第一个港口：伊是誰

阮一踏進店內底，阿姨就足熱情的問阮愛啉紅茶無。周圍的妝娗看起來真文雅，予人一種奔放閣定著的感覺。

伊是洪鶯鶯，「餓魔牛排館」的頭家，蹛哈瑪星，佇高雄苓雅區出世，今年大約六十歲。伊翁是船長，長年佇外口做工課，逐擺討海攏愛一年以上才會轉厝。阿姨是一个足趣味的人，伊總是笑咍咍，伊嘛攏叫家己作「 掖跤」，因為合意四界走，嘛予伊交到真濟朋友。

第二个港口：牽手

啥物是「牽手」？對阮來講，「牽手」是一種羈絆、一種關係的確認共關係更加進步的證明。

「是按怎叫做『牽手』？我這馬才體會著喔！其實牽手是一件足有魅力的事志⋯⋯人共人的接觸內面，其他部位無定著會予人有其他的思想。毋過這个牽手，你會感覺伊足簡單，其實就是講袂有任何不好的思想，嘛有可能有任何不好的思想⋯⋯遮真簡單嘛真複雜，因為遮會使傳遞溫度、會使傳遞情感、會使傳遞想法。有一日你一定會使體會⋯⋯是按怎臺灣人叫某『牽手』。」

阿姨共阮講，牽手是一件足有魅力的事誌，伊將兩个人的溫度、感受與想法連做伙，共其他身軀接觸的感覺無仝，牽手就是簡單的將兩个人密密的連做伙。

第三个港口：牽手的過程

阿姨共伊翁佇交往的過程中，攏是熱情的阿姨牽著對方的手，一直到有一日亻因兩个去彳亍 ，佇外頭等車時，伊翁雄雄主動牽阿姨的手，這時陣阿姨知影，對方是愛伊的，這嘛是阿姨所感覺到的目𥍉仔的戀愛。然後兩人的關係漸漸穩定，一直到欲成親的地步，佇結婚的十幾天前，阿姨雄雄反悔，伊講「感情是會使用身體語言共語言傳遞的，我無感覺到伊愛我，我是按怎欲嫁給伊？」，想起彼時，阿姨共阮講，因為伊翁的袂曉表達予伊無安全感，伊當時其實只是欲司奶共討愛。

結婚了後，逐擺伊翁轉厝，阿姨總是搝伊翁四界彳亍，嘛總是主動牽著伊翁的手。伊翁定定因為感覺歹勢共阿姨的手扌用(hiu3) 開，一直到有一日，阿姨無擱主動牽伊翁的手，伊才感覺減一隻搝伊的手足袂慣勢，正阿姨擱牽起伊的手時，伊翁就無擱扌用 開阿姨的手，顛倒牽牢牢。

第五个港口：海、愛情與家庭

由於阿姨伊翁兜佇靠海的區域，本地有足濟人依靠討海來生活，就按呢伊翁國中一畢業就綴 本地人作伙去船頂做工課。由其中會使看到，地緣關係是怎樣影響本地人工課的選擇，嘛因為按呢的地緣關係，毋才發展出阿姨亻因兜遮爾特別的生活方式。靠海的部落成就港口，在地人就順從地理環境坉共海有關的工課，長期落來，海洋佇無仝人身軀邊發生無仝的變化。嘛因為阿姨追求自由、對生活較開放的態度，和長期佇外口、靠討海生活的翁造成一種特殊的家庭型態：雖然這个家庭表面看起來予人一種離散感覺，毋過 亻因其實是一个感情足密實的家庭。兩人有足濟的空間發展家己的事業共日子，嘛會使佇需要對方的時陣成做對方的倚靠。

阿姨雖然佇陸地上，毋過亦有海洋的奔放；伊翁雖然佇海洋上，毋過亦有陸地的穩重。亻因就親像海洋和陸地的關係仝款，需要對方，嘛會使各人發展開闊的人生。