志工書寫

陪伴我行過落雨天ê工課單

◎施錦燕

窮真講，看著規工ê工課單，實在是一粒頭兩粒大，足無想欲擔任值日ê工課。毋過若想著南投吳醫師、美玲、正修、培澤等志工，in遮爾用心ê規劃，閣有行動公約寫著ê「咱會隨時培養家己ê領導能力……」有這款ê準則佮信念，雖罔真掛心、敢有法度順利完成分享和規工ê行程？嘛只好頭犁犁，承擔落來。

早起對三樓ê樓梯行落來，就看著上媠、上古錐ê尚美志工，笑微微徛佇樓梯頭等我，予我緊張ê情緒略略仔放輕鬆。

頂晡佇水里由守欽志工tshuā路，中晝來到祝生廟食晝、歇睏、分享。麗玲志工ê好朋友許女士、朱先生in翁仔某，嘛真貼心紮弓蕉來為阮加油。在地ê康議員、正修志工也替阮紹介鹿谷ê歷史、地理環境、特產等等，增加阮對咱這片土地ê認捌。

當當志工熱烈分享ê時，啥知天公伯仔毋甘阮予日頭曝，煞落大雨，連大人嘛來問：「雨落甲遮爾仔大，恁敢欲繼續行？」是，阮欲繼續行。雖罔大雨沃澹我ê工課單，雖罔大雨沃澹阮ê身軀，沃袂化阮追求民主、自由ê心。

值日日期：2023/8/26

2024.10.25~27南投部落行踏

◎施錦燕

秋風輕送伴阮行

前輩健丟真勇健

行過山嶺peh上kiā

拄著水窟仔嘛照常行！