Иван Иванович Яковлев биографията.
Яковлев Иван Иванович 1991 сыллаахха, олунньу 13 күнүгэр Нам улууһун Таастаах нэһилиэгэр Валентина Эдуардовна, Иван Дмитриевич Яковлевтар дьиэ кэргэнигэр үһүс оҕонон, кэтэһиилээх, күүтүүлээх уол оҕо буолан күн сирин көрбүтэ.
Дьоллоох оҕо сааһа, оскуолатааҕы кэмнэрэ Үөдэй нэһилиэгэр ааспыта. Кыра эрдэҕиттэн чөл олоҕу, спорду сөбүлээн улааппыта. Ордук чэпчэки атлетиканан умсугуйан дьарыктаммыта. 8-с кылаас кэнниттэн волейбол көрүҥэр утумнаахтык дьарыктанан Амматааҕы 1-кы нүөмэрдээх орто оскуоланы 2009 сыллаахха ситиһиилээхтик үөрэнэн бүтэрбитэ.
Оскуола кэнниттэн Чурапчытааҕы физкультура уонна спорт институтугар үөрэнэ киирбитэ. Бу кэмнэргэ бэйэтин ытык иэһин толорон Владивосток куоракка, военнай морской флот салаатыгар сулууспалаабыта. Сулууспа кэниттэн үөрэҕин салҕаан баҕа санаа оҥостубут сыалын толорон, 2016 сыллаахха үөрэҕин ситиһиилээхтик бүтэрэн физическай культура уонна спорт учууталын идэтин ылбыта.
Иван үлэтин бастакы хардыытын Ньурба улууһугар Н.Н.Чусовской аатынан Антоновка орто оскуолатыгар физическай культура учууталынан ананан саҕалаабыта. Быстах байыаннай операция сулууспатыгар ыҥырыллыар диэри Ньурба куорат оҕо спортивнай оскуолатыгар (ДЮСШ) волейбол көрүҥэр тренеринэн үрдүк таһаарыылаахтык үлэлээбитэ.
Үлэлиир сылларыгар үгүс общественнай эбээһинэстэри чиэстээхтик толорбута, олоххо активнай көрүүлээх буолан, Ньурба куорат эриэккэс олоҕуттан туора турбакка барытыгар бастакы кэккэҕэ сылдьыбыта.
Иван Иванович оҕо эрдэҕиттэн удьуорун утумнаан, бу олус кылгас, күлүм гынан ааспыт олоҕор спорду өрө тутан утумнаахтык дьарыктаммыта. Үөдэй нэһилиэгин уонна Ньурба куоратын спортивнай хамаандатын тутаах чилиэнэ этэ. Чэпчэки атлетикаҕа, хайыһарга, волейболга, военнай-спортивнай күрэхтэргэ өрүү инники күөҥҥэ сылдьара.
Ваня үрдүк ситиһиилэрин үгүс грамоталар, анал бэлиэлэр, кубоктар, мэтээллэр туоһулууллар. Кини волейбол көрүҥэр сыллата анал аат хаһаайыннарынан буолбута, ол курдук «Лучший игрок», «Лучший защитник», «Лучший нападающий», «Полезный игрок» анал ааттары ылбыта элбэҕи этэр. 2021 сыллаахха 454№ Уурааҕынан СӨ Ил Дарханын илии баттааһыннаах «Участник тушения лесных пожаров» диэн үрдүк бэлиэнэн наҕараадаламмыта.
Өссө да элбэҕи ситиһиэхтээх эрэнэр уолбут, 2022 сыл балаҕан ыйын 27 күнүгэр мобилизацияҕа түбэһэн быстах байыаннай хомуурга Украина кыраныыссатыгар ыҥырыллан барбыта. Хомойуох иһин Иван хорсуннук, чиэстээхтик байыаннай сулууспаны толоро сылдьан, Украина уоттаах толоонугар олус хомолтолоохтук, кыһыылаахтык, абалаахтык күн сириттэн күрэннэ.
Эрэллээх уолбут Иван Иванович баара-суоҕа 32 эрэ сыл олох олорон ааста. Кини бу кылгас олоҕор элбэҕи ситиһэн ааста. Иллэҥ кэмигэр ис сурэҕиттэн уруһуйдуурун, айылҕаҕа сылдьан бултуурун-алтыырын ордороро. Ас астыырын олус астынара, ыллаан, үҥкүүлээн, уһанан да ылара, киинэҕэ да уһуллубута. Ваня хаартыскаҕа түһэрэрин, араас темаҕа видео оҥорорун ордороро, таксидермиянан, коллекциянан дьарыктанан испитэ…
Бэйэтин талан ылбыт идэтин толору баһылаабыта, спортка үгүс үрдүк ситиһиилэммитэ, эдэр көлүөнэ ыччаты волейбол кистэлэҥнэригэр олус кыһаллан бэлэмниирэ. Элбэх истин эрэллээх доҕоттордооҕо, куруутун үөрэ-көтө, мичээрдии сылдьара. Ийэлээх аҕатыгар, бииргэ төрөөбүттэригэр, чугас аймахтарыгар, доҕотторугар, биир дойдулаахтарыгар олус истин сыһыаннааҕа.
Кини олорботох олоҕун икки тапталлаах уол оҕолоро - Ян уонна Ярослав Яковлевтар аҕаларын туйа5ын хатаран, дьонно-сэргэҕэ убаастанар, үтүө үлэһит дьон буолан салҕыахтара.
Эн сырдык аатын кыһыл көмүс буукубанан суруллан уһун үйэлэргэ киэн тутта ааттана турдун!
