecendo as quendas de participación de cada grupo e os tempos de paso polos diferentes postos e probas. Esta distribución permitiu organizar os fluxos de alumnado, evitar aglomeracións e asegurar que todos os grupos puidesen completar as actividades previstas.

Por outra banda, elaborouse tamén un horario específico para o equipo docente de Nutriescolas, no que se distribuíron as responsabilidades de supervisión, coordinación e dinamización dos distintos postos ao longo das dúas xornadas da feira.

Ademais, co obxectivo de facilitar a coordinación de todo o centro, remitíronse instrucións ao conxunto do profesorado nas que se detallaban os horarios de participación de cada grupo, así como as indicacións necesarias para que acompañasen ao seu alumnado aos espazos correspondentes nas horas asignadas. Esta comunicación previa permitiu que todos os docentes coñecesen o funcionamento da actividade e colaborasen no cumprimento da planificación establecida.

A elaboración destes horarios e a coordinación entre o profesorado resultaron fundamentais para garantir un desenvolvemento ordenado da feira, optimizar os tempos de participación e asegurar que todas as actividades se realizasen con normalidade.

A feira estruturouse en dúas zonas diferenciadas, nas que o alumnado tivo que superar diversas probas e retos relacionados coa alimentación saudable, a actividade física e as competencias lingüísticas.

Nesta zona desenvolvéronse catro postos temáticos:

Valoración da actividade

A participación do alumnado foi moi positiva, destacando a súa implicación, entusiasmo e espírito de colaboración ao longo das dúas xornadas. Tamén cómpre agradecer a colaboración e o compromiso do profesorado participante, cuxa implicación resultou fundamental para o éxito da actividade.

A 1ª Feira Saudable converteuse nunha experiencia enriquecedora que permitiu combinar aprendizaxe, actividade física e convivencia, fomentando hábitos saudables dun xeito dinámico e motivador.