Оюутнууд тухайн хөтөлбөрийг хэрхэн сонгодог вэ?

Бакалаврын түвшний оюутны мэргэжлийн хөтөлбөр сонгох гэсэн дэлгэрэнгүй журам байдаг. Тус журам нь https://elselt.num.edu.mn/ сайтын дүрэм журам хэсэгт байдаг. Бакалаврын хөтөлбөрөөс сонгон суралцахдаа цуглуулсан багц цаг, сурлагын дүн, анх элсэн ороход тухайн багц, хөтөлбөр, хамтарсан хөтөлбөрт харгалзах суурь болон дагалдах шалгалтын тооцоолсон оноо өндөр байх тусам хөтөлбөр сонгохдоо давуу эрх эдэлнэ. Түүнчлэн зарим хөтөлбөрийн хувьд бэлтгэж буй мэргэжил, шинжлэх ухааны онцлогоос хамаарч оюутанд хөтөлбөрийн шаардлага тавина.

Ерөнхий суурийн хэдэн оюутан байгаа вэ? Би ... голчтой тэнцэх болов уу?

ХШУИС-ийн багц 1-т 365 оюутан энэ жил элсэн орсон байна. Багц 1-т дараах хөтөлбөрүүдээс оюутнууд сонгох боломжтой:

• Компьютерийн ухаан,

• Мэдээллийн систем,

• Мэдээллийн технологи, 

• Програм хангамж, 

• Мультимедиа технологи, 

• Статистик, 

• Хэрэглээний математик

Бакалаврын түвшний оюутны мэргэжлийн хөтөлбөр сонгох журмын дагуу оюутнууд хөтөлбөрөө сонгоно тиймээс аливаа хөтөлбөрийн сонголтын боломжийг шууд нарийн тодорхойлох боломжгүй. 

Хос хавсарга хөтөлбөрөөр хэрхэн суралцах вэ?

Хос хавсарга хөтөлбөрөөр шууд суралцах тухай асуудал яригдахгүй. Журмын талаархи дэлгэрэнгүй мэдээллийг https://elselt.num.edu.mn/ сайтын дүрэм журам хэсгээс авч болно. 

Жич: Оюутан суралцаж буй үндсэн мэргэжлийнхээ сургалтын төлөлөгөөн дэх ерөнхий суурь болон мэргэжлийн суурь хичээлийг бүрэн судалж, мэргэжлийн хичээлийн багц цагийн 1/3-ийг амжилттай цуглуулсан, суралцах хугацааны голч дүн 2,6-аас дээш байх шаардлагыг хангасан тохиолдолд хос болон хавсарга мэргэжлээр сурах хүсэлтээ харьяалагдах сургуулийн сургалтын албанд тухайн хичээлийн жилийн 10 болон 3-сард багтаан өгнө.

• Хавсарга мэргэжил олгох хөтөлбөр нь оюутныг хөдөлмөрийн зах зээлд давуу боломжтой оролцох нөхцийг бүрдүүлэхэд чиглэх бөгөөд нийт 30 баг цаг                /мэргэжлийн суурь болон мэргэжлийн хичээл/-аас багагүй байна. Үндсэн мэргэжлийн зэрэгцээ хавсарга мэргэжил эзэмшиж байгаа оюутан бакалаврын зэрэг авахад шаардагдах нийт багш цаг 130-аас багагүй байна.

• Хос мэргэжил эзэмшихдээ өөрийн сурч буй хөтөлбөрөөс гадна суралцах гэж буй хөтөлбөрийнхөө шаардлагыг хангаж мэргэжлийн суурь болон мэргэжлийн хичээлүүдийг судална. Хос мэргэжил эзэмшиж байгаа оюутан хоёр бакалаврын зэрэг авахад шаардагдах нийт багц цагийн хэмжээ 174 багц цагаас багагүй байна.

Хөтөлбөрүүдийн хоорондын ялгаа юу вэ?

Хөтөлбөр хоорондын ялгааг хөтөлбөрийн зорилго, судлах хичээл, эзэмших мэргэжил болон мөн түүний тодорхойлолт,  хөтөлбөрийн ерөнхий төлөвлөгөө зэргээс нарийвчлан танилцах боломжтой. 

Мэргэжил тус бүрт хэдэн оюутан элсүүлэх вэ?

Д/д Хөтөлбөрийн нэр Оюутан элсүүлэх тоо

1 Компьютерийн ухаан 50 оюутан

2 Мэдээллийн технологи 50 оюутан

3 Програм хангамж 100 оюутан

4 Мэдээллийн систем 50 оюутан

5 Мультимедиа технологи 25 оюутан

Мэдээллийн технологи болон Програм хангамж хоёр хөтөлбөрийн ялгаа юу вэ?

Тус хоёр хөтөлбөр хоёулаа олон улсад магадлан итгэмжлэгдсэн хөтөлбөрүүд бөгөөд эдгээр хөтөлбөрүүдийг олон улсын хэмжээнд ч сайтар ялган тодорхойлсон байдаг. 

Компьютер тооцооллын судалгаа шинжилгээд ОНОЛ- ХӨГЖҮҮЛЭЛТ-ХЭРЭГЛЭЭ гэсэн гуравласан холбоо зайлшгүй байх ёстой бөгөөд эдгээр 3 ангид багтах хичээлүүдээс аль ангийн хичээлүүдийг түлхүү судалж байгаагаар нь мэргэжлүүд бие биенээс ялгагдана гэдгийг нийтээр хүлээн зөвшөөрдөг.

Олон улсын хэмжээнд манай салбарын мэргэжлүүдийн зааг ялгааг хөтөлбөрүүдийн ялгаа зурагт үзүүлсэн загвараар илэрхийлдэг. Хэвтээ чиглэл нь онол хэрэглээний түвшинг, босоо чиглэл нь мэдлэгүүдийн түвшин заадаг.

Хөтөлбөр тус бүрийг төгсөөд цаашид ямар боломж нээгдэх вэ?

Тухайн сонгосон хөтөлбөрөөр элсэн суралцах нь ямар мэргэжилтэй болох цаашлаад хувь хүний ирээдүй өсөн дэвжихтэй зайлшгүй холбоотой юм. Хөтөлбөр бүрийн хувьд түүний ажлын байрны мэдээллийг хөтөлбөр сурталчлах мэдээллийн сайтны Мэргэжилтний зориулалт, Ажлын байр гэсэн хэсэгт илүү дэлгэрэнгүй тайлбарласан байгааг харж болно. 

Тухайн хөтөлбөр бүр нь өөр өөрийн онцлог шинж чанартай, мөн манай мэдээллийн технологийн салбарт ажиллах боловсон хүчнийг чанартай бэлтгэх бодлогын хүрээнд зохиогдсон байдаг төдийгүй бид оюутан суралцагчдыгаа олон улсын түвшинд болон цаашид дэвшин суралцах, ажлын байртай болох боломжоор хангахыг зорьсон  хөтөлбөрүүдийг дэвшүүлсэн байдаг юм.   

Багц хооронд шилжих боломжтой юу?

Багц хооронд шилжих боломжгүй. Үнэхээр орж ирэх хүсэлтэй байвал тухайн багцынхаа хөтөлбөрөөс сонгочихоод дараа шилжих шалгалт өгч болно.