КОЦУРСКИ ЕТНО КЛУБ – ЖВЕРАТКО ПРАВДИВОГО НАРОДНОГО ЖИВОТА

Етно клуб «Одняте од забуца» уж вецей роки «жиє» у Коцуре, алє ше о його раритетох як и правдивого валалского живота – мало зна. Прецо то так, до того нє будземе уходзиц. Значне же, информациї о його иснованю, опредзелєли ме поглєдац тот куцик рускей старини и на щесце, трафел сом на пана Дюру Макая и шицко дознал з «першей руки». Нє лєм дознал, алє вельо и видзел и прешвечел ше же у Коцуре назберане и зачуване найдрагоценше благо з нашей прешлосци. И же є «одняте од забуца» и же стої як указ-наук шицким котри ше жадаю углїбиц до давного и давен-давного руского материялного и духовного живота.

Млода, млоди, лада... Млада мац зоз свою дзивочку

Коцур бул, а и нєшка є валлал живота и соживота трох народох. У чаше насельованя у нїм жили Серби и Руснаци. Нєзнаюци точно кеди, а и одкадз, нєодлуга по присельованю Руснацох у валалє ше зявели Мадяре (римокатолїки), алє рускей бешеди. После виселєних Сербох приселєли Нємци и жили у Коцуре коло 150 роки. Нємци виселюю з валалу при концу Другей шветовей войни, а о два роки, 1946. року до валалу приселюю Серби зоз Босней. Значи, у Коцуре Руснаци домашнї, а народни живот рижнородни зоз своїма окремносцами у материялней и духовней култури. Прето тот Етно клуб и зоз своїма експонатами и зоз представеним народним животом и зоз свою терашню живу активносцу, а и пре свою зарисовану концепцию, представя цошка надзвичайне и драгоцине. Вон нє лєм же обєдинєл назберани материялни и духовни скарб трох, односно штирох народох – Руснацох, Мадярох, Нємцох (правда найменєй) и Сербох, алє прейґ виложених експонатох указує на зложни живот, материялне и духовне подпомаганє жительох медзи собу, змаганя у напредованю и културним живоце. То потвердзую виложени експонати: орудия, облєчиво, судзина, фотоґрафиї, вишивки...

Крамбльовани и подковани древянки. Ткачка, кросна, мотовидло...

У Етно клубе уж змесцени вецей як тисяч експонати, а велька часц ище нє виложена за нащивительох. Правда, Музей ище нє тото цо би мал буц. Шицки назберани предмети треба «обробиц», описац, призначиц им походзенє, час наставаня... То робота котра шлїдзи, и верим, же з помоцу нашого Завода за културу будзе нєодлуга поробена.

Тото цо на перши попатрунок «пада до оч» то богатство очуваних експонатох: «розкош» преднєй хижи маєтнейшей рускей фамилиї, богата дзивоцка лада (креденц), прекрашнє пооблєкана млода и млоди и розкошно пооблєкана свашка. Ту и младучка мац з єдну ногу на кудзелї, запатрена на колїску и свою дзивичку, котрей од першого дня малженства пририхтує «ладу».

Уж сам уход до Клубу нагадує биду и худобство. При уходних дзверох, алє нє правдивей валалскей селянскей хижи, алє будинку старей парохиї або дзияковнї, дзе змесцена Музей – виложена оброснута зоз лїшаями крамбльована древянка. Найскорей же є од давна одруцена, алє як експонат, ту указує на «патину» селянского живота, алє нє и на розкош, алє правдиви живот, та аж и худобство. Ґу такому спознаню придружую ше и други животни експонати – крамбльовани и подковани древянки. Знал сом же ковалє зоз желєза ковали подкови и подковйовали конї. Зоз тей нащиви Етно клубу сом дознал же коцурски ципеларе прибивали подкови и на древянки, а тиж же у Коцуре було и подковани крави, бо медзи експонатами и кравска подкова. Нєсподзивал сом ше и кед сом видзел склєняни мухаловки, гоч сом их першираз видзел у Мадярскей, у дакедишньму рускому Мученю, а найбаржей сом ше возбудзел кед сом опатрал вельку фотоґрафию Аеро клуба «Наша крила» основаного у Коцуре 1928. року, о чиєй активносци сом нє могол нїч дознац.

Пан Дюра Макаї, предсидатель Етно клуба зоз правдивим руским раритетом

Видзел сом ище велї вредни експонати – уникатни вишивки, драгоцини и барз давни млодов венєц, столарску машину за муценє масла, древени жохтар, єден найстарши огньогасни циварвань, парадни коч, мертвени коч, вецей плуги, та и барз плїтки витрошени од копаня мотики. Мотики, цо з нїма копали нє лєм оцове, алє и дїдове, та и їх унуки. Ту лєм цо нє комплетни направи за обрабянє конопи, ствари зоз коморки, столчок и машина за лупанє кукурици, шечка и най нє чишлїм далєй.

Зоз снованьом Етно клубу «Одняте од забуца», зазберованьом и викладаньом експонатох за нащивительох, барз вельо уж по тераз зробене. Найвецей заслуги за снованє и роботу Клуба ма пан Дюра Макаї и други члени, котри нєпреривно збераю нови експонати и укладаю вельки усиловносци на його пошоренє и представянє явносци.

Иснуюци Музей жвератко привредного и културного живота жительох Коцура. Вон їх прешлосц – и наша руска прешлосц!

Коцурски Аеро клуб «Наша крила» основани 1928. року

Етно клуб – музей, жвератко народного живота! Зоз своїма уж назберанима предметами представя пиху и гордосц за Коцурцох, як Руснацох, так и Мадярох и Сербох. Прето, за його пошоренє и преширенє, прероснуце до правдивого СКАНСЕНа (Музея под одкритим нєбом), вон уж часточно и то, нєобходне порозуменє и векша материялна потримовка Месней заєднїци у Коцуре, Општини Вербас и Завода за културу войводянских Руснацох.