My reflections

Toku Manako no teia Apii

I roto i teia tuanga apii, kua apii mai te reira i tetai au mea kare au i kite e kare katoa au e rave ana. Kua riro katoa teia ei turama i toku ngakau e toku upoko kia marama au i te reo o te Kuki Airani ma te oonu tikai.

Te mea mua koia oki ko te kiriti anga o te au kupu e eaa katoa ratou i roto i te takiato e te takiato korero. Te karanga nei paꞌa te tangata e, e mea mama ua i te kiriti i to tatou reo. Te karanga nei au e, e kaore. I roto i teia apii i kite ei au e, e au tuanga tetai kia kite tatou.

Te rua, te mataora nei au i teia apii no te mea e rai uatu rai te tuatau i te aere ki runga i te kupe ao rangi. Mari ake teia apii i kite ei au i te aere ki tetai ngai kare au i kite i runga i taku roro uira. E rai, e rai uatu rai te rare i raveia i runga i te roro uira e te kupe ao rangi. Kua rauka iaku i te aere ki runga i te Toon tastic i te rekoti iaku i te tara anga i taku tara ma te amani katoa i tona tutu. Pera katoa i te amani atu anga i tetai au apii ei apii i taku au tamariki.

Te toru, te tāru tūtū e te vai atura ei akameitaki atu e te akamatutu atu i tetai au tuanga apii kia riro ei apii tau e te mako no te apii atu i te au tamariki. Te vai ra tetai au tuanga o teia apii tei riro ei ngatā kiaku, e kare au e tuku i te uiui kit e puapii e te akapeea nei teia pakau e ka akapeea au i te raveanga e mako ei. I teia au tuanga i kimikimi ei au i toku marama na roto i te puapii kua kite au e, e apii meitaki teia kiaku.

Te ꞌā, noatu tetai au ngai tūkaui i kite au kiaku rai i roto i teia apii te ngakau parau nei au i te au mea ngata tei rauka iaku i te rave i oti ei taku apii. Ko te tuanga o te upload tutu e te vai atura kare au i kite ana, inara, i teia ra kua kite au inara kare i tukatau meitaki. Ka riro taku raverave anga i teia apii i te tuatau ka apii au i te tamariki ei tauturu iaku e te akameitaki atu i taku apii.

Ko te manako openga, te inangaro nei au i te akameitaki i te puapii tei apai mai i teia apii kiaku. Kua rauka tetai marama noku i te rare i tetai au apii ki runga i te kupe ao rangi. Noatu e kare rava te tuatau no tana apiianga ia matou, e raꞌi uatu taku i tamou mai. Te riro nei teia ei ngakau parau anga noku i taku i oti e taku i rauka i roto i teia tuanga apii o te reo maori. Te rave nei au i taku apii i Aitutaki nei e kare te puapii i konei i te tauturu mai iaku. Kua riro tana i apii mai kiaku e taku i tamou mai ei arataki iaku i te rave i taku apii.

Ei taopenga i toku manako, kia riro ta matou i apii ia mai e ta matou i tamou mai ei kiteanga no te au puapii kare i rave i teia au apii o te reo maori e no te uki tupaꞌupaꞌu tuatau.