Kohhran Chanchin

Chhinga Veng East Kohhran hi Venghlun Kohhran (Tuna Chhinga Vengthlang Kohhran lo ni ta) aṭangin March ni 01, 2001 zan aṭanga inkhawm hrangin April ni 29, 2001-ah Preaching Station-ah hlan kai a ni a. November ni 11, 2001-ah Venghlun Kohhran aṭanga in dan fel a ni. Kan in dan tirh hian kan Biak In chu Assam type-a sak, a dung 52 ft, a vang 32 ft niin, mi 250 vel lenga lian niin, ₹ 3,00,000/- (Nuaih thum) senga sak a ni a. Kohhran kan in dan rual rualin Building Committee pawh May ni 19, 2001-ah din nghalin Chairman-ah Upa Bawiliana niin, Secretary chu Pu Ralkapthanga Sailo a ni. Building Committee chuan zawi zawiin hma a la chho hret hret a. Kan Biak In hmun, Venghlun Kohhran hminga dah pawh Chhinga Veng East Kohhran hminga dah a ni zui ta a ni.

Biak In hmasa zawk sak hnatlang hlimthla

Pathian khawngaihnain Kohhran member kan lo pung zel a, kan Biak In pawhin min dâwl zo ta lo hial a. Chuvangin, mite dâwl zo ngei tura Biak In sak ṭhat duhna kohhran mipui rilruah a lo piang a. Tichuan, Presbytery Inkhawmpuiah Biak In sak dilna thlenin Presbytery Inkhawmpuiin rem min tihsak hnuah Kohhran Committee vawi 168-na, Rorel XI-nain rem a tih angin kan Biak In hman mek chu November ni 3, 2014-ah ṭhiatin Biak In thar sak hna bul kan ṭan a. Biak In lailawk atana kan ruahmanah November ni 2, 2014 (Nilaini) zan aṭangin Biak In thar kan sak zawh hma chu kan inkhawm zui ta a ni. Biak In hluia kan inkhawm hnuhnun ber chu November ni 2, 2014 (Pathianni) zan niin Upa Ralkapthanga Sailo-in inkhawm a kaihruai a, Rev. K. Lalthangmawia, Bialtu Pastor-in Pathian thuchah a sawi.

Biak In Lungphum

Biak In thar sakna lungphum chu Chhinga Veng Pastor Bial vawngtu leh Aizawl Central Presbytery Moderator ni mek Rev. K. Lalthangmawia chuan November ni 17, 2014 zing dar 07:00-ah phumin, mi 54 velin lungphum hun hi an hmang a. Hetiang hian Biak In lungphumah ziak a ni nghe nghe.

P.C.I.

CHHINGA VENG EAST KOHHRAN

BIAK IN LUNGPHUM

PHUM NI: NI 17th Nov. 2014

ZING DAR 7:00AM

PHUMTU: Rev. K. LALTHANGMAWIA

BIALTU & MODERATOR

AIZAWL CENTRAL PRESBYTERY

Biak In thar zawk sak hnatlang

Biak In sak chhoh dan

Biak In sak hna hi Building Committee-in ngun taka ngaihtuahin structure engineer, architect leh interior designer thlengin kan phak tawkin kan rawn a. A theih chin chinah structure drawing leh architectural drawing zuiin Biak In hi Mizo pa chhiara chhawng ngaa sanga sak niin, Biak In hnuai lam chu Sunday School, Kohhran Committee room, General Committee room, Kohhran Hall, Garage, Biak In choka, tuizem lian leh Biak In enkawltute luah atana hman a ni.

Biak In sak nan hian Kohhran chuan bank pahnih MRB leh Apex Bank aṭangin loan ₹ 1,30,00,000/- (Vaibelchhe khat leh maktaduai thum) kan puk bakah, Biak In sakna pualin Kohhran in tinah building fund khawn a ni bawk. Biak In kan sak chhung hian Kohhran mi eng emaw zatin Biak In sak nan sum leh thilpek chi hrang hrang Kohhranah pein, Pu L.T. Zauva (L) te chhungkuain ₹ 1,00,000/- (Nuaih khat) leh Chhinga Veng Kohhranin ₹ 2,00,000/- (Nuaih hnih) lai kan Kohhran min pe bawk a, lawmawm kan ti hle. Biak In sak nana senso zawng zawng hi ₹ 3,13,90,469/- (Vaibelchhe thum, maktaduai khat, nuaih thum, sing kua, za li sawm ruk leh pakua) a ni.

Biak In sak chhung hian Kohhran mipuite vawi eng emaw zat hnatlangin kan thawk chhuak a, Kohhran min tipumkhatin Biak In thar sak kawngah Kohhran mipute'n ṭhahnem kan ngai tlang tak zet tih a lang bawk. Biak In sak hnatlang hi Kohhranin hnatlan ni a tuk bakah mahni remchan dan ang anga Biak In sakna lama ṭhahnem ngai taka thawk kan awm deuh reng bawk. Biak In lailawka kum 3 leh thla 11 leh ni 6 chiah kan inkhawm hnuah Biak In thar chu luah theihin kan peih fel a. December ni 13, 2017 (Nilaini) zanah Bialtu Pastor Rev. K. Lalpiangthara hovin Biak In thar hi kan luah ta a ni. Biak In thar luah zan hian Sakramen zir zo mi 25 Kohhran dân chhungah lawm luh niin mi 470 vel kan inkhawm a ni.

In dan tirha Kohhran Inchhiarna

Dan zawh kim - 453

Kohhran member zat - 706

Kohhrana in awm zat - 135

Sunday School hming ziak zat - 593

Kohhran Hmeichhia - 236

Kristian Ṭhalai Pawl - 206

Kohhran Pavalai Pawl - Nil