Harewos keur Indung

Tibarang Kuring dihirupkeun dina rahim indung, ti harita saeunyana kuring sawadina jadi mahlukna anu kudu sukur ni'mat. Indung mangrupa "janggelekna" muara kahirupan mantenna pikeun umatna.

Kuring yakin rajaning yakin indung kacida bagjana nalika kuring aya dina rahimna, komo sanggeus kuring gelar ka dunya. Tangtu kuring dirawu, dipangku, dinangna-néngné. Sagala hal kahadean diketrukeun keur kuring. Sagala kapeurih geus teu dijadikeun itungan ku indung enggoning "ngajelemakeun" kuring.

Kiwari mangsa kuring geus sawawa geus bisa hirup jeung néangan hirup sorangan. Kuring yakin kabagjaan Indung paripurna ku éta hal najan teu ditémbongken ka kuring. Ka jalma-jalma kuring yakin indung teu weléh agul-agulan ka dirina "Anaking kiwari geus jadi jalma".

Ekspresi kabagjaan anu tan wates wangénan tina hal anu teu sapira. Kuring geus jadi "jalma", ceuk indung, tapi naha kuring geus pantes disebut "jalma anu bisa mulang tarima ka indung?".

Indung… nepi ka poé ieu satékah polah kuring nempatkeun anjeun dina posisi anu pangpunjulna, ngan kuring yakin nepi ka tutup umur kuring hamo bisa naur sagala kahadéan anjeun. Sarénghap napas anjeun jadi sarébu napas kahirupan kuring. Sausap kadedeh anjeun jadi usap-usap nu natrat dina kahirupan kuring. Cimata kapeurih anjeun mangrupa panaur cimata kabagjaan keur kuring. Anjeun makhluk pang mulyana disatung kebing dunya. Hampura kuring hamo bisa naur sagala kahadéan anjeun.

Hampura kuring saukur bisa jadi anak nu ukur bisa naur kahadéan anu teu sapira. Urusan sakola, karir (insyaa Allah), rezeki, anu karasana ku kuring digampangkeun ku Mantenna anu ceuk anjeun éta téh mangrupa kabagjaan hirup anjeung, keukeuh hamo bisa naur naur sagala kahadéan anjeun.

Indung…mun seug kuring jeun anjeun geus dipegat pasti kaasih kuring tetep nganteung keur anjeun, sakumaha tetep ngantengna "kakuatan" ti anjeun keur kahirupan kuring nepi ka tungtung mangsa. Kuring teu kawasa ngabagjakeun anjeun dunya akherat, tapi kuring yakin geus aya sawarga pikeun anjeun jaga di alam nu hamo kadangkang ku manusa, ukur ti Mantenna.

*Isi konten bukan lagi tanggung jawab penerbit