ВОЗДУХОПЛЇВНИ ПАНО З ВИТРИНУ У ГОЛУ ОШ И ҐИМНАЗИЇ „П. КУЗМЯК” У Р. КЕРЕСТУРЕ ЧУВА ПАМЯТКИ НА УСПИХИ КЕРЕСТУРСКИХ СЕЛЕНИТОХ И РУСНАЦОХ ВОЗДУХОПЛЇВЦОХ

У 2009. року, Медзинародним року астронимиї, 28. новембра у Голу Основней школи и Ґимназиї „Петро Кузмяк” у Руским Керестуре, з пригодну шветочносцу означени 50 роки од снованя Клуба Селенитох „П. Кузмяк”, подростку Воздухоплївного союзу Югославиї. Як тирваца памятка на успишну дзешецрочну активносц, роботу и змагательни резултати членох Селенитского клуба, школярох основней школи, у голу школи поставени Памятни воздухоплївни пано з витрину.

Музейни пано творя штири виложени воздухоплївни модели, написи о Клубе и наших пейцох найпознатших воздухоплївцох – моделарох, єдриличарох, падобрацох, моторних и воєних пилотох. У Витрини виложени змагательни трофеї, погари, значки, плакети, заставки, фотоґрафиї, модели, плани моделох, моделарски комплети, алат и рижни моделарски материял...

Шветочносц орґанизовала Астрономска секция школи зоз професором физики Евґенийом Медєшом, успишним змагательом Селенитского Клюба. З тей нагоди попри школярох и наставнїкох школи и дакедишнїх Селенитох, як госци присуствовали Мирон Жирош, наставнїк моделарства, Агнетка Костелник-Балатинац падобранєц и єдриличарка з Осєку и Владимир Новта з Н. Саду, а родом Керестурец, югославянски репрезентативец у моделаству.

А. Костелник-Балатинац, Вл. Новта, М. Жирош и Е. Медєши Присутни на шветочносци

О дзешецрочней роботи и успихох Клуба бешедовал його снователь М. Жирош. Наглашел же Клуб основани 1959. року кед заберанє вселени було у полним розмаху. Члени Клуба, перши роки їх коло сто, правели рижни лєтадла – шарканї, балони, прости и зложенши модели єдрилицох, ракети, читали технїцку пресу и змагали ше у лєценю своїх лєтадлох и теорийним знаню зоз селенитами у Войводини и Сербиї. Прецизни у вирабяню лєтацих направох, а дисциплоновани и схопни як змагателє, три роки єден за другим (1961,1962 и 1963. року) були найлєпши у Войводини, та до тирвацей власносци достали преходни погар Воздухоплївного союзу Войводини. После М. Жироша руководитель Клуба селенитох бул Ю. Колесар, наставнїк школи и Йовица Симич искусни моделар.

А. Костелник-Балатинац, Микошевчанка, єдина Рускиня падобранєц и єдриличарка, а источашно и поетеса, винєсла присутним школяром свойо искуства и интересантни дожица зоз звладованя нєба и лєценя, алє и вискакованя з авионох, командованя з падобранами и посцигованя змагательних резултатох.

А. Костелник-Балатинац, падобранєц В. Новта пояшнтє лєценє радио командованого

и єдрилчарка модела

В. Новта, Керестурец, машински инжинєр, приповедал присутним о своїх змагательних успихох як югославянски репрезентативец, о конструованю и правеню вецей як сто своїх моделох и демонстровал, правда у голу школи лєценє радиокомандованого моделу на електрични погон.

Памятни (музейни) воздухоплївни пано з витрину, котри як шведок успихох воздухоплївней секциї школи (Клуба селенитох и Клуба младих технїчарох) облапя дарунок три модели В. Новти: Радио контролну єдрилицу А2, NV – 878, два модели «Пендрач» NV – 109 и NV – 110 и макету авина «Ґовля», дарунок Е. Колошняя, а простор зоз лївого и правого боку Витрини написи о руских воздухоплївцох:

1. Владимирови Новти, моделар, член державней репрезентациї

2. Звонкови Костелникови, наставнїк падобранства, єдриличарства и моторного пилотованя

3. Владимирови Будински, пилот воєного ваздухоплївства

4. Агнетки Костелник, єдриличарка и падобранєц

5. Славомирови Тиркайли, моторни пилот Шарканьох

Памятни воздухоплївни пано з витрину

У Витрини змесцени два погари: Погар Возд. Союзу Войводини за трираз єдно за другим завжате перше место у Войводини и Погар ВСВ найлєпшей Селенитскей екипи на Покраїнским злєту Войводини у Ченею 1965. року, моделарски медалї, плакети, значки и заставки Вл. Новти, модели, фуркадла, плани моделох, модели «Шлїзкач», «Колибри», «Кумулус», «Циррус», балони, шаркань «Донґов», мотор Аеро 250, ракети, ракетни мотор, командни ручки, сайли, кнїжки, плани, фотоґрафиї, скалпери и моделарски материял, дарунок М. Жироша, наставнїка воздухоплївного моделарства.

Воздухоплївни пано з витрину у голу ОШ и Ґимназиї „П. Кузмяк” у Р. Керестуре чува памятки на успихи керестурских селенитох и Руснацох воздухоплївцох. Вон представя мали музей, а виложени биоґрафиї воздухоплївцох, модели и експонати у витрини, вериме, же представяю очигладни приклад будуцим ґенерацийом на нови досяги у технїцким образованю и спортским воздухоплївству.