Ons Fynbos Inligtingsreeks 

Didelta carnosa var. tomentosa het aan die begin van Augustus hulle gesiggies begin wys.  Hulle groei welig in die duinehabitat langs die see.  Mens sien hulle veral teen die duine buite Struisbaai op pad L' Agulhas toe.  Gedurende September lewer hulle 'n skouspel naby die soldatepoel na die punt se kant toe. In Engels heet hulle Hairy Salad Bush en in Afrikaans Harige Kusslaaibos of Harige Seegousblom.  Die groot geel daisy blomme en silwer blare maak van hulle die ideale blomme vir 'n kustuin en boonop is hulle windbestand en waterwys.

Leucospermum truncatum (Aug - Des)                      Hierdie laaggroeiende speldekussing speel ’n belangrike rol in die fynbos-ekosisteem. Sy helder oranje blomme is ryk aan nektar en lok suikerbekkies, suikervoëls en ander voëls wat help met bestuiwing. Bye en ander insekte besoek ook die blomme. Die kalksteenspeldekussing help ook om sand en grond te stabiliseer en dra ook by tot die gesondheid en veerkragtigheid van die hele fynbos-ekosisteem. Jy sal hulle op Struisbaai sien as jy oor die kop OK toe ry.  Hulle groei veral aan die linkerkant van die pad.

Agathosma collina Hierdie Duineboegoe met sy helder geel-groen blare is 'n geharde struik wat in Oktober begin blom en aanhou tot Aprilmaand. Hulle kom algemeen op kalksteenkoppies voor asook in duineveld waar hulle help om die duine te stabiliseer. Jy sal dit in groot getalle vind as jy met Zoetendalstraat langs ry. Dit groei al langs die voet van die Agulhasberg. Dit staan nie bekend vir enige medisinale waarde nie, maar wel vir sy pragtige vertoning in die veld en selfs in tuine.

 Satyrium cranium (Sept - Nov) Rootrewwa / Pink Satyr Orchid is 'n geharde meerjarige plant. Hulle staan nou in volle blom en kan oral in die veld en selfs langs strate en in tuine gesien word. Dit hou van sanderige grond, maar kom ook voor in kalksteengebiede. Die plant dra 'n klomp ligpienk tot rosige blommetjies wat styf ingeryg teen die steel sit. Vanweë kusontwikkeling, indringerspesies en ondeurdagte stroping van die plante, het getalle baie afgeneem.

Disa cornuta (Golden Orchid of Inkspot Disa) is een van die stewige disa's.

Ek het hulle op twee plekke in Struisbaai raakgeloop. Hulle groei tot 70cm hoog. Die blare is swaardvormig en die stam stewig en regop. Die blomme het kort blomsteeltjies en kyk effens af. Die boonste kroonblaar is ligpers, vandaar die naam Inkspot Disa. Die ander twee blomblare is silwer-wit met 'n swart oog. Van naby beskou, 'n pragtige blommetjie.

Hulle begin in die lente blom en jy sal nog tot in Februarie van die blomme kan sien.