Orð dagsins

Orð dagsins - sundurgreining

Orð dagsins er aðferð sem felur í sér greiningu á merkingu orða, samhengi þeirra og frekari sundurgreiningu. Aðferðin hefur skírskotun í hugmyndir fræðimanna um einkenni markvissrar orðakennslu. Í aðferðinni er fjallað ítarlega um valin orð, í samhengi en slíkt er talið mikilvægt (Beck, McKeown og Kucan, 2013; Graves, 2016; Kamil og Hiebert, 2005; Nagy, 2005). Orðin eru einnig brotin niður í orðhluta og fjallað um þá á sambærilegan hátt og orðin. 

Efniviður kennslunnar er fjölbreytilegur orðaforði sem settur er í samhengi við reynslu og fyrri þekkingu nemenda en slíkt er talið mikilvægt þegar orðanám á í hlut (Beck, McKeown og Kucan, 2013; Block og Mangieri, 2006; Graves, 2016; Kamil og Hiebert, 2005; Marzano, 2004; Nagy, 2005).

Orð dagsins er aðferð sem tilheyrir fyrst og fremst fyrsta og öðru stigi líkans Orðs af orði.

Það fer eftir markmiðum náms hve viðamikil sundurgreiningin er. Í tungumálakennslu má sem dæmi taka marga þætti fyrir. Í námsgreinum eins og náttúrufræði, stærðfræði og samfélagsfræði ætti að leggja áherslu á hugtakagreiningu, merkingu og samhengi orðsins og tengsl þess við önnur orð/hugtök.

​Þannig má nýta aðferðina til að skoða jafnt yfirborð sem undirlög, allt eftir markmiðum náms.

Hér neðar er t.d. unnið með yfirborðið, merkingu hugtaks í eðlisfræði. Orð dagsins í þessari mynd er því hugtakagreining. 

Hér neðar leiðir kennari orðavinnu en virkjar einnig nemendur með sér, fær hugmyndir frá þeim og ræðir og skráir.

Næstu æfingar miða svo að því að nemendur tileinki sér sjálfir aðferðina og vinni með orð á sambærilegan hátt. Þetta er því hluti af stigskiptum stuðningi.