Metodologia

Etapa honetako proposamen pedagogikoak diseinatzean talde-lana sustatuko dugu, kontuan izanik, besteak beste, ikasle-aniztasuna eta ikasteko erritmo ezberdinak daudela gelan.

Justifikazioan aipatu dugun bezala, proiektua 4 urteko umeentzat da. Taldean hogei ume egongo dira eta 4 azpitalde egingo ditugu, baina talde handian ere lan egingo dugu.

Metodologiaren oinarriak:

Jolasa: Haur Hezkuntzako baliabide didaktikoetan garrantzitsuenetariko bat dugu jolasa. Bera izango da gure ardatza eta helburua, jolasaren bidez haurrek ingurunea ezagutzen dutelako, mintzamena garatzen dutelako eta elkar ezagutzeko aukera izaten dutelako.
Ikuspegi globala: haurrek norberaren bizipenekin lotuta dauden gaietan interes handiagoa izango dute eta haiekin gehiago gozatuko dute.
Ikaskuntza esanguratsua: horri esker posible izango da egoera batean ikasitakoa beste egoera eta inguru batzuetan aplikatzea; alegia, gelan ikasitako jolasak kalean erabiliko dituzte.
Aniztasunaren trataera: umeek aukera izango dute gelara ekartzeko eta besteekin konpartitzeko haien jatorrizko kulturan edo lurraldean ohiko diren jolasak.
Ikasleen jokabide aktiboa: ikasleek aztertzearen, manipulazioaren eta esperimentazioaren bidez ikasten dute; hiru ekintzok ezinbestekoak dira haurren garapenerako eta ikaste-prozesurako.