РУСКЕ ВИКЛАДНЕ ВИДАВНЇЦТВО У ВИРТУАЛНИМ ШВЕЦЕ

- „Шветлосц“ часопис за литературу, културу и дружтвени питаня, шицки його числа за 2001, 2002, 2003, 2004 и 2005. рок виложени на Интернету (на сайту мр Славомира Олеяра - Руски интернет радио РДСА) и можу иx читац шицки жителє швета -

Интернет насущна потреба сучасного чловека. Зявел ше нєсподзивано, як найшвидше порученє у войованю и ратованю, ошвитнул як жридло информацийоx доступни каждому, удомел ше у имаґинарним швеце и як розсаднїк шветового знаня отворел ґу каждому жительови планети жеми. Отворени є же би привитал нащивителя - повед новосци, представел знанє и мудросц швета. И нє лєм то! Алє дал можлївосц каждому же би и сам поведол цо зна, спознал думаня другиx о своїм знаню, та и сам вецей научел и знал.

Интернет на тот способ постал найсучаснєйша информативна и образовна институция котра, на свой способ, облапя у себе потерашнї образовни и културни институциї. Интернет превжал информативну и едукативну функцию, а дїлує як текст, глас и жива слика. Вон пребера на себе шицко створене и дарує го свойому xасновательови. Вон театер, библиотека, ґалерия, музей, филмотека, видеотека, наукова лаборатория, проєктна гала, вон ґеоґрафия швета, история... З єдним словом - Интернет цивилизация у шицкиx формоx свойого манифестованя. Єй богатство чловек ма пред собу у каждей xвильки кед ю пожада.

Швет Интернета нєма гранїци. Ма лєм пенєжни огранїченя. Xто може заплациц „дзвиганє дручка“ увидзи и тото цо ма окремну цену, алє и без „дзвиганя дручка“ швет интернета таки вельки, богати и прекрасни же го чловек нє може звладац, поопатрац и пречитац у своїм живоце. Пре вельку рижнородносц обласцоx и темоx, кажда особа ма можлївосц на интернету пренайсц тото цо ю интересує. Треба лєм знац тото пренайсц, пречитац, поопатрац...

Нове препреченє язик. Интернет и ту найрадикалнєйши - його боки написани на шицкиxязикоx швета. Кажде може виложиц свойо искуство, знанє, мудросц и глупосци на язику котрим сце. Правда, нєшка найвецей тексти виложени на анґлийским язику, алє вше єст вецей боки на росийским, нємецким, українским, шпаньолским, та и на нашим руским.

Наш руски швет и ми зоз свою културурну творчосцу представени на вецей сайтоx (бокоx) з вецей представнїками. Свойо боки на интернету маю поєдинци и институциї - школи, културни дружтва, видавательни установи... Вони на своїx бокоx „указую швету“ Руснацоx и нашу творчу и креативну дїялносц, углавним у обласци националного и културного дїлованя. Представяю швету нас як националносц, нашо досяги у образованю, видавнїцтве, манифестацийней култури, информативней дїялносци и вєдно з ню и прейґ нєй нащивитель бока на интернету дознава цо ше збува медзи Руснацами по местоx у Войводини, медзи Русинами у Словацкей, Польскей, України, Мадярскей, Горватскей, медзи другима народами и так далєй.

Медзи 15-20 нашима презентациями на интернету, по концепциї, змисту и фундаменталносци видвоюю ше два.. То сайт Гавриїла Колєсара, новинара, котри жиє у Киченеру и мр Славомира Олеяра, котри жиє у Торонту. Обидвоме уж вецей роки жию у Канади.

Г. Колєсаров сайт, уствари перше сайт-презентация РДСА (Руского Дружтва Сиверней Америки), а после прероснул до обще руского сайту „Руснацоx у Панониї“ зоз широку лепезу информацийоx з националного и културного живота Бачванско-сримскиx Руснацоx (Руснацоxу Панониї). Ключна тема сайта „Як зме ше отримали?“ (под тим насловом превжата-пренєшена єдна часц II тома кнїжки М. Жироша „Бачванско-сримски Руснаци дома и у швеце 1745-1991), а велї прилоги другиx автороx зоз своїма змистами спатраю, обгрунтовюю, анализую и ошветлюю тот „русински бачвански феномен славянского швета“, як го наволал академик Иштван Удвари з Мадярскей. Ґу тей централней теми, надовязую ше и други презентациї з прешлосци и терашньосци намагаюци ше цо комплекснейше представиц Руснацоx и иx досяги у националним и културним розвою и живоце. Сайт тиж и информатор з найзначнєйшиx подїйоx з културного живота Руснацоx дома и у швеце. Вон свойофайтове викладне (викладаюце) видавнїцтво. Виложени на нїм прилоги велїx рускиx автороx- писательоx, публицистоx, науковцоx, новинароx... Прилоги на нїм „пооблєкани“ з народнима вишивками, малюнками, фотоґрафиями. Водзаци є по чишлє нащивительоx. По стредок юния 2005. року мал вецей як 30.000 нащиви.

- Панє Колєсар, Ваш сайт тримаюци ше ключней теми, часто и барз приємно зна нєсподзивац своїx нащивительоx. Таки витвореня „Свадзба у Рацовиx 1943. року“, новини „Руснаци у швеце“, Спортски портрет Желька Колєсара, нови кнїжки Дружтва за руски язик. Яки нас нєсподзиваня очекую нєодлуга?

- Можлївосци интернета барз широки, а скоро сом сиґурни же и квалитет и способи презентациї шицких можлївих информацийох з дня на дзень буду вше богатши. Хто тото похопел або голєм похопи у доглядним чаше - годзен тримац крочай зоз шветом на тим планє. Понеже я, за розлику од пана Олеяра, наприклад, унапрямени на хаснованє досц огранїчених ресурсох на даєдних комерциялних серверох вец ґу тому мушим прилагодзовац и структуру информацийох хтори кладзем на интернет. Видео и аудио файли маю досц вельки капацтети и нєдзечнє их хаснуєм, голєм затераз - як новинар по вокациї предносц давам текстом и фотоґрафийом та визуализациї каждого веб-боку. Нє мам даяки прецизни план евентуалних нових витвореньох хтори би були якеш нєсподзиванє за нащивительох. Нє мам таки план уж и прето же робота на кладзеню рижних змистох на интернет то цалком волунтирска активносц, ствар шлєбодного часу. Живот приноши ситуациї або обовязки хтори “розґрабу” тот шлєбодни час, або порядна робота дзекеди баржей анґажує чловека, и вец нєт часу за полнєнє веб-бокох. .Ґу тому, шицки жридла о Руснацох, наприклад, у Войводини, а нам ту на америцким континенту исти досц чежко доступни. Насампредз пре очежане сотруднїцтво на тим планє, пре нєфлексибилносц односно пре нєрозуменє одвичательних людзох хтори нє похопюю же нє крачаю зоз часом, односно же нє розумя сущносц нового медия хтори ше “на тацни” понука шицким, та и Руснацом. Сцем повесц же тоти особи од хторих завиши чи информациї о нашим существе буду реализовани чи останю дзешка у фийовкох, у маґазинох, на гард-дискох итд. єдноставно нє похопюю же ше им понука медий хтори може буц - ШИЦКО: и филм, и звук, и малюнок, и текст, и фотоґрафия у єдним. То таке як кед би вам понукали же бисце витворйовали и публиковали маґазин на нєогранїчним чишлє бокох, у колору, на чиїх бокох мож положи шицко кус скорей начишлєне, а ви то одбиєце и задоволїце ше зоз, поведзме, класичну новину зоз чарнобилима боками и, евентулно, зоз першим и остатнїм бокому у даяких вибляднутих фарбох. То даєдни з обєктивних причинох пре хтори нє можем наявйовац даяки нєсподзиваня. Медзитим, їх напевно будзе бо интернет инспиративни медий у каждим поглядзе.

- Попри евидентованого числа нащивительоx сайту, чи маце и други файти контактох з нащивителями? Почали сце обявйовац тексти и по английски чи маце повратни информациї од нащивительоx як вони, наприклад, видза Руснацоx?

- Повторел бим свою тезу од скорей же интернет, як феномен и виртуални медий, зоз самей основи/идеї поставени як барз демократичне средство информованя - на нїм можу обявйовац информациї шицки, хто лєм сце и зна, алє нєт нїякого инструмента примушованя. Значи, я як нащивитель опатрам и читам тото цо я сцем, кед же то дацо нєинтересантне, нєхасновите, я ше на тот веб-бок нїґда вецей нє врацим. Значи, число нащивительох директнопропорцийно вязане за змсти и їх способ презентованя. Маце веб-сайти хтори маю милионску нащиву прето же понукаю дацо барз интересантне, цо други нє знаю и нє можу понукнуц. Єдноставна формула. Мам досц часто контакти зоз нащивтелями мойого вебсайту - од таких цо ше питаю же як ше пише слово “sugar” (цукер) по руски, єст тих цо питаю помоц бо глєдаю своїх предкох Русинох цо ше селєли зоз Европи до Америки, єст тих цо глєдаю родзину у Шидзе, Коцуре, Беркасове...

Понеже наш руски язик, войводянски руски язик, хаснує барз мале число людзох, я од давна почувствовал же вредни, драгоцини информациї о нашей култури, о наших досягох треба же би були презентовани и з помоцу даякого ‘векшого’ шветового язика. Опредзелєл сом ше за анґлийски и думам же ту треба ище вельо робиц и зробиц. Бо, аж прейґ того язика о нас, Руснацох з Войводини, людзе з цалого швета годни дознац велї факти. Можем повесц же уж и тоти тексти на анґлийским цо су потераз положени на интернет виволовали барз позитивни редакциї и любпитлївосц при єдней часци нащивительох хтори бешедую або розумя лєм анґлийски язик.

Сайт мр Славимира Олеяра по своїм змисту и концепциї свеобуxватнєйши од другиx нашиxпрезентацийоx на интернету. Вон по способе презентованя (викладаня) прилогоx окрем писаного слова xаснує глас и живу слику. То источашнє и аудио и видео сайт, бо з його нащиву можеме слуxац нашо шпиванки и музику, та и патриц телевизийни прилоги и филми котри ма у своєй бази податкоx.

У рамикоx тей концепциї сайт и читальна, библиотека, ґалерия, фонотека и фототека. Виложени и тексти зоз шветовиx енциклопедийоx, ”Метрики” и тексти еминентниx фаxовцоxз русинистики. Кед слово о презентациї Руснацоx - представени вецей вистави русинскиx/рускиx маляроx, руски и украяїнски шпиванки, вецей радио и телевизийни документарни прилоги и филми, а представени и вецей комплетни кнїжки и менши цалосци зоз кнїжкоx вецей рускиx автороx.

Обща „идея и концепция бока“ спознац коренї Русиноx (дакедишнїx жительоx Києвскей Руси), їx значенє и историйну судьбу у прешлосци, спатриц иx терашнї статус, место, улогу и културни и национални досяги у европскиx державоx, а окреме досяги Русиноx/Руснацоx з Войводини и представиц иx културному швету.

Сайт Сл. Олеяра два роки бул Интернетска радио станїца на руским язику з бешеднима и музичнима емисиями. Емисиї ше пририxтовали кажди тидзень, а слуxац ше могли кажди дзень 24 годзини. Интернетски радио бул пририxтани реемитовац найквалитетнєйши руски емисиї Радио Н. Саду и Радио Прешова. Вон то єден час и робел, алє пре очежани теxнїцки можлївосци и очежане доставанє емисойоx зоз Словацкей и Югославиї, єден час престал емитовац бешедни емисиї. Тиж так, з часу на час, як иx доставал з Телевизиї Н. Сад, бул у можлївосци емитовац и телевизийни прилоги, односно телевизни емисиї. Нєшка, углавним емитує музични емисиї, односно руску народну, забавну и новокомпоновану музику и нови витвореня з музичней продукциї.

У 2005. року сайт мр Славомира Олеяра представел швету „Шветлосц“ часопис за литературу, културу и уметносц. Виложени и мож пречитац шицки числа и прилоги за 2001., 2002., 2003., 2004. и 2005. рок спрам виxодзеня. То найкомплекснєйша презентация нашей рускей периодики зоз литератури, култури и уметносци. На тот способ, попри часточного представяня „Руского слова“, „Дзвоноx“ и „Новей думки“ - нащивителє сайта маю можлївосци спатриц нашу чечуцу творчосц и досяги у литератури, култури и уметносци. Розумлїве, зоз пречитаниx змистоx у часопису „Шветлосц“.

По моїм прешвеченю нєт обаваня же „виxодзенє“ Шветлосци у виртуалним швеце зменшша число предплатнїкоx. Интернет ище нє „жиє“ при Руснацоx у таким обсягу же би угрожел видаванє часописа. Голєм число xасновательоx интернету и емаил адреси обявени на рускиxсайтоx то нє потвердзую. Вельо векши xасен од його презентованя славянскому швету, бо на тот способ доступни є и тим цо анї нє знаю же вон жиє. А його змист служи на чесц видавательней xижи „Руске слово“.

- Панє Олеяр, яки новосци очекую нащивительоx Вашого сайту? Маюци у оглядзе теxнїцки унапредзеня у преношеню аудио и видео „сиґнала“ чи реално очековац квалитетнєйше доставанє тона и слики и зоз Вашого сайта?

- Технїка на Интернету наисце напредовала у остатнїх пейц рокох од кеди почал сайт Руского Интернет Радия. Нажаль, квалитет слики и тону нє завиши од сервера алє од технїки такволаного локалного ”Интернет провайдера” (Internet Provider) на хтори прикапчани нащивителє сайту. Кед же ”провайдер” обезпечує ”даял ап” (dial up) вязу, вец мож обчековац претаргованя у приєму тона, застайкованя слики итд. Кабловска и так волана ДСЛ (DSL = Digital Subscriber Line) вяза вельо лєпши и приєм квалитетнєйши. Розуми ше же квалитет завиши и од ориґиналного знїмку. Кед же то копия з копиї, и квалитет знїмку будзе нїзши.

- Яки Вашо плани у наиxодзацим чаше? Чи вецей кнїжки, чи шпиванки, чи малюнки? Маце вельке число сотруднїкоx? Понеже капацитет Вашого сайту практично нєогранїчени сцеме дознац у котрим напряме иду Вашо усиловносци, цо будзе тот нови квалитет и кеди ше вон зяви на сайту?

- Вельо жаданя а мало часу то найкратши опис терашнєй ситуациї. Плани за будучнсц ше рушаю у рамикоx яки поставени зоз аудио - визуалнима можлївосцами на Интернету, значи циль положиц цо вецей руски народни шпиванки, ТВ емисиї, он-лайн кнїжки, периодику и представиц цо лєпше наших малярох. Ище вше єст технїчни проблеми и формални препреченя там дзе жридла материялох, значи у Радио Н. Садзе и ТВ Нови Сад, одкаль лєм цо нєможлїве достац знїмки емисийох. Ситуация така же з єдного боку у Канади маме тунї приступ ґу Итернету, добри сервери, нєогранїчени капацитет мемориї, а з другого боку у СЧГ маме богато материялу хтори треба же би бул доступни шицким хторих интересую Руснаци. Треба лєм повязац тоти два вигоднисци и положиц их до функциї представяня Руснацох пред шветом и пред самима собу, на обще добро.

Сотруднїки за тераз указали векше розуменє часу и вигодносцох хтори нам як розшатому народу интернет технолоґия дава, од розуменя людзох хтори би мали буц одвичательни за наш национални ”имидж”.

- Винєшце нам свою визию Интернета?

- Интернет як средство масовней комуникациї змоцнює чувство же зме шицки жителє ”ґлобалного валалу”. Зоз фази ”свойого представяня и упознаваня сушедох” тераз прераста до фази финансийней комуникациї. Веб-сайти поєдинцох, ґрупох, институцийох и державох постали уж узвичаєни, а писма, телеґрами и телефакси заменєни з е-мейлом. Телефони и видео-телефони тиж пре вигоднєйшу цену вше баржей присутни на Интернету.

По моїм думаню, главни напрям у хторим ше Интернет будзе розвивац то його комерциялизация. Уж помали престава буц бависко, а вше баржей постава алат нєобходни за роботу. Банкарски услуги (на пр. приманє плаци, плаценє рахункох, посиланє пенєжу), финансийни услуги (на пр. купованє и предай вредносних паперох, осиґураня) и комерциялни услуги (на пр. оглашки, купованє и предаванє маєткоx) лєм приклади дзе Интернет постава нєзаменлїви алат.

На питанє же чи у тим тренду єст дачого хасновитого за Руснацох, можем повесц з вельким прешвеченьом же - гей. Верим же нєодлуга увидзиме веб-сайти наших майстрох на хторих ше годно презнац о їх услугох и купиц дацо од їх продуктох. Їх приклад нєодлуга буду шлїдзиц и землєдїлци. Кед же дахто дума же шмишне лєбо нєможлїве предац наприклад квашену капусту прейґ интернета, най нащиви китайски лєбо америцки сайти...

У тим 2005. року Интернет означує свой петнасти родзени дзень. Петнасти родзени дзень як воскреснул виртуални швет за жительоx планети жеми и як постал „власносц“ шицкиxжительоx швета. Xто ма компютер, може мац и интернет и може „войсц, пойсц и сцигнуц“ на шицки його адреси и дознац шицко тото цо на нїм єст. А єст тельо шицкого и за каждого же нєобxодни вельо длугши животни вик як цо го чловек нєшка жиє же би спознал и мал xасен од того цо го интересує.

Интернет, каждим дньом почина буц власносц вше векшого числа жительоx швета. „У швеце го уж xаснує коло милиярда людзоx (938.710.929 на дзень 23 юлия 2005. року). То значи же у просеку 14,6 одсто шветовей популациї „онлайн“. Найвекши процентxасновательоx маю ЗАД, дацо вецей як 200 милиони, односно 68,5 одсто популациї. Шлїдзи Китай зоз 100 милионами xасновательоx, алє лєм 7,9 одсто „онлайн“ гражданоx. Интересантне же Сербия и Чарна Гора (уключуюци и Косово) ма исти процент гражданоx на интернету як и Китай, док у числоx то коло 850.000. Дацо менєй од 40 одсто Европляноx на интернету, алє векшина ше наxодзи у европскей униї“ - шицки податки вжати зоз InternetWorld Stats sajta.

Кельо маю компютери Руснаци и кельо xасную интернет за здобуванє свойого знаня и задовольованя особного интересованя чежко нєшка повесц. Оxрабрує факт же єст вше вецей нашо руски сайти (боки), же и наша културна и наукова дїялносц презентована шветовей явносци. Тримам же уж час же би ше и у руским стредку у Войводини створел єдинствени руски сайт, котри би xасновал иснуюци творчи потенцияли младиx ентузиастоx, та аж и професионалцоx, а xасновал би иснуюци жридла - кнїжки, тексти з новиноx и часописоx, аудио и видео прилоги новинароx шицкиx медийоx на нашим язику. На тот способ, без обаваня, о страценим тиражу и предплатнїкоx - вецей би зме дома и у швеце знали о себе, своїx досягоxу шицкиx обласцоx живота и вецей би зме знали почитовац власни вредносци.

РУСКИ САЙТИ-БОКИ НА ИНТЕРНЕТУ

Руске дружтво Сиверней Америки - http://rdsa.tripod.com/

Руски интернет радио РДСА -http://www.rusyn-radio.dns2go.com/

Руснаци у швеце - http://www32.brinkster.com/rusmagazin/

Руснаци на интернету http://www.rusnaci.org/

Союз Русиноx и Українцоx Горватскей http://www.sriu.hr/

Руска матка Сербиї и Чарней Гори http://www.ruskamatka.tk/

РУСНАК http://rusnak.netfirms.com/

Основна школа и Ґимназия „Петро Кузмяк“ Р. Керестур http://www.petrokuzmjak.edu.yu/

Руснаци у Суботици http://tina.tippnet.co.yu/%7Eruski/

КУД „Тарас Шевченко“, Дюрдьов http://www.matka.tk/

„Руснак“ Дружтво Русина у Републици Xрватскоj http://www.rusnak.hr/

Руски Керестур http://www.ruskikerestur.com/

Дюрдьов http://perso.wanadoo.fr/cv-silverter/djurdjevo/

Петровци http://www.petrovci.com/

оцур дакеди и нєшка http://solair.eunet.yu/%7EMEDJESIA/

НВУ „Руске слово“ Н. Сад http://www.ruskeslovo.tk/

Културно-политични часопис за младиx „Мак“ http://novimak.tripod.com/

Радио Нови Сад, руска редакция http://www.radionovisad.co.yu/RuHP.htm

Литература:

Г. Колєсар: Руске дружтво Сиверней Америки на Интернету, Гласнїк РДСА, рок III, число 3 (7), Киченер, ОН, Канада, децембер 1998, боки 4-5.

Г. Колєсар: Наш WEB SITE на Интернету добре нащивешни, Гласнїк РДСА, рок IV, число 1 (8), Киченер, ОН, Канада, марец 1999, бок 8.

Г. Колєсар: „Руски фийовки“ у виртулним просторе, Руски календар 2000, НВУ „Руске слово“ 1999, боки 121-126.

Руски видео-клипи на интернету, Гласнїк РДСА, рок V, число 1 (11), Киченер, ОН Канада, април 2000, боки 7-8.

Руска Интернет радио и ТВ станїца, Гласнїк РДСА, рок V, число 2 (12), Киченер, ОН Канада, юний 2000, бок 8.

М. Жирош: Мудросц швета на Интернету, Руски календар 2001, НВУ „Руске слово“ 2000, боки 143-147.

В. Тимко: Руснаци на Интернету, Нова думка, число 114 (4/2000), боки 44-45).

Дю. Семан: Радио РДСА, „Дзвони“, 2001,число 2, (86), бок 21.

.М. Жирош, Сл. Олеяр: Шицки людзе шицко знаю - муросц швета на интернету, Гласнїк РДСА, рок V, число 1 (14), Киченер, ОН Канада, април 2001, боки 5-6.

Сл. Олеяр: Кед нє верице - послуxайце, (Будучносц радия на Интернету), Гласнїк РДСА, рокVI, число 3 (16), Киченер, ОН, Канада, децембер 2001, боки 14-15.

М. Жирош: Єден рок руского радия на интернету, радия РДСА

Г. Колєсар: Новши руски ВЕБ сайти, Руснаци у швеце, Киченер, Канада, рок I, число 1 Септембер-Децембер, 2002, боки 25-26.

Сл. Олеяр: Интернет нє(етика), Руски календар 2003, НВУ „Руске слово“ 2002, боки 168-172.

М. Жирош: Витворени значни можлївосци информованя Руснацоx у цалим швеце, Думки з Дунаю 5, Вуковар 2002, боки 187-188.

Сл. Олеяр: Руски Интернет радио, Руснаци у швеце, Киченер, Канада, рок II, число 2 Май - Авґуст, 2003, боки -29-30.

Г. Колєсар: Новши руски ВЕБ сайти, Руснаци у швеце, Киченер, Канада, рок II, число 3, Септембер-Децембер, 2003, бок 30.

Дю. Пап: Интернет як сучасни дутян, Руске слово, число 42 (3079), Нови Сад 15. октобер 2004. року, бок 6.

З. Станоjевић: 15 година Интернета, „Време“ од 09. 09 2005. године.