Олег Олегович Кумечко
Бу дьыл бэс ыйын 29 күнүгэр байыаннай дьайыы операциятыгар чиэстээхтик сулууспалыы сылдьан бойобуой сорудаҕы толорууга кэскиллээх ыччаппыт, нэһилиэкпит эр хоһууна Олег Олегович Кумечко сырдык тыына быһынна.
Олег Олегович кулун тутар 12 күнүгэр 1996 сыллаахха Любовь Петровна, Олег Петрович дьиэ кэргэнигэр иккис оҕонон күн сирин көрбүтэ. Дьоллоох оҕо сааһа Үөдэйин нэһилиэгэр, киэҥ нэлэмэн кырдалыгар ааспыта. Оҕо оҕо курдук сүүрэн-көтөн, оонньоон-көрүлээн доҕотторун-атастарын кытта кыра эрдэҕиттэн “Чуораанчык” оҕо уһуйааныгар иитиллэн Үөдэй орто оскуолатыгар үөрэнэ киирбитэ. Кини үөрэнэр кылааһа ураты кылаас этэ, уолаттар кылаастарыгар обороннай-спортивнай хайысхалаах кылааска үөрэммитэ. Оскуолаҕа үөрэнэр сылларыгар оҕо эрдэҕиттэн эт-хаан өттүнэн ураты сайдыылааҕа, барыга бары дэгиттэр талааннааҕа биллибитэ. Үөрэххэ, спортка, кэрэ эйгэҕэ умсугуйан туран кыһамньылаахтык дьарыктанара. Ол курдук, информатика, физкультура, география, физика уруоктарын ордороро, компьютернай науканы интэриэһиргиирэ. “Подросток” оҕо тэрилтэтигэр биир бастыҥ активист быһыытынан иитиллэн барыга бары көхтөөхтүк кыттара. Кылааһыгар культурнай маассабай секторынан ананан кыра эрдэҕиттэн тэрийэр, салайар үлэҕэ сылдьан эппиэтинэстээх, толоругас буоларга иитиллэн тахсыбыта. 2012 сыллаахха Намнааҕы оҕо музыкальнай оскуолатын Үөдэйдээҕи филиалыгар хореография кылааһын ситиһиилээхтик бүтэрбитэ. “Сардаҥа” оҕо үҥкүү коллективыгар дьарыктанар кэмигэр норуоттар икки ардыларынааҕы “Дети Азии” спортивнай оонньуулар култуурунай тэрээһинин кыттыылааҕа, республикатааҕы “Праздник Трепсихоры”, “Огни танца”, “Хотугу сулус” телевизионнай күрэх, аан дойдутааҕы “Русская культура во Франции” күрэхтэргэ ситиһиилээхтик кыттан оҕолорун кытта тэҥҥэ дипломан уонна лауреат үрдүк аатын ылбытта.
Эт-хаан өттүнэн ураты сайдыылаах оҕо этэ, кыра эрдэҕиттэн спордунан дьарыктанан бэйэтин кыанар, кыахтаах, эр хоһуун санаалаах буола улааппыта. Олег сөбүлээн дьарыктаммыт спортивнай көрүҥнэринэн буолаллар Мини-футбол, хайыһар, сахалыы остуол оонньуулара... Нэһилиэгин чиэһин көмүскээн хайыһарга, футболга, хабылыкка, хаамыскаҕа улуус, республика хас да төгүллээх кыайыылааҕа, призера буолан чугас дьонун үөрдүбүтэ, нэһилиэгэр, оскуолатыгар үгүс ситиһиини аҕалбыта.
Оскуоланы 2014 сыллаахха ситиһиилээхтик бүтэрэн Дьокуускайдааҕы 1№-х педагогическай училище физультурунай салаатыгар үөрэнэ киирбитэ. 1 кууруска үөрэнэ сылдьан ытык иэһин толоро Российскай Армия кэккэтигэр сулууспалаабыта. Армия кэнниттэн үөрэҕин салҕаан 2018 сыллаахха идэлээх киһи аатын ылан, диплом тутан дьонун үөрдүбүтэ. Үөрэҕин бүтэрээт 2019 сыллаахха Үөдэй орто оскуолатыгар физкультура учууталынан ситиһиилээхтик үлэлиир. Үлэлиир кэмнэригэр кинини оҕолор Олег Олегович диэн ытыктаан, убаастаан - сөбүлүүр, күннэтэ күүтэр учууталларынан буолбута. “Олег Олегович, ты самый лучший” диэн суруктаах открыткалары үөрэтэр оҕолоро үгүстүк ыыталлара. Олег нэһилиэккэ биир бастыҥ активист, ыччаттарга холобур буолан бары спортивнай, култуурунай тэрээһиннэргэ көхтөөхтүк кыттара, нэһилиэгин чиэһин үгүс спортивнай күрэхтэргэ, спартакиадаларга, фестивальнай көрүүлэргэ көмүскээбитэ. “Эрчим” ыччат түмсүү чилиэнинэн үлэлээн общественнай үлэттэн туора турбакка күүс-көмө буолбута. Аҕа саастаах көлүөнэҕэ тимуровскай көмөҕө, араас субуотунньуктарга ыччаттары, доҕотторун кытта тэҥҥэ сылдьан көҕүлээччи, тэрийсээччи, көх-нэм быһыытынан үтүө суобастаахтык дойдутун дьонун-сэргэтин туһугар үлэлээн-хамсаан ааспыта...
Олег үрдүк үөрэх кыһатыгар туттарсаары оскуолаттан тохтоон Дьокуускайга куоракка киирэр. Ол кэннэ, дойду үрдүнэн буола турар балаһыанньанан эр санаатын ылынан быстах байыаннай дьайыы операциятыгар Ытык иэһин төлүү 2022 сыл күһүнүгэр Приморскай кыраайга Уссурийскай куорат войсковой чааһыгар ыҥырыллан барбыта. Бойобуой дьайыыга сылдьан кини дойдутун, доҕотторун кытта сибээһин быспатаҕа, өрүү бириэмэ көһүннэҕинэ эрийэн, билсэн дьонун, доҕотторун кытта кэпсэтэн ахтылҕанын таһаарара... Бу хомолтолоох ыар сурах барыбытын соһутта...эрэнэр уолбут кутаа толоонугар бэйэтин олоҕун толук ууран эйэлээх олох иһин бойобуой сорудаҕы толоро сылдьан биһиги кэккэбититтэн букатыннаахтык туораата...
Дьиҥнээх эр хоһуун, кэскиллээх ыччаппыт, буойун Олег Олегович Кумечко хорсун быһыыта үйэлэргэ умнуллуо суоҕа...
