МУЗЕЙ У КОПАШНЕВЕ – ЖИВИ ПАМЯТНЇК ЛИТЕРАТУРНИМ, ФОЛКЛОРНИМ И МИСТЕЦКИМ ТВОРИТЕЛЬОМ

Крайови музей литератури, фолклору, та мистецтва у велькей учальнї будинку стреднєй школи у Копашневу Хустким району Закарпатскей обласци України, представя оживотворенє мрийох дакедишнього наймладшого двацецпейц рочного директора тей школи у Закарпатскей обласци України, залюбеного до свойого родимого краю, литератури, народного живота и його фолклорней и рижней другей уметнїцкей творчосци. Задумал го, витворел и створел 2005. року з помоцу Управи школи и ґрафичного дизайнера Семена Мельнїка Иван Хланта, доктор мистецтвознавства, кандидат филолоґийних наукох и заслужени дїяч мистецтва України.

Музей уникатне витворенє, своєфайтови живи памятнїк уметнїцким творительом – писательом, маляром, резбаром, сликeром-фотоґрафом, вишивачком, писанкарком, народним литературним творительом и їх дїлом – записаних, видекламованих и одшпиваних церковних и народних писньох и колядох, та виприповеданих леґендох, приповедкох, присловкох, загадкох, записаних мелодийох и шицкого цо людски творительни дух кадри створиц.

Др И. Хланта пояшнює нащивительом змисел и улогу музея

Иван Хланта народзени 20. априла 1941. року у валалє Копашнево Хустким району на Закарпатю. Закончел Филолоґийни факултет Ужгородского державного универзитету (1964) и аспирантуру на Институту мистецтвознанства, фолклору и етноґрафиї М. Т. Рильского Академиї науки України у Києву 1974. року. Робел як професор, директор школи, инспектор, доцент катедри українскей литератури на Ужгородским универзитету. Од 2001. року бул руководитель наукового културологийного оддзелєня Закарпатского обласного центру народней творчосци.

Наукову дїялносц витворює у вецей напрямох, як фолклорист, литературознавец, библиограф, етнограф и мистецтвознавец. Написал, редаґовал и обявел вецей як 80 кнїжки. Медзи нїма и фундаментални виданя як «Писня над Карпатами» (1994), «Закарпатски вертеп» (1995), «Литературне Закарпаття у ХХ столїтию» (1995), «Ой видно село» (2003), «Писнї Їршавщини» (2005), «Спивайте Богови нашому, спивайте» (2008), «Народни писнї Українцив у Банату (Румуния)» (2009) и други.

Др Иван Хланта у 2009. року вецей як єден мешац пребувал и записовал руски шпиванки у руских валалох Войводини. Пред обявйованьом му кнїжка «Руски шпиванки Русинох у Войводини (Сербия)»

М. Жирош, И. Хланта и О. Гаврош у Ужгороду 2009. року. Др И. Хланта и О. Гаврош, новинар пребували медзи Русинами у Сербиї 2008. и 2009. року. Обидвоме пририхтую кнїжки зоз своїх обласцох о пребуваню медзи нами

Як зме уж спомли, др И. Хланта инициятор и орґанизатор Крайового музею литератури, фолклору и мистецтва у Копашневу, своїм родним валалє.

За свою творчу и обсяжну наукову роботу И. Хланта, доктор мистецтвознавства наградзени з орденом Преподобного Нестора Лїтописца (2009), велїма медалями, почеснима грамотами и другима припознанями. Його мено уписане и до Почесней кнїжки-алманаху »Златни фонд Бойковщини».

*

У музею сом ше «стренул» зоз своїма живима и уж преселянима до вичносци приятелями и їх творами - литарурнима дїлами. Споминам: Ивана Чендея, Степана Папа, Василя Пагирю, Олексу Мишанича, Ивана Гланту, Олену Рудловчак, Ивана Петровция, Юрия Чорея, Павла Чучку, младшого... Нє можлїве шицких начищлїц, бо лєм писательох од кеди ше памета єст вецей як сто особи котри народзени у Закарпатю.

Музей, уствари, пошвецени им и їх дїлу, творчим дїлом. Будземе розумнєйши. При мурох и у стредку учальнї у окреме здуманих витринох по реонох Закарпаття виложени фотоґрафиї, крадки биоґрафиї и шицки видати кнїжки каждого писателя понаособ и у окремней фасцикли за каждого автора попри його часци витрини виложена позберана документация, котру нащивителє можу препатрац...

Фотоґрафиї з подїйох у вязи зоз Музейом

Виложена фото документация о подїйох у Музею, отриманих промоцийох нових авторских витвореньох, стретнуцох зоз писателями знагоди пригодних ювилейох, явних литературних годзинох з присутнима писателями.

Виложена подобова творчосц

Виложени:

· Мапа з районами Закарпатя, з фотоґрафиями писательох членох Здруяеня писательох України

· Малярски малюнки писательох, даровани музею,

· Вишивани образи, блузни, салвети, ручнїки...

· Макети ґаздовских будинкох, орудийох при обрабяню жеми и лугох, макета воденїци...

· Орудия при обрабяню конопи – снованїца, кросна, церлїца, шпуляр...

Ручни млїн, сновальнїца и вишивани образи

Простория уж преполна зоз експонатами и вимага свойо преширенє до нових учальньох, нє лєм пре чечуцу авторску творчосц, алє и пре збогацованє зоз давнєйшима виданями. Предвидзене збогацованє Музея и зоз писателями чийо предки походза зоз Закарпаття, а то значи же ше очекує сотруднїцтво и зоз нашима музеями и етно збирками зоз Р. Керестура, Коцура, Дюрдьова, Шиду, Петровцох...

*

Источашнє ше поставя питанє покля ми сцигли у чуваню памяткох на наших културних дїячох: литератох, науковцох, публицистох, фолклористох и рижних мистецких творительох?

Нє можеме ше з резултатами своєй роботи похвалїц. Требали би зме попонагляц, бо ше мамє зоз чим хвалїц и представиц свою творчосц културному швету. И ми маме вецей дзешатки писательох, вецей фолклористох, значних етно музиколоґох, композиторох та и значних мистецких творительох – малярох, скулпторох, иконописцох, макетарох, столарох-вирабячох образох на склу и польодїлних орудийох, вишивачки, писанкарки...

Др Иван Хланта, кандидат филолоґийних наукох и заслужени дїяч мистецтва України пред витрину зоз своїма 82-ма кнїжками

Крайови музей литератури, форклору и мистецтва у Копашневу, у Хуским району Закарпатскей обласци України, давен-давного завичаю и наших предкох, представя красни приклад чуваня и почитованя вкупней творчосци своїх предкох и сучашнїкох. То нє лєм памятнїк-скарбнїца духовней и материялней творчосци своїх краянох алє и школа-наук за каждого нащивителя, школярох школи у котрей є змесцени, та и вельочислени школярски екскурзиї зоз Закарпаття.

Музей зоз своїма експонатами, виложенима дїлами, понука нащивительох же би закукли до написаних кнїжкох, пречитали и спознали з нїх живот, прешлосц и преокупациї своїх културних дїячох. То им оможлївене зробиц у Школскей библиотеки и читальнї, бо кажда виложена кнїжка у витринох, зоз свою сиґнатуру, олєгчує заинтересованим вжац кнїжки на читанє, а даєдни и купиц у околних городских кнїжкарньох.

(Руски християнски календар 2011, „Руске слово” – „Дзвони”, Нови Сад – Руски Керестур 2010, боки 143-146)