DÍA 1: Chegada e primeiras impresións

A cidade de Sibiu é o maior municipio e a capital do seu distrito. É un importante centro económico e cultural de Transilvania. A súa poboación ronda os 150.000 habitantes. A vila foi fundada polos colonos saxóns de Transilvania no século XII e non pasou a ser parte de Romanía ata o ano 1918, evento histórico de relevancia para o país e que o centro que visitamos rememorou polo seu centenario (1918-2018), pintando un mural  conmemorativo na súa biblioteca. Despois da Segunda Guerra Mundial, Sibiu experimentou varios réximes ditatoriais, durante os anos de ocupación Nazi e comunista, e a súa turbulenta historia fai que presente unha arquitectura variada e diversidade étnica. 

Na actualidade, Sibiu ven de realizar unha serie de importantes reformas, das que fomos testemuñas: 

• • Restauración do centro urbano.

  • Peonalización de beirarrúas, interconectando as tres prazas principais da vila.

  • Limpeza do río Cibin, que atravesa a cidade.

Non é de estrañar que Sibiu fose designada - xunto a Luxemburgo - Capital Europea da Cultura no ano 2007, converténdose na primeira cidade da antiga Europa do Este en ser elixida para este título tras a caída do Muro de Berlín. 

A nosa chegada a Sibiu foi inesquecible. Despois dun longo día de viaxe (varios traslados en coche, avión e autobús), atopámonos con esta cidade, que parecía saída dun conto. Paseamos polas súas rúas empedradas, observando as cores das fachadas das casas, coas súas fiestras, que semellaban "ollos" mirándonos. Por momentos, sentímonos como parte da historia viva desta cidade.

Aínda que o cansazo se facía notar, o encanto de Sibiu fíxonos esquecer o reloxo. A primeira parada foi na Praza Grande (Piața Mare), onde a arquitectura renovada e o seu mercado de nadal nos sorprenderon pola súa beleza e harmonía. Sentimos de inmediato o espírito cultural e festivo desta vila que, ao mesmo tempo, parece pequena e acolledora, pero tamén aberta ao mundo.

Rematamos o día desexando seguir explorando cada recuncho desta cidade chea de historia e modernidade. Sibiu prometía ser moito máis que o escenario dunha experiencia de aprendizaxe: semellaba o lugar perfecto para inspirarse e descubrir novas formas de ver o mundo.