Ko ꞌai au?

Kia Orana tatou katoatoa. Toku ingoa ko Tukumate Riki Ngatuakana. E noo ana au ki Aitutaki i roto i te oire ko Nikaupara. E noꞌo ana au ki te kainga o toku nga metua. Ko au te rima o te tamaiti a toku nga metua. E ono matou tamariki tamaine e tai rai o matou tungane. E matenga katoa to matou tungane no matou. Kua akaipoipo tane au, e rima aaku tamariki. E rua tamaine, e toru tamāroa.

E puapii ana au i Aitutaki, i roto i te apii Araura Koreti. Taku pupu e apii ana e pupu itu e te pupu varu, e ko taku au apii e apii ana koia oki ko te Totiera taieni, Ingiriti e te reo Maori. E puapinga tikai taku nga'i rare kiaku no te mea ko toku metua teia i te tiaki e te tauturu iaku e toku kopu tangata i roto i to matou oraanga.

I roto i toku oraanga, e matenga noku, taku peu maori. E kopu tangata koni toku e te imene. E pupu koni taku i Aitutaki i karangaia to ratou ingoa e ko te Tumu Korero. E akatangi ukarere ana au, rutu paꞌu e te imene katoa. Taku au tamariki kua aite ratou kiaku i teia au tareni.

Toku Kopu Tangata

E vaine Aitutaki toku mama ruau e kua topa ia tona ingoa ki runga iaku. Ko toku papa ruau no Manihiki mai aia. E nga metua anau teia no toku metua vaine i anau iaꞌi au. E ā ratou i anau ia mai ei e to matou mama ruau e to matou papa ruau.

Ko toku metua tane anau, e tangata Tongareva, Manihiki, Rakahanga e te Pamati pera katoa e Aitutaki aia. Ko tona nga metua anau no teia au enua mai raua. E ono ratou i te katoatoa anga i anau ia mai ei.

Ko au, e rima matou tamariki tamaine, e taʻi rai o matou tungane. E noo ana aia ki Nu Tireni. E rua ooku tuakana i mate.

E kopu tangata mataora to matou e te maroiroi. E kopu tangata taokotai katoa i te rave i ta matou au rare.

Kia Orana.

Taku Tamariki

E ono aku tamariki. E ā tamaroa, e rua tamaine.

Ko taku mataiapo tamaroa e tamaiti angai naku mei tona pepe anga e toru ngauru ma rua oona mataiti i teia taime. E are rai tona e te noo nei rai aia ki toku paepae e tana vaine e te nga tamaine e rua. Ko tana rare e okooko manga i te apii pera katoa e kuki no te are kaimanga o te Aitutaki Village.

Ko te rua, e tamaine e toru ngauru oona mataiti. E tai ana tamaiti e ono mataiti i teia taime. Kua aere tana tane i te rare moni na ratou i te enua o te papaa. Te tereni puapii nei aia, e ko te rua teia o te mataiti.

Ko te toru, e tamaroa. E rua ngauru ma iva oona mataiti e kua akaipoipo atu aia ki te vaine Tiāpāni i teia mataiti akenei. E tai a raua pepe, e tamaine, e toru marama i teia taime. Kua aere atu ratou ki Tiāpāni i teia epetoma akenei i te orote e rua marama.

Ko te ā, e tamaroa. E tamaiti kite karape teia naku i te pae o te peu tupuna, te ꞌatu rutu, te ꞌatu kapa, te ꞌatu imene, te imene e te koni. Tuketuke tana tareni. Kua mata ana aia i te Kuki Airani no te koni e te rutu ki Vaiꞌī, ki Tiāpāni, ki Varani e te vai atura.

Ko te rima, e tamaine, e taingauru ma itu mataiti. Te aere nei rai aia ki te apii. E mea inangaro nana te koni e te imene.

Ko taku peniamina koia oki e tamaroa. Te aere nei rai ki te apii. Te apii katoa nei aia iaia i te rutu, te koni e te vai atura. Tona inangaro kia aite aia ki tona tuakana (ā o te tamaiti) i te kite karape o te au peu Aitutaki.

Teia te katoaanga o te autara e koai au. Kare i pou, inara, e aka ua teia ei akatauanga e KOAI AU!

Google Sites

Report abuse