kolAKSYON: Kagamitang Pampagtuturo - Kapalarang De-hagdan

Ang Kapalarang De-Hagdan ay hinango sa klasikong laro na Snakes and Ladders at ito ay nagmula sa India at kilala noon bilang "Moksha Patam" o "Mokshapat." Ito ay ginamit bilang isang larong pampagtuturo upang ipakita ang konsepto ng moralidad at espirituwalidad. Ang mga hagdan ay kumakatawan sa mga birtud tulad ng kabutihan at katapatan, habang ang mga ahas ay kumakatawan sa mga bisyo tulad ng galit at kasakiman.

Ang laro ay dinala ng mga mangangalakal at mananakop mula sa India patungo sa iba’t ibang bahagi ng mundo, kabilang na ang England, kung saan lalo itong sumikat noong panahon ng kolonyalismo. Sa paglipas ng panahon, ang laro ay nagkaroon ng iba't ibang bersyon at naging popular sa mga bata sa buong mundo bilang isang simpleng board game na nagpapakita ng kombinasyon ng swerte at estratehiya at ngayon ay maaari na ring gamitin bilang kagamitang pampagtuturo.

LAYUNIN

Ang "Kapalarang de-hagdan" ay isang adaptasyon ng klasikong larong tinatawag na snakes and ladders ito ay ginagamit bilang kagamitang pampagtuturo sa Filipino. Layunin nitong gawing mas masaya at interaktibo ang pagkatuto sa pamamagitan ng isang laro na tumutulong sa mga mag-aaral na mas maunawaan ang mga aralin sa Filipino sa kawili-wiling paraan.

BENTAHE

Ang Kapalarang de-hagdan ay isang kagamitang pampagtuturo na maaaring gamitin ng guro upang maging interaktibo at masaya ang pagtuturo dahil ito’y isang laro na ginagawang nakakaengganyo ang pagkatuto. Hinuhubog nito ang kolaborasyon at pagsasama-sama ng mga mag-aaral sa pamamagitan ng laro. Tinutulungan din nito ang mga mag-aaral na mas maunawaan at maalala ang mga aralin sa asignaturanh Filipino sa pamamagitan ng aktibong pagsali at pagsagot sa mga katanungan upang sila’y manalo. Nahahasa ang kanilang kasanayan sa pagsagot ng mga tanong sa isang masayang paraan. Bukod dito, madaling iakma ang mga tanong at gawain na naaayon sa lebel ng kaalaman at pangangailangan ng mga mag-aaral.

Mga Kinakailangang Materyales:

Chipboard

Scissor

Tape

Paint

Ruler

Pentelpen

Pencil

Proseso sa Paggawa:

1. Pagdikitin ang dalawang chip board gamit ang tape.

2. Gumawa ng grid upang makabuo ng 100 kahon. Gamitin ang ruler at lapis sa pagsukat ng mga kahon upang ito’y pantay-pantay. Ang bawat kahon ay may lapad na 5 pulgada at taas na 3.5 pulgada.

3. Gamitin ang pentelpen upang markahan ang bawat kahon.

4. Maaari nang pintahan ang bawat kahon.

5. Susunod, maaari nang sulatan ng numero ang mga kahon (1-100).

6. Gumuhit ng mga ahas at hagdan at pintahan ito upang maging kaakit-akit.

7. Gawin ang dice: gumuhit ng anim na parisukat sa chip board na may sukat na 7 pulgada bawat gilid.

8. Pagdikitin ang mga parisukat upang maging isang kahon.

9. Panghuli, sulatan ito ng mga numero (1-6).