1693ko argitalpena
Bouqueta lore divinoena. Baiona, Piarres Dussarrat, 1693
Tradizioari jarraiki, argitaraldi honetan ere aldaketa eta emendio anitz egin zitzaizkion liburuari (1648ko argitalpenari berari, funtsean). Areago, 1648koan ez bezala, edizio honetako "protagonista" gehikuntzen arduradun Duronea apaiza dela esan daiteke, gainerako edizioen erabat bestelako izenburua daraman azaletik hasita: Bouqueta lore divinoena, bereciac eta Duronea apeçac T.P.S.V. Aita Materren liburuari emendatuac. Zehatzago, ortografiazko aldakuntzak eta bestelako testu-aldaera txiki ugari ditu, eta orrialde berri asko gehitu dira (edo lekualdatu, ebanjelio-zatiak amaierara eramanik, esaterako). Eranskin aipagarrienak liburuaren hasierako hitzaurre-baimen zenbait (non inprimatzaileari Betri deitzen zaion), "denboraren kontuaz" diharduen tratatu laburra eta kristau-egutegi euskaratua lirateke, gainerako gehienak, azken partean daudenak, latinezko salmo, ofizio eta bestelako otoitzak baitira (tartean euskarazkoren bat ere baduen arren).
Argitaraldi hartako hiru ale hauek gordetzen dira egun:
Julio Urquijoren funtseko alea, Koldo Mitxelena Kulturuneko liburutegia (Gipuzkoako Foru Aldundia, Donostia). Ia osorik dago, eta orrialde batzuk eskuz kopiatuak ditu (Bonaparteren funtseko alean badaudenak).
Lacomberen funtseko alea, Azkue Biblioteka (Euskaltzaindia, Bilbo). Oso higatua dago eta orrialdeen erdia baino gehiago ments du.
L. L. Bonaparteren funtseko alea, Newberry Library (Chicago, Illinois, AEB). Ez dugu zuzenean beste inon aipatua ikusi. Kontsultatu dugu eta ez dago osorik, baina baditu Julio Urquijoren alean falta eta eskuz kopiatuak izan ziren orrialdeak, hain zuzen.