洪先生佇民國42年出世，雖然家蹛(tua3)哈瑪星，毋過厝內毋是討海的，伊的爸爸是開跤踏車店的。洪先生細漢的時陣讀鼓山國小，國中猶未畢業就轉去厝內幫忙開店，伊說：「讀冊真重要，一定愛有實力；毋過無讀冊嘛無要緊，愛去學一寡功夫，像修理跤踏車看起來是較䆀的工課，毋過伊嘛是有伊的技術，真歹取代。」

佇差不多民國60年的時陣，政府佇高雄港成立台灣第一个加工出口區，是亞洲重要的參考指標，嘛對台灣的經濟有真大的貢獻，洪先生佇66年的時陣進去一間加工區的日本公司食頭路，幾年後伊佇七賢國中(彼時陣的高雄實中)夜校開始那做工課那讀冊。後來因為中國改革開放，設立經濟特區，洪先生的公司嘛跟隨時行去到中國，洪先生就失去頭路了。

失業了後，洪先生佇KTV揣著一个工課，替人算錢、管理酒。毋過因為KTV的工課傷過複雜，定定發生暴力的場面、有真濟黑道去，所以佇一年後洪先生就辭頭路，另外去揣新的工課。無偌久洪先生擱重新佇加工出口區揣著新的工課，是一間做衫的香港公司。佇彼間公司做4年後，洪先生就跋桮入去代天宮替神明工作了。

民國89年，洪先生開始佇廟裡替人解籤。解籤毋是簡單的工課，欲了解詩籤e意思必須愛有真濟歷史智識。洪先生透過讀足濟e5歷史故事來豐富家己，才會當佇看到詩籤e5時用歷史故事講予信徒了解詩籤e5意思，真正無簡單。