A nivel persoal, a viaxe abriunos os ollos á riqueza cultural de Romanía, á calor humana das persoas que coñecemos e á importancia de saír da nosa zona de confort para cuestionarnos como profesionais e como individuos. Volvemos con novas perspectivas e unha motivación renovada para mellorar o noso labor docente.

É importante destacar que este tipo de mobilidades non serían posibles sen o apoio institucional. Nun contexto onde, como vimos, moitos centros educativos carecen de recursos ou de iniciativas similares, o noso compromiso co desenvolvemento profesional debe ser, máis ca nunca, unha prioridade. Estas experiencias demostran que o intercambio cultural e educativo non só beneficia ao profesorado, senón tamén ao alumnado e, en última instancia, á comunidade educativa no seu conxunto.