АНАЛ БАЙЫАННАЙ ДЬАЙЫЫ КЫТТЫЫЛААХТАРЫН ӨЙҮҮР СЫАЛЛААХ УОННА СЭРИИ ХОНУУТУГАР ОХТУБУТ
УОЛАТТАР ААТТАРЫН ҮЙЭТИТИИГЭ БЫЛААННААХ ҮЛЭ ЫЫТЫЛЛАР.
Кулун тутар 20 күнүгэр, анал байыаннай дьайыы кыттыылаахтарын үлэнэн хааччыйыыга уонна ааттарын үйэтитиигэ аналлаах мунньах ыытылынна. Мунньаҕы улуус баһылыга Юрий Слепцов салайан ыытта. Манна тэрилтэлэр салайааччылара кыттыыны ыллылар.
Юрий Иннокентьевич анал байыаннай дьайыы кыттыылаахтарын кытта көрсөн кэпсэтэн, туох ханнык үөрэхтээхтэрин, ханна үлэлиэхтэрин баҕаралларын билэн биир реестр оҥоруохха наадатын эттэ. Бастатан туран, байыаннай баҕа санаатын учуоттууру тоһоҕолоото. Биһиги кинилэргэ көмөлөһөр, кинилэри өйүүр сыаллаах кэпсэтиэхтээхпитин эттэ.
Дьарыктаах буолуу киин салайааччыта Гаврил Николаев улахан тэрилтэлэргэ анал байыаннай дьайыы кыттыылаахтарын үлэҕэ ылыыга түһээн түһэрии туһунан уонна промышленнай тэрилтэлэри кытта сөбүлэһии түһэрсиэххэ диэн этии киллэрдэ. Ону сэргэ консультация биэриигэ анал биир күнү аныахха диэн эттэ.
Улуус баһылыга Юрий Слепцов улуус үрдүнэн хамаанда тэрийэн, үлэни күүһүрдэргэ тоһоҕолоон эттэ. Бу хамаандаҕа тэрилтэлэр салайааччылара киирэн, туох ханнык вакансия баарын, кими ханна үөрэттэрэ ыытар о.д.а. туһунан биир ситимнээх, былааннаах үлэни ыытыахха диэтэ.
Салгыы үйэтитии чааһыгар улуус депутаттарын Сэбиэтин председателэ Алексей Винокуров культура уонна үөрэх эйгэтин чааһыгар араас хайысханан былааннаах үлэлэр ыытыллалларын туһунан иһитиннэрдэ. Аҕа дойдуну көмүскээччилэр дьиэ кэргэттэрин Намнааҕы комитетын салайааччыта Майя Софронова электроннай ресурс оҥоһуллан эрэрин туһунан көрдөрөн кэпсээтэ. Олохторун толук уурбут буойуттарбыт туһунан матырыйааллары хомуйуу саҕаламмытын эттэ. Мунньах кыттыылаахтара уолаттар ааттарынан үөрэх тэтэрээттэрин оҥоруу, уулуссаларга ааттарын иҥэрии о.д.а. этиини киллэрдилэр.
Юрий Иннокентьевич культура, үөрэх тэрилтэлэрэ араас хабааннаах куонкурустары тэрийэллэригэр, музейдар оскуола музейдарын кытта тэҥҥэ үлэлэһэллэригэр, тематическай көрсүһүүлэри ыыталларыгар сорудахтаата. Хас биирдии нэһилиэккэ бу икки хайысхаҕа хамыыһыйалар тэриллэн үлэни ыытыахтаахтарын эттэ.
Ону сэргэ бойобуой дьайыы кыттыылаахтарын скверин улаатыннарыы туһунан боппуруос көтөҕүлүннэ. Маныаха тустаах тэрилтэлэр эскизнэй варианын толкуйдаан оҥороллоругар сорудах бэрилиннэ.
Бу курдук, анал байыаннай дьайыы кыттыылаахтарын болҕомто кииниттэн түһэрбэккэ үлэ салгыы тэтимнээхтик барыахтааҕа этилиннэ. Үйэтитии уонна патриотическай иитии чааһыгар бары түмсэн биир сүбэнэн үлэни ыытыахха уонна маннык хабааннаах мунньаҕы кыбаарталга хайаан да тэрийиэххэ диэн түмүктээтилэр.
«Нам улууһа» МР пресс-сулууспата
