今仔日ê聖經節是《馬可福音 第一章14-20節》

Tī盧俊義牧師查經班聽牧師講馬可福音ê節奏真緊, 看這段聖經節就有感覺, 親像耶穌欲傳福音真緊, 毋過我看ê重點是另外一面, 在tī主ê揀選.

主ê羊仔認捌伊ê聲, 見若主揀選ê人就會來跟隨伊, 毋管過程如何. 重點毋是信耶穌ê時間偌久, 也毋是緊kap慢ê問題. 我看ê重點是「價值觀」, 這人ê心思念頭上帝攏知, 伊ê揀選絕對無錯..

人甘有能力知影啥人會信耶穌—neh？無法度. 信耶穌是恩典, 源頭是全能ê主, 人是配合上帝ê旨意; 伊是牧者, 咱是羊仔, 跟隨主來得著保護kap活命.

耶穌對西門in講ê話, 我ê理解是真簡單：耶穌講得著人, 親像掠魚ê得著魚. 魚仔就是有時會掠有,有時掠無, 有時掠chē, 有掠少. 傳福音也是, 有時人來, 有時無半人, 有時人臨時欲來, 有時愛來毋來. 若是知影主權tī主, 不管抵著啥mí困難觸磕, 攏會重新徛起, 因為深知毋是倚靠家己, 是倚靠氣力ê源頭—咱ê主.

感謝上帝ê看顧. Amen.

來學an-chóaⁿ用台語講科學～^_^

===下面是我整理ê想法===

今下晡我tī新北市永和區ê一間「嶼讀冊房」參加《吳阿公ê台語辭典2.0--講台語ê科學家》活動，講師是陳柏中，伊示範安怎用台語講伊ê專業--物理.

我開150箍台票當然毋是真正欲學物理，主要目標是：

1. 學少年人ê方式kap創意。

2. 欲知影少年人對使用台語ê想法kap做法。

3. 欲知影少年人使用台語ê慣勢。

4. 自我調整，koh進一步思考，會使安怎做chiah會tī家己目前ê能力kap活動範圍之間，koh設法增加台語ê元素。

=========^^=======

整理：

1. 少年人透過Facebook辦活動，chhōe適合ê場所，規劃活動安怎進行。每一擺活動毋免chē-chē人，hām大型台語活動比較，親像這款細攤ê活動，優點是省錢、省時，koh會使舉行較chē擺。

2. 少年人利用網路，逐家合作寫《台語維基百科》，an-ni只要有任何人tī Google chhiau-chhōe ian-chín（Google search engine）chhōe物件，就會使看tio̍h台語。Lú chē人上網合作寫台語，就lú chē人看會tio̍h台語。In 使用ê方式就是一款「協作平台」，koh會使予in彼此聯絡，有共同ê目標就會團結。真正是一兼二顧。

3. 少年人使用台語，無論是講台語抑是寫台語，甚至是將中文翻譯作台語，我觀察少年人有真大ê彈性kap創意，甚至會創造新詞。舉一ê例：中文語詞「島礁」，in會使討論發表想法，有ê講「島嶼（tó͘-sū）kap礁石（ta-chio̍h）」，有ê講「島（tó͘）kap礁（ta）」，有ê講「島礁（tó͘-ta）」⋯⋯討論到最後再來整理逐家ê想法，當然也是有較強勢ê領導者hit款人物，毋過逐人攏有權利kap機會發表想法，有民主ê實行。

4. 整個過程真少討論發音ê問題，包括方音差，也真少、真少古早話。分析in ê重點攏khǹg-tī「安怎予koh較chē ê人會使明白這句/這段/這篇台語文ê意思」、「安怎利用台語解釋代誌，包括家己ê學習內容，抑是專業知識」、「安怎上網推送」⋯⋯

5. 我想講，有ê人做台語老師，抑是台語作家、學者，攏真好，真盡心盡力拍拼推廣台語，koh教育後一代，會使傳承。另外一方面，若毋是做老師、作家、學者，是毋是也會使khiā-tī家己本身ê領域做推送台語ê工作？我想應該會使，無論是做什麼職業，抑是男/女家管，攏有才調加khǹg台語元素tī任何方面。親像開餐廳抑是路邊攤á，菜單寫台語，會當bô？盡量用台語kap客戶/人客講話，會當bô？分享相片、圖、文字tī網路頂懸，盡量寫台語，會當bô？到KTV唱歌，唱台語，會當bô？Hàm少年人作伙合作寫台語維基百科，會當bô？

受tio̍h少年人ê刺激，我計劃ài練習用台語說明kap寫出我ê職業相關ê物件，製作台語聖經金句圖，練唱koh較chē ê台語歌～^_^

禮拜後想著這首金泉老師教過ê台語韻詩（作者：謝百合）《雨淋食金含》，所以我就走來淡水，毋過無食魚丸kap金含糖á，來食咖啡配壽司，K報告兼K書～

昨日一个別位教會ê姊妹講伊無法度一个人，感覺孤單會黑白想. 伊知影我目前單身，好意欲幫我介紹對象，我推辭講毋免，因為我真驚失去自主權. 佇台灣，女性踏入婚姻大多數攏「陣亡」失去自主權，真少有男方會尊重女性ê自主權，一直要求女性犧牲奉獻，個人認為這是比死亡更加恐怖ê代誌.（挫）

二二八，三月屠殺kap白色恐怖是台灣真悲慘ê歷史, 我提這kap傳統婚姻做比評，認為有真chē共同點. 婚姻是愛回歸上帝原本ê心意，兩人成作一體共同為家庭付出，若毋是按呢，甘願一个人較好.

毋閣其實我也毋是一个人，有上帝kap我作伴，伊賜我真chē朋友，感謝上帝!

----------------

《Hō͘ Lâm Chia̍h Kim-kâm》

Gín-á-hiaⁿ, hō͘ hō͘ lâm.

Saⁿ tâm-tâm, chin-chiàⁿ chhám.

Tām-chúi-chām, chia̍h hî-oân.

Thng-sio ài-chia̍h mā-tio̍h phông.

Iâm chē thng kiâm phòe kim-kâm.