Chhinga Veng East Kohhrana thil thleng hmasate

• March ni 4, 2001 (Pathianni) khan Biak In tharah Sunday School hmasa ber neih a ni a, pawl siam rem leh hming ziah ni-a hman a ni. Tlai lamah Venghlun Branch KṬP (Tuna Chhinga Vengthlang ni ta) nen biak in tharah Fellowship neih a ni bawk.

• March ni 5, 2001 (Thawhṭanni) zanah Chhinga Veng East Kohhran Sunday School Committee hmasa ber Rev. Thansiama inah neih a ni.

• March ni 9, 2001 (Zirtawpni) zanah Upa Bawiliana inah KṬP din dan tur sawi ho a ni a, March ni 12, 2001 (Thawhṭanni) zanah inthlanna neih tura rel a ni a; affiliation erawh chu Preaching Station kan nih hunah Central KṬP-ah neih ni se tih a ni.

• March ni 11, 2001 (Pathianni) chawhma inkhawm banah kohhran zaipawl hla zir hmasak ber neih a ni a, ‘Ro hlu ka nei, lawmna thuruk’ tih hla zir niin Pu T. Lalriliana’n a kaihruai.

• March ni 15, 2001 (Ningani) zanah KṬP member tih fel a ni a, member 160 vel an ni.

• March ni 16, 2001 (Zirtawpni) zanah KṬP, Chhinga Veng East Branch Committee hmasa ber Kohhran Hall-ah neih a ni a, Branch kalphung tur duan a ni. Zaipawl Conductor atan Pu T. Lalriliana ruat a ni.

• March ni 28, 2001 (Nilaini) zanah KṬP te Theihai tuikhurah blanket su-a hnatlang neih a ni a, blanket hi 50 chuang suk a ni a, member 60 chuang an thawk chhuak. Hei hi blanket su-a inhlawhna kan neih hmasak ber a ni.

• March ni 29, 2001 (Ningani) zanah Kohhran Zaipawlin Good Friday-a mi tur Pu Chalchhinga inah hla an zir, hei hi mi mal ina hla zir hmasak ber a ni.

• April ni 1, 2001 (Pathianni) zanah kohhran zaipawlin a hmasa ber atan ‘Tuinung lui’ tih hla (Conference Hla Bu No. 47) an rem a, member 56 vel an ni. Conductor hi Pu T. Lalriliana a ni.

• April ni 2, 2001 (Thawhṭanni) khan biak inah hnatlang neih a ni a, biak in puanzar senduk zar a ni. Biak in puanzar hi Pi Marengi, Nl. Muanpuii leh Nl. Rovi te’n an ṭhui. Zanah KṬP member inhlan tharna neih a ni.

• April ni 4, 2001 (Nilaini) zanah Pastor Bial fan programme hman a ni a, Pro. Pastor L.H. Rawsea’n ‘Harhna kan mamawh’ tih thupui a sawi a, bial zaipawl te’n ‘Aw Jaa’ tih hla an rem. Inkhawm banah Sports Sub-Committee an ṭhu.

• April ni 8, 2001 (Pathianni) zingah 'Tum Kau Ni' kawng zawh a ni.

• April ni 12, 2001 (Ningani) zan inkhawmah Rev. Lalrampara’n Lalpa Zanriah Sakramen a ṭheh a, kohhran zaipawlin ‘Chu zan khawharah’ tih hla an rem.

• April ni 13, 2001 (Zirtawpni) Good Friday hman hmasa ber a ni a, crusade-a hman niin Speaker-ah Rev. Thansiama a ni. Chawhma inkhawmah kohhran zaipawlin ‘Huana Isua rum hre rengin’ tih hla remin Tv. C. Lalhmangaihzuala’n a kaihruai a, zan inkhawmah ‘Aw hmangaihna sawi thiam ila’ tih hla rem leh a ni a, Pu T. Lalriliana’n a kaihruai. Zaipawl member hi 60-70 inkar an ni ṭhin.

• April ni 15, 2001 (Pathianni) zing dar 04:00-ah Sunrise Service programme chu Kohhran Hall-ah hman a ni. Hruaitu Nl. Lalrinmawii, Branch Treasurer a ni a, thu sawitu Pu C. Zothansanga, Branch Finance Secretary a ni. Chawhma inkhawm (Easter Sunday)-ah ‘Khawiah pawh ni chhuahna apiangah’ tih hla kohhran zaipawlin remin Pu T. Lalriliana’n a kaihruai a, zanah ‘Pathian ropui rawh se’ tih hla remin Tv. C. Lalhmangaihzuala’n a kaihruai.

• April ni 21, 2001 (Inrinni)-ah Chhinga Veng East Branch KṬP hminga Bial Sports-a kan tel hmasak ber a ni a, High School field, Zarkawtah neih a ni a, a tawp ber dawttu kan ni.

• April ni 23, 2001 (Thawhṭanni) zanah Branch KṬP balu thiara hnatlanga inhlawhna neih a ni a, member 25 vel an thawk chhuak.

• April ni 29, 2001 (Pathianni) chawhnuah Preaching Station hawnna Bial Chiarman-in a nei a, Bialtu Pastor H. Zalawma’n thu a sawi. Mi 500 vel an inkhawm. Zan inkhawmah Bial Chairman-in thu a sawi a, Venghlun Zaipawl an zai.

• June ni 4, 2001 (Thawhṭanni) zan dar 05:30 – 06:30-ah KṬP te ‘Ruihhlo ngaite pual chaw nghei ṭawngṭai rual’ hun an hmang. Hemi zawh hian phal thil theh khawmin Variety programme hman a ni.

• July ni 8, 2001 (Pathianni) Half Yearly Meet a ni a, Zarkawt kohhranin an thleng. Tlai dar 05:30-ah zaipawlin hla an ennawn a, bus hire-in an kal, member 60 vel an ni. Pathianni zan hian zaipawl chuan ‘Van indona’ tih hla an rem.

• July ni 9, 2001 (Thawhṭanni) zan inkhawm banah ‘Bawm inleng’ hmasa ber hawnna Branch OB leh Branch Committee member te’n an nei a, ₹ 1,031/- a tla.

• July ni 30, 2001 (Thawhṭanni) zanah Chhinga Veng chhunga Branch pathum – Chhinga Veng, Venghlun, Chhinga Veng East Branch te Joint Fellowship chu Chhinga Veng kohhran biak inah neih a ni.

• August ni 26, 2001 (Pathianni)-ah Saron Biak inah Intermediate Department inkhawmpui neih a ni a, kan kohhran chu pakhatna kan ni. Chawhnuah Dawrpui biak inah a khai khawmna neih a ni a, a pum puiah pahnihna kan ni, inkhawmpui hi zan thlenga neih a ni.

• November ni 5, 2001 (Thawhṭanni) Branch Week hmasa ber (5 – 12 November, 2001) neih a ni a, ‘Thianghlimna Week’ tih a ni.

• November ni 11, 2001 (Pathianni) chawhma inkhawmah Kohhran In Dan programme hman a ni a, kohhran zaipawlin ‘Lalpa Kohhranho’ tih hla an rem a, Pu T. Lalriliana’n a kaihruai. In dantu hi Aizawl East Presbytery Moderator Upa Lalthanmawia a ni.

• December ni 17, 2001 (Thawhṭanni) zanah 2002 Branch hruaitu thlan a ni a, hemi zan hian Branch Carol Service neih a ni.

• October ni 05, 2002 (Inrinni) zan khan Aizawl East Presbytery Inkhawmpuiah Kohhran Zaipawl zaiin 'Lal Isua hming i fak ang u' tih hla Armed Veng Kohhran biak inah kan rem a, Pu T. Lalriliana'n a kaihruai.

• Kan Kohhran aṭanga Dawrpui Pastor Bial Zaipawla tel hmasa berte chu Tv. C. Lalhmangaihzuala leh Nl. Lalmuanpuii te an ni.