曾大哥看阮到了，就對廟行出來。伊親切e5招呼阮 :「來來來～遮坐。」伊閣予阮一人一罐廟內底e5礦泉水，講是lim1了會使平安健康，然後曾大哥開始講伊e5故事。

曾大哥本名曾國浜，in1兜清朝就ui2台南北門來哈瑪星，來遮已經是第五代，自細漢就佇遮大漢。伊民國六十年出世，今年已經四十八歲了，這馬，伊佮伊e5牽手閣有查某囝蹛佇遮。伊早年是做魚貨拍賣，後來去楠梓蹛，去各地做生理，這幾年閣轉來哈瑪星接任開台福德宮e5總幹事。

是按怎伊會想欲做開台福德宮e5總幹事，這就要ui2曾大哥平常時e5興趣講起，伊自細漢就對研究廟有興趣，伊好奇這个神明是做了啥物會予人民拜，伊嘛會去觀察廟e5外觀佮設計，平常時有閒e5時陣，伊閣會去外縣市，參觀各地e5廟，以前去大陸走船，靠岸等魚船e5時陣，閣會落船四界去問當地e5人來研究宮廟。

曾大哥自13歲就綴爸爸去漁會，定定是半暝1點就出門去學做生理，早起6點轉去厝洗身軀了後去上課 ，去學校了後嘛是咧睏，伊笑講：「彼當陣誰欲讀冊？」 國中畢業了後伊就踏入社會，開始伊做魚貨拍賣的工課，無閣繼續讀冊。伊對家己自細漢就開始做魚仔感覺真驕傲，伊講，這種老經驗是大學生、博士嘛無法度代替e5。

原本叫是會一直佇哈瑪星做魚貨拍賣e5工課，誰知影，後來魚市場對哈瑪星搬去前鎮。哈瑪星e5漁業佮繁華慢慢仔消失去，曾大哥的爸爸嘛佇彼時陣過往 ，閣拄好卡到做兵，曾大哥講，彼是伊人生「較無好e5時陣」。

做兵做了以後，到前鎮閣做幾年e5魚仔，曾大哥就決定搬去外地做生理，佇楠梓蹛十幾年，嘛佇楠梓拄著他這馬e5牽手。

猶毋過，曾大哥佇楠梓蹛袂慣勢，伊講：「佇遐攏是大樓，去就是門關著。」逐家攏袂相借問。所以伊決定搬轉來他感覺上慣勢e5哈瑪星。伊講：「舊部落就是有這个人情味較好。」、「我佇遮甚至連門就毋免鎖。」、「若欲揣我，路邊隨便凊彩問一个阿婆，伊就共你報阿浜in1兜佇佗位啊。」而且哈瑪星的少年人攏去外地，老的人嘛一个啊一个轉去，伊想欲轉來為家鄉盡一份力。

這馬曾大哥已經退休，除了做廟e5總幹事，處理廟e5事志以外，閣有做一寡仔卯工程e5生理。

講著哈瑪星e5過去，曾大哥有一寡仔懷念佮感慨，伊講，哈瑪星以前有夠熱鬧，規條街仔路攏是來耍水、看夕陽佮吃海產的遊客，甚至閣有一句話講：「 食黑輪 ，看死人(夕陽)」 觀光客非常e5濟，連細間旅社e5房間攏是滿e5。伊講：「較早咱哈瑪星有六間飯店，這馬甚至連一間嘛無。」佇魚市場猶未搬走e5時，附近也有真濟海產店，毋過尾仔攏收了了啊，觀光客嘛漸漸仔攏毋來啊， 實在真可惜。

曾大哥也講到，哈瑪星繁華e5消失是慢慢仔感受到e5：「雄雄無做e5時陣咱會無感覺，經過三、五冬，诶，哪會愈來愈少人，閣成十冬，毋是觀光客少爾，咱在地e5人嘛少，為啥物？在地e5人就無法度生存，人誰欲蹛在這裡？」

阮嘛真好奇，若感覺這馬e5哈瑪星真可惜，曾大哥所認為e5哈瑪星應該是啥物款e5咧？

硩船石

聽曾大哥講，壁頂e5石頭是古早提來硩船e5，因為較早e5船較無遐爾好，攏真輕，需要提較重e5物件來硩。因為遮e5石頭真勇，後來就用來起厝。

最後，熱情e5曾大哥嘛邀請阮會使時常去土地公廟拜拜，土地公會保庇阮e5期末順利、健康平安！