RREGULLORET E SHKOLLES

SHKOLLA FILLORE E MESME DHE E ULËT ‘’REXHEP GJELI’’ NË LIKOSHAN

RREGULLORE

KODI I SJELLJES SË MIRË DHE ETIKËS

PËR STAFIN E SHFMU “REXHEP GJELI” NË LIKOSHAN

Likoshan, shkurt 2024

KODI I ETIKËS

KREU I

DISPOZITAT TË PËRGJITHSHME

Neni 1

QËLLIMI

Ky Kod, ka për qëllim të përcaktojë rregullat e sjelljes për mësimdhënësit me bazë ne shkollë, për mësimdhënësit bashkëpuntor, si dhe për stafin tjeter të SHFMU “Rexhep Gjeli” ne Likoshan, sipas rregullave dhe standardeve të vendosura në përputhje me frymën e etikes profesionale dhe morale.  Kodi synon zhvillimin e kulturës organizative të punës brenda Institucionit për të forcuar dhe promovuar parimet bazë etike, që do të zbatohen nga stafi i shkollës.

Neni 2

FUSHËVEPRIMI

Dispozitat e Kodit të Etikës, zbatohen për të gjithë stafin e shkollës gjatë ushtrimit të funksioneve, detyrave ose kompetencave publike në bazë të legjislacionit në fuqi.

Neni 3

PËRKUFIZIMET

1.      Shprehjet e përdoruar në këtë Kod kanë këto kuptime:

“Institucion”, është institucioni i SHFMU “Rexhep Gjeli”.

“Punonjës” janë të gjithë mësimdhënësit, bashkëpuntor, apo çdo punonjës tjetër, pjesë e SHFMU “Rexhep Gjeli” në Likoshan.

“Epror”, është eprori direkt, sipas përcaktimeve të legjislacionit në fuqi.

Neni 4

RËNDËSIA  E INTERESIT PUBLIK NDAJ INTERESIT PRIVAT

Punonjësi duhet të ushtrojë detyrën në përputhje me ligjin, rregulloren e Kuvendit Komunal të Drenasit si dhe rregulloret e brëndshme të shkollës duke udhëhequr nga interesat publike dhe jo interesat personale, partiake apo private. Ai duhet të shmangë përdorimin e detyrës, për qëllime të cilat nuk kanë bazë ligjore, nuk janë të ndonjë interesi publik apo etikë.

Neni 5

PAANSHMËRIA DHE PAVARËSIA

1.      Punonjësi i Institucionit , gjatë ushtrimit të detyrës duhet të jetë i pavarur dhe i paanshëm.

2.      Punonjësi, duhet të distancohet nga çdo veprim arbitrar që cenon interesin nxënësve, të Institucionit, si dhe nga çdo trajtim preferencial mbi çfarëdo baze. 

Neni 6

VESHJA DHE PARAQITJA E PUNONJËSIT

1.      Veshja dhe paraqitja e punonjësit të Institucionit, duhet të jetë në mënyrën e duhur dhe të përshtatshme,  duhet  t’i përgjigjet vendit dhe natyrës së punës si dhe të mos dëmtojë reputacionin e institucionit.

2.      Veshja e papërshtatshme konsiderohet, sidomos:

2.1   veshja transparente;

2.2   për meshkujt: pantallonat e shkurt  ose pantallona të tjera që shtrihen mbi kyçin e këmbës kur qëndrojnë në këmbë, pa mëngë dhe me ngjyra të pazakonta;

2.3   për femra: bluza/këmisha shumë të hapur për rreth qafe, që ekspozon në masë të madhe lëkurën dhe që është pa mënge, funde ose pantallona të shkurtra që shtrihen mbi gjunjë kur qëndrojnë në këmbë, pantallona të ngushtë.

2.4   veshja sportive, mbishkrimi i përmasave të mëdha në veshje, simboli që mund të jetë ofendues në çdo bazë, si dhe mbajtja e kapelës  në ambientet e punës, për veç mësimdhënësit të edukatë fizike, sportet dhe shëndeti.

3.      Punonjësit të Institucionit nuk i lejohet të shfaq  tatuazhe në pjesë të trupit që konsiderohet veshje e papërshtatshme sipas këtij kodi dhe të shfaq  pjesë të shpuar të trupit përveç veshëve tek gjinia femrore.

4.      Çdo punonjës i Institucionit, është i obliguar të bartë  uniformen gjatë orarit të punës.

Neni 7

PIJET ALKOOLIKE DHE PRIJA E DUHANIT

Konsumi i  çdo lloj pije alkoolike ,si dhe ardhja  i dehur në ketë Institucion është i ndaluar.

Punonjësit nuk duhet të pijnë duhan në zona ku duhani është i ndaluar duke respketuar kuadrin ligjor në fuqi

Neni 8

MARRËDHËNIET ME NXËNËSIT/PRINDËRIT DHE KOLEGËT E PUNËS

1.      Punonjësi, i përgjigjet çdo kërkese të nxënësve prindërve në lidhje me kryerjen e detyrave, duke respektuar kufizimet në lidhje me dhënien e informacionit sipas ligjit.

2.      Punonjësi i Institucionit,  në kryerjen e detyrave dhe përgjegjësive duhet të veprojë ndaj nxënësve/prindërve  me mirësjellje, respekt dhe pa diskriminim.

3.      Punonjësi i Institucionit, në kryerjen e detyrave, duhet të respektojë të drejtat e të gjithë punonjësve të tjerë të Institucionit. Duhet të trajtojë me mirësjellje, respekt dhe pa diskriminim, kolegët nxënësit si dhe prindërit.

4.      Nuk duhet të inkurajojë dhe të ndihmojë punonjësit e Institucionit në mos respektimin e parimeve të parashikuara me këtë Kod gjatë ushtrimit të detyrave.

5.       Punonjësi, duhet t’i përgjigjet me transparencë dhe vërtetësi çdo kërkese nga prinderit për informacion, lidhur me kryerjen e detyrave, por nuk duhet të ofrojë informacione konfidenciale për punonjësit dhe nxënësit tjere, informata lidhur me të dhënat personale siç përcaktohet me legjislacionin në fuqi.

KREU II

PARIMET E SJELLJES SË PUNONJËSIT GJATË USHTRIMIT TË FUNKSIONIT MËSIMDHËNIES

Neni 9

INTEGRITETI

Punonjësi i Institucionit, duhet të veprojë me profesionalizëm dhe paanshmëri për interesin e përgjithshëm të nxënësve si dhe të forcojnë besimin dhe  mbështetjen  në institucione.

Neni 10

MOSDISKRIMINIMI

1.      Punonjësi  i Institucionit, duhet të shmangë çdo lloj diskriminimi të drejtpërdrejtë apo të tërthortë në bazë të përkatësisë etnike, racës, gjinisë, gjuhës, fesë, mendimeve politike, aftësisë së kufizuar ose ndonjë statusi tjetër personal.

2.      Punonjësi, duhet të trajtoj me respekt të gjithë nxënësit, prindërit duke respektuar të drejtat dhe detyrimet e tyre në pajtim me legjislacionin në fuqi.

Neni 11

TRANSPARENCA

1.      Punonjësi i Institucionit, duhet të promovojë çdo masë që nxit transparencën në lidhje me kompetencat, detyrat dhe përgjegjësinë e tyre.

2.      Punonjësi  i Institucionit (kujdestari i klasës), duhet të sigurojë që prindëri ti ofrohet transparencë dhe qasje në informata për femijun e tij/saj në bazë të kërkesave të tij/saj

KREU III

DETYRIMET DHE KUFIZIMIT E PUNONJËSIT TË INSTITUCIONIT

Neni 12

DETYRIMET E PUNONJËSIT TË SHFMU “REXHEP GJELI”

1.      Punonjësi i Institucionit, gjatë kryerjes së detyrës, në zbatim të parimeve të përcaktuara në këtë Kod, duhet:

1.1  të promovojë interesat më të mira të shkollës;

1.2  të kontribuojë në përmbushjen e misionit dhe realizimit të vlerave të shkollës;

1.3  të ruajë respektin dhe besimin e prindërve ndaj shkollës;

1.4  të shfaqë integritet personal, ndershmëri dhe përgjegjësi në të gjitha veprimet e tij/saj;

1.5  të sigurojë një mjedis të respektit reciprok, të paanshmërisë dhe bashkëpunimit;

1.6  të ruajë fshehtësinë e të gjitha çështjeve që konsiderohen konfidenciale sipas legjislacionit dhe rregullativit të shkollës ;

1.7  të demonstrojë përkujdesje ndaj pronës dhe burimeve të shkollës;

1.8  të respektojë orarin e punës;

1.9  të ruajë një paraqitje serioze gjatë orarit të punës, që përfshin veshje serioze e dinjitoze, përdorim i një fjalori të zgjedhur brenda normave të etikës e të sjelljes qytetare;

1.10    të zbatojë me korrektësi detyrën në përputhje me legjislacionin në fuqi;

1.11    të shmangë rastet ku ka konflikt interesash, sipas legjislacionit në fuqi, duke e deklaruar pranë autoritetit përgjegjës, sapo të jenë në dijeni. Kur ekzistojnë konflikte të tilla, punonjësi është i detyruar të tërhiqet nga proceset vendimmarrëse ose aktivitete të ngjashme;

1.12 të mos lejojë që marrëdhëniet personale të prekin marrëdhëniet profesionale;

1.13 të mos kërkojë dhe të mos pranojë asnjë formë privilegji, përfitime, ndërhyrje, favorizime,

1.14 pagesa apo dhurime, nga persona të tjerë, që kanë për qëllim marrjen e rezultateve favorizuese, të merituara prej tyre apo favore e përfitime të tjera, të cilat punonjësi i Institucionit mund t’i ketë për shkak të  detyrës;

1.15 të mos bëjë dallime ndër vartës apo kolegë, për shkak të njohjeve apo preferencave personale;

1.16 të mos bëjë dhe të mos bëhet pre e ngacmimeve të të gjitha formave nga persona të tjerë për shkak të punës, për qëllime që bien në kundërshtim me këtë kod,  aktet ligjore dhe nënligjore në fuqi, si dhe me normat morale;

1.17 me veprimet e tij/saj të mos sjellë cenime të dinjitetit, personalitetit dhe të figurës profesionale, mendimeve profesionale të kolegëve dhe titullarëve në Institucion;

1.18    të mos konsumojë pije alkoolike, duhan apo substanca tjera të ndaluara me ligj në mjediset e Institucionit;

1.19    të mos e përdor telefoni gjatë orës mësimore.

Neni 13

PARANDALIMI I MARRJES SË DHURATAVE DHE FAVOREVE

1.      Punonjësi i Institucionit nuk duhet të kërkojë ose të pranoj  dhurata mbi vlerën e parashikuar ligjore apo favore tjera për vete dhe të afërmit, lidhur me ushtrimin e funksionit të tij/saj.

2.      Dhuratat që kanë vlera artistike dhe historike që administrohen nga ana e shkollës dhe mund të ekspozohen, mbesin pronë e shkollës.

3.      Dhuratat dhe përfitimet e ngjashme sipas këtij neni, deklarohen brenda 5 ditëve dhe regjistrohen në një regjistër të posaçëm, pranë autoritetit përgjegjës.

4.      Punonjësi i Institucionit duhet të informojë eprorin e tij/saj të drejtpërdrejtë ose organin mbikëqyrës me shkrim nëse ofrohet ose jepet ndonjë dhuratë pa paralajmërim apo në rrethana të veçanta.

Neni 14

NGACMIMI MORAL DHE SEKSUAL

1.      Punonjësi i Institucionit i ndalohet çdo sjellje, veprim që përbën shqetësim moral dhe seksual i cila ka për qëllim cenimin e dinjitetit personal, dhe i cili krijon mjedis kërcënues, armiqësor, poshtërues, përçmues dhe fyes.

2.      Punonjësi i Institucionit duhet të reagojë, raportojë, kërkojë evidentimin dhe hetimin e rastit, në rast të ndonjë pretendimi për ngacmim seksual, duke mundësuar që viktima e ngacmimit seksual të mos frikësohet, të mos denigrohet dhe të mos injorohet pretendimi i tij/saj.

Neni 15

MBROJTJA E TË DHËNAVE DHE KONFIDENCIALITETI

1.      Punonjësi i Institucionit është i detyruar që të ruaj konfidencialitetin e të gjitha të dhënave personale të nxënësve, për të cilat është në dijeni gjatë ushtrimit të veprimtarisë.

2.      Punonjësi i Institucionit duhet të ketë dijeni për statusin e konfidencialitetit të informacionit që marrin gjatë ushtrimit ose kryerjes së detyrave.

3.      Punonjësi i Institucionit, i cili merr informata konfidenciale, të privilegjuara, të mbrojtura gjatë ushtrimit, të funksioneve të mësimdhënies, nuk duhet t’i shpalos këto informacione, përveç në ato raste kur  kërkohet me ligj.

4.       Punonjësi i Institucionit nuk duhet të përdor asnjë informacion konfidencial, të privilegjuar ose të mbrojtur të fituar gjatë ushtrimit të detyrave  për përfitimin personal ose për një qëllim tjetër.

5.  Punonjësi i Institucionit edhe pas largimit nga puna, duhet të vazhdojë të ruajë konfidencialitetin në lidhje me detyrën e ushtruar, në përputhje me Ligjin përkatës për klasifikimin e informacionit dhe rregullat e sigurisë dhe Ligjin përkatës për mbrojtjen e të dhënave personale.

KREU IV

ZBATIMI DHE MASAT  DISIPLINORE

Neni 16

NJOFTIMI ME KODIN

1.      Pas miratimit të kodit, Komisioni në nivel shkolle, duhet të informojë punonjësit e Instituciionit për kodin, detyrimet dhe deklaratat e ndërlidhura në momentin e fillimit të punësimit  të tij/saj.

2.       Kodi shpërndahet tek çdo punonjës i Institucionit.

3.      Të gjithë  punonjësit e Institucionit, duhet të njihen secili me Kodin e Etikës dhe nëse e shohin të nevojshme të kërkojnë sqarime dhe interpretime nga Komisioni.

Neni 17

ZBATIMI I KODIT PËR PUNONJËSIT E INSTITUCIONIT

1.      Kodi i etikës duhet të zbatohet nga të gjithë punonjësit e Institucionit.

2.      Eprori ose komisioni, është përgjegjës për monitorimin e pajtueshmërisë së punonjësit me rregullat e përcaktuara me këtë Kod.

3.      Komisioni, është përgjegjëse për monitorimin dhe mbikëqyrjen e zbatimit të Kodit.

Neni 18

DEKLARIMET E PUNONJËSVE

1.       Deklarimi se është njoftuar dhe ka pranuar një kopje të këtij kodit bëhet me shkrim duke përdorur formën  e duhur e cila është shtojcë dhe pjesë përbërëse të këtij Kodi të Etikës. Kopja do të mbahet në dosjen e punonjësit të Institucionit në përputhje me legjislacionin në fuqi.

2.       Punonjësi i Institucionit është përgjegjës për të siguruar që eprori ose komisioni është i informuar për çdo ndryshim të rrethanave për të përditësuar deklarimet e tyre.

Neni 19

MASAT DISIPLINORE

1.       Punonjësi i Institucionit që shkel dispozitat e përcaktuara në këtë Kod dhe veprimet e tij/saj nuk përbejnë vepër penale (për veç ngacmimit seksual  ), ndëshkohen me masat disiplinore në përputhje me rregulloret e shkollës.

2.       Çdo punonjësi i Institucionit që është në dijeni, dyshon për një shkelje të dispozitave të këtij Kodi, duhet të raportojë shkeljen te komisioni apo mbikëqyrësi i drejtpërdrejt.

3.       Procedura disiplinore për punonjësi i Institucionit zhvillohet sipas rregullores se Kuvendit Komunal dhe rregullreve te shkollës.

Neni 20

ZBATIMI I KODIT DHE MASAVE DISIPLINORE

1.       Masat për shkelje të Kodit të Etikes janë:

1.1  Vërejtja publike - e cila shqiptohet në mbledhje të Këshillit te Arsimtareve

1.2  Dënimi me ndalje deri në 3% të pagës për tre muaj.

1.3  Si dhe vëretjet sipas rregullores se Kuvendit Komunal të Drenasit për Institucionet Arsimore.

2.       Për të siguruar zbatimin e këtij kodi, shkolla themelon një komision.

3.       Komisioni  monitoron zbatimin e kodit, dhe vepron sipas  propozimeve  individuale për përcaktimin e ekzistimit të një shkelje të kodit, paraqet raporte tek drejtori i shkollës

4.       Vendimi i komisionit është vendim përfundimtar në procedurën administrative.

5.       Vendimi hynë në fuqi me nënshkrimit e Drejtorit të Shkollës

SHKOLLA FILLORE E MESME DHE E ULËT ‘’REXHEP GJELI’’ NË LIKOSHAN

DEKLARATA E PRANIMIT

Emri i plotë: ____________________________

Pozita:         ____________________________

Unë, si punonjës i Institucionit  në SHFMU “Rexhep Gjeli” në Likoshan, konfirmoj që e kam lexuar, kuptuar dhe pranuar Kodin Etik të shkollës, dhe duke nënshkruar këtë deklaratë, pranoj të respektoj rregullat e përcaktuara në këtë Kod dhe të përmbush funksionet dhe detyrat e mia me përpikëri dhe besnikëri, sipas gjykimit dhe aftësive të mia më të mira.

Unë e pranoj se çdo shkelje e mundshme e këtij Kodi mund të rezultojë me nisjen e procedimeve disiplinore ose ligjore kundër meje.

Nënshkrimi: ___________________________________________

Data:   ___________________________________________