阿猴出世佇台北縣（這má ê新北市）三重埔，幼猴仔ê時陣搬厝到枋橋，阿猴讀國小kap國中攏佇枋橋，所以阿猴會當講是枋橋猴囡仔。

升高中ê彼年，阿猴閣搬轉來三重埔，tú開始誠無慣勢，尤其聽人講三重埔是「流氓ê大本營」，心內加減會驚驚。毋過阿猴因為高中kap大學攏讀台北市ê學校，所以真少佇三重埔活動。

出社會了後，較有機會重新識悉三重埔這个所在。阿猴發現其實三重埔誠古錐，三重埔人雖然無遐幼秀，毋久大部份ê人誠熱心閣老實，也誠趣味，就對三重埔印象改觀。

講到遮，阿猴欲分享ê是，自細漢到出社會，阿猴袂曉講台灣話，是出社會了後才開始學淡薄仔腔調怪怪ê幾句台語，正式學台語是佇2015年3月到雙連長老教會牛埔庄拜六台語羅馬字班，tòe台語界ê先進陳金泉老師學台語。約略一年外ê練習，阿猴ê台語能力大大提升。2018年有考過成大全民台語認證高級，誠歡喜～

因為阿猴親身體會學台語羅馬字（白話字）對學台語有誠濟好處，所以鼓勵逐家會當作伙來學，作伙來推sak台語啦！

補充講：為啥物阿猴愛叫阿猴neh？阿猴毋是屏東人（屏東舊地名叫「阿猴」），生相也毋是相猴，原因真單純，是因為阿猴愛猴，尤其是台灣彌猴，有夠古錐啦！相片這張台灣彌猴是阿猴ê朋友佇宜蘭ê棲蘭翕ê，有súi--無？