DBH 2 maila

Pentsamendu autonomo eta kritikoaren hastapenak

Mintegia: Filosofia
Ordu kopurua (astean): 2 ordu

Ikasgaiaren deskribapena:
LOMLOE hezkuntza-legeak proposatutako ikasgai berria da. Ikasgai honek pentsamendu autonomoa, kritikoa eta kontzientea garatzea du helburu, ikasleen eguneroko bizipenekin eta gizarte-errealitatearekin lotutako gogoeta filosofikoaren bidez. Arrazoibidea, argudiozko elkarrizketa eta ikuspegi anitzen arteko kontrastea lantzen dira, ikuspegi ez-dogmatiko eta kooperatibo batetik. Aldi berean, hezkuntza emozionala lantzen da, herritartasun demokratiko eta aktiboa sustatzeko.

Edukiak:
• Bizikidetzan dauden elementuak: ideiak, emozioak, eskubideak eta betebeharrak, komunikazioa, gatazkak eta erabaki-ereduak
• Nerabezaroan ohikoak diren gaiak: identitatea, harreman sozialak, sexualitatea, familia eta aisialdia
• XXI. mendeko erronka filosofikoak: globalizazioa, migrazioa, genero-desberdintasunak, arazo eko-sozialak, osasun mentala eta teknologia berriak
• Pentsamendu filosofikoaren oinarriak: jakintza-ereduak, logika aplikatua, falaziak, argudioak eta giza identitatea

Ikasgaiaren garrantzia:
Ikasgaiak izaera teoriko eta praktikoa uztartzen ditu, ikasleei eguneroko egoerak modu autonomo, kritiko eta enpatikoan ulertzeko eta kudeatzeko tresnak eskainiz. Talde-dinamika demokratikoak ulertzen eta lantzen laguntzen du, eta tokikotik globalera doan gogoeta sustatzen du, ikasleen ahalmen kritikoa indartuz.

Ongizate fisikoa eta emozionala

Mintegia: Gorputz Hezkuntza
Ordu kopurua (astean): 2 ordu

Ikasgaiaren deskribapena:
Ikasgai honek ongizate fisikoa, emozionala eta soziala lantzen ditu, jolasen, kirolen eta gorputz-adierazpenaren bidez. Ohitura osasungarriak garatzea, emozioen kudeaketa eta harreman positiboak sustatzen dira, ikasleen eguneroko ongizatea hobetzeko helburuarekin.

Edukiak:
• Jokoak eta kirolak
• Gorputz-adierazpena
• Ongizate fisikoa, emozionala eta soziala

Ikasgaiaren garrantzia:
Bizimodu aktibo eta osasungarria sustatzen du, kooperazioa, talde-kohesioa eta bizikidetza positiboa indartuz. Gainera, autoerregulazio emozionala eta errespetuzko lehiaketa lantzeko aukera eskaintzen du, dibertsitate funtzionala kontuan hartuta.

Ortua

Mintegia: Biologia eta Geologia
Ordu kopurua (astean): 2 ordu

Ikasgaiaren deskribapena:
Irakasgai honetan, eskola-baratzean lan egingo dugu, neguko eta udako barazkiak landatu, zaindu eta uzta jasotzeko. Baratzeko tresnak erabiltzen ikasiko dugu. Horrez gain, eskola barruko zenbait proiektu garatuko ditugu (hazitegiak, landareekin zenbait esperimentu, hazi-bankua, posterrak, aurkezpenak, etab.), landareen bizi-funtzioak ulertzen lagunduko dizkigutenak.

Edukiak:
• Lurra eta baratzearen plangintza
• Landareen bizi-funtzioak eta hazitegiak
• Izurriak, bioaniztasuna eta ingurumen-oreka

Ikasgaiaren garrantzia:
Ingurumen-hezkuntzako gune bat sortuko dugu, egunerokotasunean ortuan lan egiten eta urtaroak aurrera doazen heinean ortuaren eboluzioa ikusiz. Irakasgai honek gure barazkiak hazteko aukera emango digu, eta elikadura-burujabetzaren kontzeptuaren garrantzia ulertzen lagunduko digu. 

Atzerriko Bigarren Hizkuntza II – Frantsesa

Mintegia: Frantsesa
Ordu kopurua (astean): 2 ordu

Ikasgaiaren deskribapena:
Frantsesa irakasgaian, derrigorrezko bigarren hezkuntzako lehen etapan, ikasleak atzerriko bigarren hizkuntza batera hurbiltzen saiatzen dira, modu ludiko eta erakargarrian. Asmoa da leku askotan presentzia duen hizkuntza baten ikuspegi berri batetik ezagutu eta interesguneak aurkitu ahal izatea. Lau gaitasunak lantzen dira: ahozko ulermena, idatzizko ulermena, idatzizko produkzioa eta ahozko ekoizpena. Hori jolasen, bideoen eta proiektu bidez egiten da.

Edukiak:
• Lehen mailan landutako edukien sendotzea
• Hizkuntza-egoera berriak eta komunikazio estrategiak

Ikasgaiaren garrantzia:
Hizkuntza berri baten bidez mundua ulertzeko beste ikuspegi bat eskaintzen du. Frantsesa gaztelaniarekin lotura duen hizkuntza izanik, ikaskuntza errazten du eta kultura-aniztasuna balioztatzeko aukera ematen du.

Atzerriko Bigarren Hizkuntza II – Alemana

Mintegia: Gaztelania eta Latina
Ordu kopurua (astean): 2 ordu

Ikasgaiaren deskribapena:
Alemana irakasgaian, derrigorrezko bigarren hezkuntzako lehen etapan, ikasleak atzerriko bigarren hizkuntza batera hurbiltzen saiatzen dira, modu ludiko eta erakargarrian. Asmoa da leku askotan presentzia duen hizkuntza bat ikuspegi berri batetik ezagutu eta interesguneak aurkitu ahal izatea. Konpetentzietan oinarritutako ikaskuntza denez, modu aktiboan eta praktikoan sakonduko dute aurreko ikasturtean ikasitakoan. Gainera, hala nahi duten ikasleei Goethe Institut-eko azterketa ofizialetarako prestakuntza eskainiko zaie kurtso altuetan.

Edukiak:
• Zaletasunak, harremanak eta osasuna
• Bidaiak, ordutegiak eta pertsonen deskribapena
• Etxea, natura, animaliak eta oporrak

Ikasgaiaren garrantzia:
Beste hizkuntza batzuk ikasteak aukera ematen du bizitza aberasteko, ideia berriak esperimentatzeko, euren burua lantzeko, munduko kultura-aniztasuna balioztatzeko.